ASSAM TIMES POST
ডিফু : মাৰাত্মক কৰ’নাৰ ভাইৰাছৰ বিৰুদ্ধে অসমৰ তিনি পাৰ্বত্য জিলাই কেনেধৰণৰ প্ৰস্তুতি গ্ৰহণ কৰিছে তাৰ বুজ ল’বলৈ অসমৰ মুখ্যমন্ত্ৰী সৰ্বানন্দ সোণোৱালে ডিফু ভ্ৰমণ কৰি যোৱাৰ পিছতে অসম আৰক্ষীৰ অতিৰিক্ত উপ-আৰক্ষী সঞ্চালক জিপি সিঙেও আজি ডিফু পৰিদৰ্শন কৰি যায় ৷ আজি দুপৰীয়া অতিৰিক্ত উপ-আৰক্ষী সঞ্চালকগৰাকীয়ে পোনে পোনে কাৰ্বি আংলং আৰক্ষী অধীক্ষকৰ কাৰ্যালয়ত প্ৰৱেশ কৰে ৷ অসম আৰক্ষীৰ শীৰ্ষ বিষয়াগৰাকী আৰক্ষী অধীক্ষকৰ কাৰ্যালয়ত মধ্য সংমণ্ডলৰ ডি আইজি, কাৰ্বি আংলঙৰ আৰক্ষীক দেৱজিৎ দেউৰী, হামৰেণৰ আৰক্ষী অধীক্ষক ৰমনদীপ কৌৰ, ডিমা হাছাওৰ আৰক্ষী অধীক্ষক বীৰ বিক্ৰম গগৈ আৰু জিলা আৰক্ষীৰ কেইবাগৰাকী শীৰ্ষ বিষয়া সৈতে এক আলোচনাত মিলিত হয় ৷
আলোচনাৰ শেহত অতিৰিক্ত উপ-আৰক্ষী সঞ্চালকগৰাকীয়ে সাংবাদিকৰ আগত কয় যে, প্ৰধান মন্ত্ৰী নৰেন্দ্ৰ মোডীয়ে আহ্বান জনোৱা লকডাউনৰ মাজতে কৰ’না ভাইৰাছৰ সৈতে সম্মুখৰ ফালৰ পৰা যুঁজ দিয়া অসম আৰক্ষীক অধিক উৎসাহ দিবৰ নিমিত্তে তেওঁ এই ভ্ৰমন কৰিছে ৷ অসম আৰক্ষীয়ে কৰ’না ভাইৰাছৰ সন্ত্ৰাস নকমালৈকে অবিৰাম কাম কৰি যাব ৷ কৰ’নাৰ বিৰুদ্ধে আৰক্ষীয়ে দ্বিগুণ উৎসাহেৰে কাম কৰি যাব বুলিও কয় সঞ্চালকগৰাকীয়ে ৷ অসমৰ ৯০ শতাংশ লোকে লকডাউনলৈ সমৰ্থন জনাইছে যদিও ১০ শতাংশই সমৰ্থন জনোৱা নাই ৷
সেই সকলক সমাজৰ লোক আৰু আৰক্ষীয়ে লকডাউন মানিবলৈ সমান্তৰালভাৱে হেঁচা প্ৰয়োগ কৰি আহিছে বুলি মন্তব্য কৰে ৷ আৰক্ষীৰ ধৰ্ম অনুসৰি ৰাষ্ট্ৰীয় সংকটৰ সময়ত মানৱ সেৱা কৰাৰ লগতে ঠায়ে ঠায়ে দুখীয়া-দৰিদ্ৰ লোকক আৰক্ষীৰ তৰফৰ পৰা যোগান ধৰা খাদ্য সামগ্ৰী আৰু নৈতিক সহায়ৰ বাবে প্ৰসংসা কৰে ৷ আনহাতে, অসম আৰক্ষীৰ শীৰ্ষ বিষয়াগৰাকী ডিফুত আৰক্ষী প্ৰশাসনৰ সৈতে পৰ্যালোচনা সভা কৰি যোৱাৰ পিছত তিনি পাৰ্বত্য জিলাত কাৰবি আংলং, পশ্চিম কাৰবি আংলং আৰৱ ডিমা হাছাওত কৰ’নাৰ বিৰুদ্ধে যুঁজিবলৈ আৰক্ষীৰ ৰণ নীতি কি হ’ব সেয়া লক্ষণীয় হৈ পৰিছে ৷
