চিজেপিৰ যন্তৰ-মন্তৰ অভিযানৰ দিনা আটক কৰা প্ৰতিবাদকাৰীসকলক ‘উন্নত মানৰ, গৰম আৰু সতেজ খাদ্য’ প্ৰদান কৰা হয়। তেওঁলোকক আৰক্ষীৰ লকআপতো ৰখা হোৱা নাছিল, অস্থায়ী ডিটেনচন কেম্পত ৰখা হৈছিল। ‘দ্য হিন্দু’ৰ এক প্ৰতিবেদন অনুসৰি, এই কথা উল্লেখ কৰিছে দিল্লী আৰক্ষী আয়ুক্ত অনুৰাগ কুমাৰে (Delhi Police Commissioner Anurag Kumar)। উচ্চতম ন্যায়ালয়ত দাখিল কৰা শপতনামাত এই কথা উল্লেখ কৰা হৈছে। দিল্লী আৰক্ষী অধীক্ষকৰ মতে, যি পৰিস্থিতিৰ বাবে তেওঁলোকক আটক কৰি ৰখা হৈছিল, সেই পৰিস্থিতিৰ সমাধান হোৱাৰ লগে লগে প্ৰতিবাদকাৰীসকলক ওলাই যাবলৈ দিয়া হৈছিল। লগতে তেওঁ কয় যে প্ৰতিবাদকাৰীসকলক মাত্ৰ ২-৬ ঘণ্টাৰ বাবে আটক কৰি ৰখা হৈছিল।
যোৱা ১০ অক্টোবৰত চিজেপিয়ে যন্তৰ-মন্তৰ অভিযানৰ আহ্বান জনাইছিল। সেইদিনা প্ৰতিবাদকাৰীক বাধা দিবলৈ আৰক্ষীয়ে আৰম্ভণিৰে পৰা সজাগ হৈ আছিল। যন্তৰ-মন্তৰ অঞ্চলৰ কাষ চাপিবলৈ দিয়া নাছিল কোনো ব্যক্তিক। য’তেই সমবেত হ’বলৈ চেষ্টা কৰিছিল তাতেই প্ৰতিবাদকাৰীক আঁতৰাই দিছিল আৰক্ষীয়ে। সেইদিনা এই ঘটনা সন্দৰ্ভত দিল্লী আৰক্ষী আয়ুক্তৰ পৰা উত্তৰ বিচাৰিছিল উচ্চতম ন্যায়ালয়ে।
ইতিমধ্যে আদালতত দাখিল কৰা হৈছে শপতনামা। সেইদিনা গ্ৰেপ্তাৰ হোৱা ৰাজনীতিবিদসকলকো তেওঁলোকৰ পদবী বিবেচনা কৰি সম্পূৰ্ণ সন্মান দিয়া হৈছিল বুলি আৰক্ষী অধীক্ষকগৰাকীয়ে কয়। ধৃত নেতাসকলক এছ এইচ অ’ৰ (ষ্টেচনৰ ভাৰপ্ৰাপ্ত বিষয়া) কোঠাত বহিবলৈ অনুৰোধ জনোৱা বুলিও তেওঁ কয়। তাতে তেওঁলোকৰ বাবে চাহ, কফি আৰু সতেজ খাদ্যৰো ব্যৱস্থা কৰা হৈছিল।
যন্তৰ-মন্তৰলৈ প্ৰতিবাদকাৰীৰ পদযাত্ৰাৰ দিনটোত ইণ্টাৰনেট সেৱাও আংশিকভাৱে ব্যাহত হৈ পৰে। দিল্লী আৰক্ষী আয়ুক্তই শপতনামাত এই কথাও উল্লেখ কৰিছে। তেওঁ কয় যে সেইদিনা সমগ্ৰ ইণ্টাৰনেট বন্ধ হোৱা নাছিল। কেৱল মোবাইল ইণ্টাৰনেট সেৱা সাময়িকভাৱে বন্ধ কৰি দিয়া হৈছিল। আৰু সেইটোও ৰাইচিনা পাহাৰৰ চাৰিওফালে চাৰি কিলোমিটাৰ অঞ্চলৰ ভিতৰত।
আৰক্ষীৰ মতে, চোৰাংচোৱাৰ তথ্য আৰু সেইদিনা তাৎক্ষণিক পৰিস্থিতিৰ ভিত্তিত প্ৰয়োজনীয় পদক্ষেপ গ্ৰহণ কৰা হৈছিল। মূল উদ্দেশ্য আছিল আইন-শৃংখলা বজাই ৰখা। ‘দ্য হিন্দু’ৰ এক প্ৰতিবেদন অনুসৰি, দিল্লী আৰক্ষী অধীক্ষকে চিজেপিৰ নাম নোলোৱাকৈ শপতনামাত লিখিছে, “ৰাষ্ট্ৰীয় ৰাজধানীত আইন-শৃংখলা বিঘ্নিত হ’বলৈ আৰক্ষীয়ে কেতিয়াও অনুমতি দিব নোৱাৰে। বিশেষকৈ যেতিয়া কোনো সংগঠনে আন্দোলনৰ আহ্বান জনায়, যাৰ ফলত শেহতীয়া সময়ত অশান্তিৰ সৃষ্টি হৈছে, ৰাজহুৱা আৰু ব্যক্তিগত সম্পত্তি ধ্বংস হোৱাৰ লগতে বহুতে আঘাতপ্ৰাপ্ত হৈছে।”
তেওঁ শপতনামাত ২০ জুলাইৰ ঘটনাৰ কথাও উল্লেখ কৰিছে। ২০ জুলাইৰ কাণ্ডৰ পিছত ১০ অক্টোবৰত আৰক্ষীয়ে কোনো ধৰণৰ ৰিস্ক ল’ব পৰা অৱস্থাত নাছিল বুলি উল্লেখ কৰি নীট প্ৰশ্নকাকত ফাদিলৰ বিৰুদ্ধে ২০ জুলাইত চিজেপিয়ে ‘চলো সংসদ’ কাৰ্যসূচীৰ আহ্বান জনাইছিল। সেইদিনাও দিল্লীত এক বিশৃংখল পৰিস্থিতিৰ সৃষ্টি হয়।
