পুৰুষ ৰোগীৰ পত্নীৰ সৈতে অবৈধ সম্পৰ্কৰ অভিযোগ, চিকিৎসালয়ৰ নাৰ্চ–কৰ্মচাৰীক অশ্লীল বাৰ্তা প্ৰেৰণৰো অভিযোগ
চিকিৎসক ডাঃ প্ৰয়াস সিংঘালৰ (Prayas Singhal) মৃত্যুক কেন্দ্ৰ কৰি চাঞ্চল্যকৰ অভিযোগ আৰু তথ্য পোহৰলৈ অহাৰ দাবী উত্থাপিত হৈছে। একাধিক মহিলাৰ সৈতে চিকিৎসকগৰাকীৰ অনৈতিক সম্পৰ্ক থকাৰ অভিযোগ উত্থাপন হোৱাৰ লগতে চিকিৎসালয়ৰ নাৰ্চ আৰু কৰ্মচাৰীলৈ অশ্লীল বাৰ্তা প্ৰেৰণ কৰাৰো অভিযোগ উঠিছে।
উত্থাপিত অভিযোগ অনুসৰি, পুৰুষ ৰোগীৰ পত্নীৰ সৈতে অনৈতিক সম্পৰ্ক স্থাপন কৰাত চিকিৎসকগৰাকী জড়িত আছিল। এগৰাকী বা দুগৰাকী নহয়, প্ৰায় ১০–১২গৰাকী মহিলাৰ সৈতে চিকিৎসকগৰাকীৰ এনে সম্পৰ্ক থকাৰ অভিযোগো উত্থাপিত হৈছে।
অভিযোগ অনুসৰি, ২০২৫ চনৰ জুলাই মাহৰ পৰা এগৰাকী মহিলাৰ সৈতে চিকিৎসকগৰাকীৰ ঘনিষ্ঠ সম্পৰ্ক আছিল। আনকি সেই মহিলাগৰাকীক স্বামীৰ সৈতে বিবাহ বিচ্ছেদ কৰিবলৈ চিকিৎসকগৰাকীয়ে হেঁচা প্ৰয়োগ কৰাৰ চেষ্টা চলোৱাৰো অভিযোগ উত্থাপিত হৈছে।
ইফালে, চিকিৎসালয়ৰ নাৰ্চ আৰু অন্যান্য কৰ্মচাৰীলৈ চিকিৎসকগৰাকীয়ে অশ্লীল বাৰ্তা প্ৰেৰণ কৰাৰ অভিযোগতো একাধিক ভুক্তভোগীয়ে অসম মেডিকেল ৰেজিষ্ট্ৰেচন কাউন্সিলৰ ওচৰত অভিযোগ দাখিল কৰিছিল বুলি জানিব পৰা গৈছে।
অভিযোগসমূহৰ ভিত্তিত অসম মেডিকেল ৰেজিষ্ট্ৰেচন কাউন্সিলে ২৩ জুন, ২০২৬ত ভঙাগড় আৰক্ষী থানাত ডাঃ প্ৰয়াস সিংঘালৰ বিৰুদ্ধে অভিযোগ দাখিল কৰিছিল বুলি জানিব পৰা গৈছে।
ইফালে, চিকিৎসকগৰাকীৰ মৃত্যুৰ ঘটনাক লৈ আৰক্ষীৰ প্ৰাথমিক তদন্ততো কেইবাটাও গুৰুত্বপূৰ্ণ তথ্য পোহৰলৈ অহাৰ দাবী কৰা হৈছে। আৰক্ষীৰ প্ৰাথমিক অনুসন্ধান অনুসৰি, চিকিৎসকগৰাকীয়ে নিজেই ঔষধ প্ৰয়োগ কৰি আত্মহত্যা কৰা বুলি সন্দেহ কৰা হৈছে।
প্ৰাথমিক তদন্তত চিকিৎসকগৰাকীয়ে প্ৰথমে এনাস্থেছিয়াৰ ঔষধ আৰু তাৰ পিছত নিদ্ৰা আনিব পৰা ঔষধ প্ৰয়োগ কৰাৰ সন্দেহ প্ৰকাশ কৰা হৈছে। অৱশ্যে মৃত্যুৰ সঠিক কাৰণ আৰু ব্যৱহৃত ঔষধৰ প্ৰকৃতি নিশ্চিত কৰিবলৈ মৰণোত্তৰ পৰীক্ষা, ফৰেনছিক পৰীক্ষা আৰু অন্যান্য তদন্তৰ ফলাফল গুৰুত্বপূৰ্ণ হ’ব।
আৰক্ষীৰ এটা সম্ভাব্য তদন্তৰ দিশ হিচাপে চিকিৎসকগৰাকীৰ বিৰুদ্ধে উত্থাপিত অভিযোগ, চিকিৎসা অনুজ্ঞাপত্ৰ বাতিল হোৱাৰ আশংকা আৰু সামাজিক সন্মান হেৰুৱাৰ ভয়ৰ বিষয়টোও পৰীক্ষা কৰা হৈছে বুলি জানিব পৰা গৈছে।
অৱশ্যে চিকিৎসকগৰাকীৰ বিৰুদ্ধে উত্থাপিত অনৈতিক সম্পৰ্ক, অশ্লীল বাৰ্তা প্ৰেৰণ আৰু অন্যান্য অভিযোগসমূহ তদন্তৰ অন্তিম সিদ্ধান্ত নহয়। অভিযোগসমূহৰ সত্যতা আৰক্ষীৰ তদন্ত আৰু সংশ্লিষ্ট প্ৰমাণৰ ভিত্তিতহে নিশ্চিত হ’ব।
