ধাৰাসাৰ বৰষুণৰ ফলত উত্তৰাখণ্ডৰ (Uttarakhand) বিস্তৃত অঞ্চলত আকস্মিক বান (Sudden flood) আৰু ভূমিস্খলনৰ (Landslide) সৃষ্টি হৈছে। স্বাভাৱিক জীৱন স্তব্ধ হৈ পৰিছে। পাহাৰৰ পৰা নামি অহা আকস্মিক বানৰ ফলত প্ৰতি মুহূৰ্তত ভূমিস্খলনৰ সম্ভাৱনা বৃদ্ধি পাইছে। এই দুৰ্যোগৰ ফলত ৰাজ্যত ইতিমধ্যে ৭ জন লোকৰ মৃত্যু হৈছে। ভূমিস্খলনৰ বাবে বহু পথ বন্ধ হৈ পৰিছে। ৰাজ্যৰ বতৰ বিজ্ঞান বিভাগে আলমোৰা, বাগেশ্বৰ, তেহৰী, নাইনিতাল, উধম সিং নগৰ আৰু পৌৰীত ধাৰাসাৰ বৰষুণৰ সম্ভাৱনা থকা বুলি জানিব পৰা গৈছে।
ৰাজ্যৰ দুৰ্যোগ ব্যৱস্থাপনা বিভাগে জনোৱা মতে, বৰষুণ আৰু ভূমিস্খলনৰ বাবে ১৭২টা পথ বন্ধ হৈ পৰিছে। তাৰ ভিতৰত পিথোৰাগড়ৰ দুটা ঘাইপথ, নাইনিতাল আৰু বাগেশ্বৰ আছে। ধাৰাবাহিক বৰষুণৰ ফলত গোলা নদীত ২৭ হাজাৰ কিউচেক পানী এৰি দিয়া হৈছে। ইয়াৰ ফলত হালদাৱানী, উধম সিং নগৰ, পুলভট্টা, শান্তিপুৰী আৰু সূৰ্যনগৰত বান পৰিস্থিতিৰ সৃষ্টি হ’ব পাৰে বুলি আশংকা কৰা হৈছে। প্ৰশাসনে লাউডস্পীকাৰত ঘোষণা কৰি অঞ্চলবাসীক সকীয়াই দিছে। খাটিমাৰ বনগাঁৱৰ খকৰা নদীৰ জলপৃষ্ঠ নিম্নভূমি অঞ্চলত প্ৰৱেশ কৰিবলৈ আৰম্ভ কৰিছে। প্ৰশাসনে তাত থকা বাসিন্দাসকলক ওখ স্থানলৈ স্থানান্তৰ কৰিবলৈ আৰম্ভ কৰিছে।
পৌৰীৰ কোটদ্বাৰত নদীৰ বুকুত উটুৱাই নিলে এগৰাকী মাতৃ আৰু ডেৰ বছৰীয়া কন্যা সন্তানক। আনহাতে, আলমোৰাৰ হাবালবাগত এটা ঘৰ ভাঙি দুগৰাকী মহিলা আৰু এটি শিশুৰ মৃত্যু হয়। ধাৰৰ টুনি অঞ্চলত ভূমিস্খলনৰ ফলত আবদ্ধ হৈ দুজন নেপালী শ্ৰমিকৰ মৃত্যু হয়। ধাৰাসাৰ বৰষুণৰ বাবে বুধবাৰলৈকে নাইনিতাল, চম্পাৱত, উধম সিং নগৰ আৰু পিথোৰাগড়ত বিদ্যালয় আৰু আংগনৱাড়ী কেন্দ্ৰ বন্ধ ৰখাৰ নিৰ্দেশ দিয়া হৈছে। বাগেশ্বৰৰ ১০৯ নং ৰাষ্ট্ৰীয় ঘাইপথৰ এটা অংশ ভূমিস্খলনৰ বাবে বন্ধ হৈ পৰিছে। নাইনিতালৰ ছিপৰা আৰু কোশী নদীৰ জলপৃষ্ঠই বিপদসীমাত উপনীত হৈছে। তেহৰীত ৩৪ নং ৰাষ্ট্ৰীয় ঘাইপথ বন্ধ হৈ থকাত বাহনসমূহ সমস্যাৰ সন্মুখীন হৈছে।
উত্তৰ প্ৰদেশ আৰু ঝাৰখণ্ডতো দুৰ্যোগৰ সন্মুখীন হৈছে। উত্তৰ প্ৰদেশত গংগাৰ জলপৃষ্ঠ বৃদ্ধি পোৱাৰ লগে লগে নদীৰ পাৰৰ বহু অঞ্চল বানত বুৰ গৈছে। বানৰ আশংকাৰ বাবে বাসিন্দাসকলক নিম্নভূমি অঞ্চলসমূহ খালী কৰিবলৈ কোৱা হৈছে। বাৰাণসীৰ ৮৪টা ঘাট পানীৰ তলত। বিপদসীমাৰ ওপৰেৰে বৈ গৈছে গংগাৰ পানী। আনহাতে, চিত্ৰকূট আৰু মন্দাকিনী নদীতো বাঢ়নী পানী। ৰামঘাট, নিৰ্মোহী আখৰাকে ধৰি কেইবাটাও অঞ্চল ডুব গৈছে। ৰামঘাট আৰু নয়াগাঁও সংযোগী দলংখন পানীৰ ঢৌৰ ফলত ক্ষতিগ্ৰস্ত হৈছে।
আগন্তুক ৪৮ ঘণ্টাত ২০খনতকৈও অধিক জিলাত প্ৰবল বৰষুণৰ সতৰ্কবাণী জাৰি কৰা হৈছে। বতৰ বিজ্ঞান বিভাগে জনোৱা মতে, মঙলবাৰে প্ৰতাপগড়ত ১৪৭ মিলিমিটাৰ বৰষুণ হয়। সোণভদ্ৰত ১৪০ মিলিমিটাৰ, কানপুৰ চহৰত ১২৯ মিলিমিটাৰ, বাণ্ডাত ১১০ মিলিমিটাৰ, আজমগড়ত ১০১ মিলিমিটাৰ আৰু গাজীপুৰত ৯৫ মিলিমিটাৰ বৰষুণ হয়। চিত্ৰকূট, বাণ্ডা, প্ৰয়াগৰাজ, ফতেহপুৰ, সোণভদ্ৰা, মিৰ্জাপুৰ, চন্দৌলি, বলিয়া, কানপুৰ ডেহাট, ৰায়বৰেলী, কাছগঞ্জৰ বাবে প্ৰচণ্ড বৰষুণৰ সতৰ্কবাণী জাৰি কৰা হৈছে।
আনহাতে, ঝাৰখণ্ডৰ বাবে বৰষুণৰ সতৰ্কবাণী জাৰি কৰা হৈছে। বতৰ বিজ্ঞান বিভাগে জানিবলৈ দিয়া মতে, গড়োৱা, পালামু, লাতেহাৰ, লোহাৰদগা, গুমলা, ছৰাইকেলা-খাৰছাৱন, পূব সিংভূম, ছিমডেগা, খুঁটি, পশ্চিম সিংভূমত বৰষুণৰ আশংকা কৰা হৈছে। ৫ ছেপ্টেম্বৰলৈ গড়হোৱা, পালামু, ছিমডেগা আৰু পশ্চিম সিংভূমৰ বাবে ৰঙা সতৰ্কবাণী জাৰি কৰা হৈছে।
