নেপালৰ আকস্মিক বানৰ (Nepal floods) প্ৰভাৱ সীমান্তৰ পাৰ হৈ ভাৰততো পৰিছে। নেপালৰ পৰা বহু নদী ভাৰতত প্ৰৱেশ কৰিছে। আকস্মিক বানৰ ফলত ক্ষতিগ্ৰস্ত নদীৰ মাছবোৰ বিহাৰত প্ৰৱেশ কৰিছে, সেইবোৰ খোৱাটো বিপজ্জনক। আকস্মিক বানৰ বাবে নদীখনৰ জলপৃষ্ঠ বৃদ্ধি পাইছে। আৰু ফলস্বৰূপে বহুতো অচিনাকি প্ৰজাতিৰ মাছ দেখা পোৱা গৈছে। কেৱল সেয়াই নহয়, সেই মাছ খাই বহু লোক অসুস্থও হৈ পৰিছে। ইয়াৰ পিছত এই নিষেধাজ্ঞা ৰাজহুৱা কৰিলে বিহাৰ চৰকাৰে (Bihar Govt.)।
বানৰ পানীত ওপঙি থকা মাছ ধৰা, বিক্ৰী (Fishing, selling) আৰু খোৱাৰ পৰা বিৰত থাকিবলৈ অনুৰোধ জনাইছে বিহাৰৰ পশু আৰু মীন বিভাগে। গাইডলাইনত উল্লেখ আছে যে বানৰ ফলত প্ৰদূষিত নলা, মৃত জীৱ-জন্তু বা অন্যান্য প্ৰদূষক পদাৰ্থৰ সৈতে দীৰ্ঘদিন সংস্পৰ্শলৈ অহাৰ বাবে সেই মাছৰ শৰীৰত বেক্টেৰিয়া আৰু ভাইৰাছৰ সম্ভাৱনা থাকে। ফলত সেই মাছবোৰ খাই বেমাৰ হোৱাৰ আশংকা বেছি। সেয়ে বিহাৰ চৰকাৰে পৰিস্থিতি স্বাভাৱিক নোহোৱালৈকে বানৰ পানীত ওপঙি থকা মাছ নাখাবলৈ পৰামৰ্শ দিছে।
বিহাৰ চৰকাৰে গাইডলাইনত কেতবোৰ সাৱধানতা অৱলম্বন কৰিবলৈ পৰামৰ্শ দিছে। তেওঁলোকৰ পৰামৰ্শ যে সংশ্লিষ্ট বিভাগে পৰীক্ষা নকৰালৈকে বানৰ পানীত ওপঙি থকা অচিনাকি মাছ খাব নালাগে। অচিনাকি মাছ দেখা পালে সংশ্লিষ্ট বিভাগ বা স্থানীয় প্ৰশাসনক অৱগত কৰিবলৈ নিৰ্দেশ দিয়া হৈছে। কিন্তু সেই মাছবোৰ খাই যদি কোনো লোক অসুস্থ হৈ পৰে তেন্তে চৰকাৰে ততাতৈয়াকৈ চিকিৎসকৰ পৰামৰ্শ ল’বলৈ কৈছে।
নেপাল দুৰ্যোগৰ পিছৰে পৰা কোশী আৰু গণ্ডক নদীৰ জলপৃষ্ঠ বৃদ্ধি পাইছে। বিহাৰত ওপঙি আছে বহু মৃত মাছ। ইয়াৰ সমান্তৰালকৈ নদীৰ তলত আৱৰ্জনাও বৈ আছে। বিহাৰৰ নদীতো পলস আৰু বোকাৰ সোঁত দেখা গৈছে। বিহাৰ চৰকাৰে সেই নদীৰ পানীত কোনো কাম কৰাৰ পৰা বিৰত থাকিবলৈ পৰামৰ্শ দিছে।
বিশেষজ্ঞসকলৰ মতে, বানৰ দূষিত পানী টিউবৱেল, কুঁৱাৰ দৰে খোৱাপানীৰ উৎসৰ সৈতে মিহলি হৈ আছে। ফলত ডায়েৰিয়া, কলেৰা আদি ৰোগ দ্ৰুতগতিত বিয়পিব পাৰে। দূষিত পানী খোৱাতো টাইফয়েডৰ আশংকা থাকে। ইয়াৰ বাহিৰেও দূষিত স্থবিৰ পানীৰ পৰা ডেংগু, মেলেৰিয়াৰ দৰে ৰোগৰ আশংকা থাকে। পৰিৱৰ্তিত পৰিস্থিতিৰ বাবে নেপালৰ সীমান্তৱৰ্তী বিহাৰৰ বিভিন্ন প্ৰান্তত পশ্চিম-পূব চম্পাৰণ, সীতামৰ্হি, কিষাণগঞ্জ, পূৰ্ণিয়াকে ধৰি বিভিন্ন ঠাইত সাৱধানতাৰ পৰামৰ্শ দিয়া হৈছে। চৰকাৰে জনাইছে যে নেপালৰ সীমান্তৱৰ্তী বিহাৰৰ সাতখন জিলাৰ পানীত উচ্চ মাত্ৰাৰ আইৰণ পোৱা গৈছে।
২৬ আগষ্টত নেপালত সংঘটিত হোৱা আকস্মিক বানৰ পিছৰে পৰা বুধবাৰে পুৱালৈকে ১১২৭টা মৃতদেহ উদ্ধাৰ কৰা হৈছে। এই কথা প্ৰকাশ কৰিছে নেপাল আৰক্ষীয়ে। এতিয়াও চলি আছে উদ্ধাৰ অভিযান। নেপাল আৰক্ষীয়ে দিয়া তথ্য অনুসৰি, এতিয়াও সন্ধানহীন হৈ আছে ৪,৮৫৮জন লোক।
