মঙলবাৰে পুৱাৰে পৰা হোৱা ধাৰাসাৰ বৰষুণত জলমগ্ন হৈ পৰে গুৱাহাটী মহানগৰী (Guwahati landslide)। এই বৰষুণৰ ফলত মহানগৰৰ বিভিন্ন ঠাইত কৃত্ৰিম বানৰ (artificial floods) সৃষ্টি হোৱাৰ লগতে জনসাধাৰণে দুৰ্ভোগ ভুগিবলগা হয়। ইয়াৰ মাজতে সংঘটিত হয় দুটা ভয়ানক ভূমিস্খলনৰ ঘটনা। মহানগৰীৰৰ মঠঘৰীয়াত হোৱা ভূমিস্খলনত একেটা পৰিয়ালৰে তিনিজনকৈ লোকে দুখজনকভাৱে মৃত্যুক সাৱটি ল’বলগা হয়। পুৱা প্ৰায় ৮ বজাত মঠঘৰীয়াৰ লক্ষ্মী মন্দিৰ অঞ্চলত হোৱা ভূমিস্খলনত নগেন ৰাজবংশী, তেওঁৰ পত্নী মীনা ৰাজবংশী আৰু কন্য়া চুনু ৰাজবংশীৰ মৃত্য়ু হয়। আনহাতে, পৰিয়ালটোৰ একমাত্ৰ পুত্ৰ বিপ্লৱ ৰাজবংশী কথমপি ৰক্ষা পৰে। স্থানীয় ৰাইজে তেওঁক বোকামাটিৰ তলৰ পৰা উদ্ধাৰ কৰি জিএমচিএইচলৈ প্ৰেৰণ কৰে।
আনহাতে, সাতগাঁৱৰ তালতলাত সংঘটিত আন এক ভূমিস্খলনৰ ঘটনাত পাহাৰৰ পৰা প্ৰকাণ্ড শিল বাগৰি পি সুমিত্ৰা নামৰ এগৰাকী মহিলাৰ মৃত্যু হয়।
