অসমকে (Assam) ধৰি সীমান্তৱৰ্তী আঠখন ৰাজ্যত (Eight border states) নাগৰিকত্ব সংশোধনী আইন (Citizenship Amendment Act)ৰ সৈতে জড়িত আবেদন (Related application)সমূহ জিলা আয়ুক্তই নিষ্পত্তি (District Commissioner will handle) কৰিব। এতিয়ালৈকে এই আবেদনসমূহ লোকপিয়ল ব্যুৰো, চোৰাংচোৱা ব্যুৰো, ডাক বিভাগকে ধৰি বিভিন্ন কেন্দ্ৰীয় চৰকাৰী বিষয়াৰে গঠিত বিশেষভাৱে ক্ষমতাপ্ৰাপ্ত সমিতিসমূহে নিষ্পত্তি কৰিছিল। ‘দ্য হিন্দু’ৰ মতে, এইবাৰ সেই ক্ষমতা জিলা আয়ুক্তৰ হাতত অৰ্পণ কৰা হৈছে।
অসমকে ধৰি যি আঠখন ৰাজ্যৰ বাবে এই নিয়ম জাৰি কৰা হৈছে, সেই আটাইকেইখন ৰাজ্যৰ সীমা বাংলাদেশ বা পাকিস্তানৰ সৈতে আছে৷ এই তালিকাত আছে অসম আৰু ত্ৰিপুৰা (দুয়োখন ৰাজ্যৰ জনজাতীয় অঞ্চলত প্ৰযোজ্য নহ’ব এই নতুন নিয়ম)।
আনহাতে, পশ্চিমবংগ, গুজৰাট, ৰাজস্থান, পঞ্জাব, জম্মু-কাশ্মীৰ আৰু লাডাখতো এই নতুন নিয়ম কার্যকৰী কৰা হৈছে৷ বুধবাৰে অমিত শ্বাহৰ মন্ত্ৰালয়ে এই সন্দৰ্ভত গাইডলাইন জাৰি কৰে।
এই আঠখন ৰাজ্য আৰু কেন্দ্ৰীয়শাসিত অঞ্চলৰ বিশেষ ক্ষমতাপ্ৰাপ্ত সমিতি আৰু জিলা পৰ্যায়ৰ সমিতিৰ দ্বাৰা বিবেচনাধীন সকলো আবেদন জিলা দণ্ডাধীশৰ হাতত অৰ্পণ কৰা হৈছে বুলি গৃহ মন্ত্ৰালয়ে জানিবলৈ দিয়ে। নতুন নিয়ম অনুসৰি, জিলা দণ্ডাধীশসকলে যিকোনো আবেদনকাৰীৰ নথি-পত্ৰ পৰীক্ষা কৰি প্ৰয়োজনীয় তদন্ত কৰিব পাৰিব। আবেদনকাৰীয়ে যোগ্যতাৰ মাপকাঠী পূৰণ কৰিছেনে নাই সেই বিষয়েও জিলা আয়ুক্তই সিদ্ধান্ত ল’ব। যদি এই তথ্যত সন্তুষ্ট হয় তেন্তে তেওঁ আবেদনকাৰীক নাগৰিকত্ব প্ৰদান কৰিব পাৰে।
