কেন্দ্ৰীয় স্বাস্থ্য বীমা আঁচনি (Central Health Insurance Scheme) প্ৰধানমন্ত্ৰী জন আৰোগ্য যোজনা (Pradhan Mantri Jan Arogya Yojana) বা আয়ুষ্মান ভাৰত (Ayushman Bharat)ত সংঘটিত অনিয়মৰ অভিযোগ (Complaint of irregularities)ত তালিকাৰ পৰা দেশৰ ২,৩৫৯ খন চিকিৎসালয় বাদ পৰিছে। আনহাতে, ১২০০খন চিকিৎসালয়ক নিলম্বন (1200 hospitals suspended) কৰা হৈছে। কেন্দ্ৰীয় স্বাস্থ্য মন্ত্ৰী জে পি নাড্ডা (Health Minister JP Nadda)ই শেহতীয়াকৈ লোকসভাত লিখিত উত্তৰত এই কথা উল্লেখ কৰিছে যে কেন্দ্ৰীয় স্বাস্থ্য বীমাত অন্তৰ্ভুক্ত এই চিকিৎসালয়সমূহৰ বিৰুদ্ধে উপযুক্ত নিয়ম পালন নকৰাৰ অভিযোগ উত্থাপন হোৱাৰ পিছতে এই পদক্ষেপ গ্ৰহণ কৰা হৈছে।
আয়ুষ্মান ভাৰতৰ নিয়ম উলংঘা কৰা চিকিৎসালয়ৰ বিৰুদ্ধে ২৯খন এফআইআৰ দাখিল কৰিছে কেন্দ্ৰই। কেৱল সেয়াই নহয়, অভিযুক্ত চিকিৎসালয়সমূহক ৩২৮.৪৯ কোটি টকাৰ জৰিমনাও বিহা হৈছে। এই স্বাস্থ্য বীমাত যাতে প্ৰতাৰণা আৰু চিকিৎসালয়সমূহে চিকিৎসাৰ বাবে অবৈধ বিল সৃষ্টি নকৰে তাৰ বাবে এনে পদক্ষেপ গ্ৰহণ কৰা হৈছে। কেন্দ্ৰৰ এই পদক্ষেপৰ ফলস্বৰূপে সেই চিকিৎসালয়সমূহে সম্প্ৰতি আয়ুষ্মান ভাৰতৰ অধীনত ‘নগদবিহীন’ চিকিৎসাৰ সুযোগ লাভ কৰিব নোৱাৰিব। গতিকে এই কেন্দ্ৰীয় স্বাস্থ্য বীমা আঁচনিৰ সুবিধা ল’বলৈ বৰ্তমানৰ চিকিৎসালয়ৰ তালিকাখন পৰীক্ষা কৰাৰ পৰামৰ্শ দিয়া হৈছে। এই বীমা আঁচনিৰ দুৰ্নীতি ৰোধৰ বাবে প্ৰযুক্তিৰ সহায় লৈছে ৰাষ্ট্ৰীয় স্বাস্থ্য প্ৰাধিকৰণে।
কেন্দ্ৰীয় স্বাস্থ্য মন্ত্ৰীগৰাকীয়ে লগতে কয় যে যিকোনো ভুৱা দাবী চিনাক্ত কৰিবলৈ কৃত্ৰিম বুদ্ধিমত্তা আৰু মেচিন লাৰ্নিং প্ৰযুক্তি ব্যৱহাৰ কৰা হৈছে। ভুৱা বিল, একেটা দাবীৰ পুনৰাবৃত্তি (ডুপ্লিকেট দাবী), ভুৱা পৰিচয় ব্যৱহাৰ কৰি এই আঁচনিৰ সুবিধা লোৱাৰ দৰে জালিয়াতি আৰু দুৰ্নীতি ধৰিবলৈ প্ৰযুক্তিৰ ব্যৱহাৰ কৰা হৈছে। কেন্দ্ৰৰ দাবী যে এনে ব্যৱস্থাৰ জৰিয়তে চিকিৎসালয় এখনে ধন দাবী কৰাৰ ২৪ ঘণ্টাৰ ভিতৰত জালিয়াতি চিনাক্ত কৰা সম্ভৱ। সেই ধন পৰিশোধ কৰাৰ আগতেই এনে ভুৱা দাবী বন্ধ কৰি দিয়া হৈছে। এনে প্ৰযুক্তিৰ সহায়ত ২০২৬ চনৰ ৩১ জুলাইলৈকে ৬৭৬.১৬ কোটি টকাৰ আৰ্থিক লোকচান ৰোধ কৰা সম্ভৱ হৈছে বুলি কেন্দ্ৰই প্ৰকাশ কৰিছে।
উল্লেখযোগ্য যে কেন্দ্ৰই ২০১৮ চনত নৰেন্দ্ৰ মোদীৰ কাৰ্যকালত এই স্বাস্থ্য বীমা আঁচনি আৰম্ভ কৰিছিল। এই আঁচনিৰ অধীনত কেন্দ্ৰই হিতাধিকাৰী পৰিয়ালক বছৰি ৫ লাখ টকা পৰ্যন্ত বিনামূলীয়া স্বাস্থ্য সেৱা আগবঢ়ায়। এন এইচ এৰ পৰ্টেলৰ তথ্য অনুসৰি, ২০২৬ চনৰ ৮ আগষ্টলৈকে এই আঁচনিৰ অধীনত ৩৪,৪৩৭ খন চিকিৎসালয় তালিকাভুক্ত কৰা হৈছে। ইয়াৰ ভিতৰত ২০,৩৬৩ খন চৰকাৰী চিকিৎসালয় আৰু ১৮,০৭৪ খন ব্যক্তিগত চিকিৎসালয় আছে।
