আজিৰে পৰা সুলভ মূল্যৰ দোকানত লাভ কৰিব দাইল আৰু চেনি। ৰাজ্যৰ ৰেচন কাৰ্ডধাৰী (Ration card holder) ৭০ লক্ষাধিক হিতাধিকাৰী (Over 7 million beneficiaries) পৰিয়ালে মাহিলি লাভ কৰা বিনামূলীয়া ৰেচন (Free ration)ৰ লগতে ১ কিলোগ্ৰামকৈ মচুৰ দাইল আৰু চেনিও লাভ কৰিব। অৱশ্যে ইয়াৰ বাবদ পৰিশোধ কৰিব লাগিব ন্যূনতম ১০০ টকা। অৱশ্যে বিধানসভা নিৰ্বাচনৰ পূৰ্বে হিতাধিকাৰীসকলে দাইল আৰু চেনি লাভ কৰিছিল যদিও নিৰ্বাচনৰ বাবে তিনিমাহ বন্ধ হৈ আছিল। আনহাতে, ১০ আগষ্টৰ পৰা পুনৰ ১০০ টকা মূল্যত দাইল আৰু চেনি হিতাধিকাৰীসকলে লাভ কৰিব। এই উপলক্ষে মুখ্যমন্ত্ৰী হিমন্ত বিশ্ব শৰ্মাই সোমবাৰে ৰহাৰ সুৰেন পাটৰ নামৰ সুলভ মূল্যৰ সামগ্ৰী বিক্ৰেতাজনৰ দোকানৰ পৰাই এই বিতৰণ কাৰ্যসূচী আনুষ্ঠানিকভাৱে উদ্বোধন কৰে।
আঁচনি উদ্বোধন কৰি ৰাইজক উদ্দেশ্যি দিয়া ভাষণত মুখ্যমন্ত্ৰীয়ে কয় যে অসম চৰকাৰে নিৰ্বাচনৰ পূৰ্বে বিভিন্ন আঁচনি আৰম্ভ কৰিছিল। ইয়াৰে বহুকেইখন আঁচনিয়ে পাঁচবছৰ সম্পূৰ্ণ কৰিছে যদিও নিৰ্বাচনৰ পাছত বাজেট অধিৱেশন অনুষ্ঠিত নোহোৱাৰ ফলত কেইখনমান আঁচনি বন্ধ হৈ পৰিছিল৷ ইয়াৰ পূৰ্বে ৰাইজক জনাইছিলোঁ যে জুলাই মাহত বাজেট অধিৱেশন অনুষ্ঠিত হোৱাৰ পিছত আগষ্ট মাহৰ পৰা এই আঁচনিসমূহ পুনৰ আৰম্ভ কৰা হ’ব।
ইয়াৰে অংশ হিচাপে ১ আগষ্টত অৰুণোদয় আঁচনি, ৬ আগষ্টত নিযুত মইনা আৰু নিযুত বাবু আঁচনি আৰম্ভ কৰাৰ পিছত আজি ৰহা সমষ্টিৰ পৰা সুলভ মূল্য মচুৰ দাইল আৰু চেনি বিতৰণ কাৰ্যসূচী আৰম্ভ কৰা হৈছে। অৱশ্যে কাৰিকৰী অসুবিধাৰ বাবে নিমখ দিব পৰা নাই যদিও অতি সোনকালে নিমখো লাভ কৰিব বুলি তেওঁ উল্লেখ কৰে। তেওঁ লগতে কয় যে এতিয়াৰে পৰা প্ৰতি মাহৰ ১-১০ তাৰিখৰ ভিতৰত যি অন্ন সেৱা সপ্তাহ পালন কৰা হয় তাত বিনামূলীয়া চাউল, দাইল আৰু চেনি কিনিব পাৰিব৷ আৰু অতি সোনকালে প্ৰতিশ্ৰুতি অনুসৰি মিঠাতেল আৰু নিমখৰ উপৰি অৰুণোদয় আঁচনিত বাদ পৰাসকলক অন্তৰ্ভুক্ত কৰাৰ চেষ্টা কৰা হ’ব বুলি মুখ্যমন্ত্ৰীয়ে কয়।
উল্লেখযোগ্য যে মুখ্যমন্ত্ৰীয়ে উল্লেখ কৰা অনুসৰি, বিনামূলীয়া চাউল, সুলভ মূল্যৰ দাইল আৰু চেনি আঁচনিয়ে অসমৰ প্ৰায় ৭০ লাখ পৰিয়ালক সামৰি লয়। আনহাতে, ইয়াৰ দ্বাৰা ২ কোটি ৪৮ লাখ ১১ হাজাৰ ৬৪৫ গৰাকী ব্যক্তি উপকৃত হয়।
