ডিমা হাছাও স্বায়ত্তশাসিত পৰিষদ (Dima Hasao Autonomous Council)ৰ ২০২৬-২৭ বিত্তীয় বৰ্ষ (Financial year 2026-27)ৰ বাজেট অধিৱেশন (Budget Session) মঙলবাৰে এদিনীয়ে কাৰ্যসূচীৰে অনুষ্ঠিত হয়৷ পাহাৰীয়া জিলাখনৰ উন্নয়নমূলক আঁচনিৰ বাবে ২০২৬-২৭ বিত্তীয় বৰ্ষৰ বাবে মুঠ ১,২৩২ কোটি টকা (₹1,232 crore)ৰ বাজেট নিৰ্ধাৰণ (Budget setting) কৰা হয়৷ এই বিশেষ অধিৱেশনত পৰিষদৰ বিত্ত বিভাগৰ দায়িত্বত থকা কাৰ্যবাহী সদস্য ডনপাইনন থাওছেনে বাজেট দাখিল কৰি আয়-ব্যয়ৰ বিস্তৃত বিত্তীয় পৰিকল্পনা উপস্থাপন কৰে। আনহাতে, অধ্যক্ষ মোহিত হোজাইৰ অধ্যক্ষতাত অনুষ্ঠিত বাজেট অধিৱেশনত পৰিষদৰ সকলো সদস্যই এই বাজেট আবণ্টনক সমৰ্থন জনায়।
বাজেট ভাষণত ডনপাইনন থাওছেনে কয় যে অসম চৰকাৰে আগবঢ়োৱা সহযোগিতাৰ বাবে পৰিষদৰ আৰ্থিক ব্যৱস্থা অধিক শক্তিশালী হোৱাৰ লগতে পৰিষদৰ ক্ষমতাও যথেষ্ট বৃদ্ধি পাইছে। উত্থাপন কৰা মুঠ বাজেটৰ ৮৮৯ কোটি টকা ৰাজ্যিক অগ্ৰাধিকাৰ উন্নয়ন আঁচনিৰ অধীনত সাধাৰণ খণ্ডৰ কৰ্মচাৰীৰ দৰমহা, বিভিন্ন উন্নয়নমূলক কাম-কাজ আৰু উন্নয়ন পুঁজিৰ বাবে ধাৰ্য কৰা হৈছে। আনহাতে, এমএচি এলেকা উন্নয়ন পুঁজি নামেৰে এক নতুন আঁচনি আৰম্ভ কৰি তাত ৩০ কোটি টকা আবণ্টন কৰা হৈছে।
উল্লেখ্য যে প্ৰতিষ্ঠানগত ব্যয়ৰ অধীনত পৰিষদে ২৩২ কোটি টকা সংৰক্ষণ কৰি ৰাখিছে। এই টকাৰে পৰিষদৰ কৰ্মচাৰীসকলৰ বকেয়া দৰমহা, গ্ৰেচুইটি আৰু প্ৰথম আৰু দ্বিতীয় শ্ৰেণীৰ বিষয়াসকলৰ দৰমহা পৰিশোধ কৰা হ’ব।
অধিৱেশনৰ অন্তত সংবাদ মাধ্যমৰ আগত মুখ্য কাৰ্যবাহী সদস্য দেৱলাল গৰ্লোছাই কয় যে অঞ্চলটোৰ সামগ্ৰিক কল্যাণ আৰু উন্নয়নৰ স্বাৰ্থত এই পুঁজিৰ যাতে সঠিক ব্যৱহাৰ হয় সেইটো নিশ্চিত কৰা হ’ব। কৰ, ভূমি ৰাজহ আৰু বনজ সম্পদৰ পৰা আয় বৃদ্ধিৰ ক্ষেত্ৰত পৰিষদে বিশেষ পদক্ষেপ গ্ৰহণ কৰিব বুলি উল্লেখ কৰাৰ লগতে যুৱ সবলীকৰণৰ ক্ষেত্ৰত বিশেষভাৱে শিক্ষা, ক্ৰীড়া আৰু পৰ্যটন খণ্ডত অগ্ৰাধিকাৰ দিব বুলিও তেওঁ উল্লেখ কৰে৷
