মধ্যপ্ৰদেশৰ ভোজশালা (Madhya Pradesh Bhojshala) চৌহদত নহয়, তাৰ কাষতে নামাজ আদায় (Praying Namaz nearby) কৰিব পাৰিব মুছলমানসকলে। মধ্যপ্ৰদেশ চৰকাৰে নামাজ পঢ়াৰ বাবে খালী ঠাইৰ ব্যৱস্থা কৰিব লাগিব। এই নিৰ্দেশ মঙলবাৰে উচ্চতম ন্যায়ালয়ৰ মুখ্য ন্যায়াধীশৰ বিচাৰপীঠে দিয়ে। বৰ্তমান সেই খালী ঠাইত প্ৰতি শুকুৰবাৰে দুপৰীয়া ১ বজাৰ পৰা ৩ বজালৈ নামাজ পঢ়িব পাৰিব। যোৱা মে’ মাহত মধ্যপ্ৰদেশ উচ্চ ন্যায়ালয়ে ভোজশালা চৌহদৰ বিতৰ্কিত অংশটোক মন্দিৰ হিচাপে ঘোষণা কৰিছিল। মন্দিৰ ঘোষণাৰ পূৰ্বে মুছলমানসকলে প্ৰতি শুকুৰবাৰে ভোজশালা চৌহদত নামাজ আদায় কৰিব পাৰিছিল। সেই স্থিতি পুনৰ ঘূৰাই আনিবলৈ অৰ্থাৎ ভোজশালা চৌহদত পুনৰ প্ৰাৰ্থনা কৰিবলৈ অনুমতি দিবলৈ উচ্চতম ন্যায়ালয়ত আবেদন দাখিল কৰা হৈছিল। কিন্তু মঙলবাৰে উচ্চতম ন্যায়ালয়ৰ মুখ্য ন্যায়াধীশ সূৰ্য কান্ত, ন্যায়াধীশ জয়মাল্য বাগচি আৰু ন্যায়াধীশ ভি মোহনৰ বিচাৰপীঠে এই আবেদন খাৰিজ কৰে।
ভোজশালা চৌহদৰ সমীপত নামাজ পঢ়াৰ বিষয়টো অস্থায়ী ব্যৱস্থা বুলি উচ্চতম ন্যায়ালয়ে প্ৰকাশ কৰিছে। এই অস্থায়ী ব্যৱস্থা গোচৰৰ চূড়ান্ত নিষ্পত্তি নোহোৱালৈকে চলি থাকিব বুলি জনোৱা হৈছে। উচ্চতম ন্যায়ালয়ে ভাৰতীয় প্ৰত্নতাত্ত্বিক জৰীপক অৱগত কৰিছে যে আদালতৰ অনুমতি অবিহনে ভোজশালা চৌহদত কোনো ধৰণৰ গাঁথনিগত পৰিৱৰ্তন কৰিব নোৱাৰিব।
ভোজশালা চৌহদ সন্দৰ্ভত হিন্দু আৰু মুছলমান দুয়োটা দলকে ধৈৰ্য ধৰিবলৈ আবেদন জনাইছে শীৰ্ষ আদালতে। বিষয়টোৰ সংবেদনশীলতাৰ কথা মনত ৰাখি সতৰ্কতাৰে আগবাঢ়িব বিচাৰিছে বুলি উচ্চতম ন্যায়ালয়ে প্ৰকাশ কৰিছে।
মধ্যপ্ৰদেশৰ ধৰ চহৰৰ প্ৰায় হাজাৰ বছৰীয়া কমল মৌলানা দৰগাহ আৰু মছজিদ দীৰ্ঘদিন ধৰি বিতৰ্কৰ কেন্দ্ৰবিন্দু হৈ আহিছে। হিন্দুত্ববাদী কৰ্মীসকলে দাবী কৰে যে এই স্মৃতিসৌধটো আচলতে ৰাজা ভোজে নিৰ্মাণ কৰা প্ৰাচীন সৰস্বতী মন্দিৰ। ভাৰতীয় প্ৰত্নতাত্ত্বিক জৰীপে মধ্যপ্ৰদেশ উচ্চ ন্যায়ালয়ৰ নিৰ্দেশত বিবাদিত অঞ্চলটোৰ ‘বৈজ্ঞানিক জৰীপ’ চলায়। মে’ মাহত উচ্চ ন্যায়ালয়ে কয় যে বিভিন্ন প্ৰমাণ বিশ্লেষণ কৰি এই স্থানত হিন্দু পূজাৰ ধাৰাবাহিকতা কেতিয়াও নিৰ্বাপিত হোৱা নাই বুলি ধৰা পৰিছে। ঐতিহাসিক সাহিত্যয়ো প্ৰমাণ কৰে যে বিবাদিত অঞ্চলটোত ৰাজা ভোজৰ সংস্কৃত শিক্ষণ কেন্দ্ৰ আছিল। যাৰ বাবে অঞ্চলটোক মন্দিৰ হিচাপে ঘোষণা কৰা হৈছে।
মধ্যপ্ৰদেশ উচ্চ ন্যায়ালয়ৰ এই নিৰ্দেশৰ বিৰুদ্ধে উচ্চতম ন্যায়ালয়তো গোচৰ ৰুজু কৰা হৈছে। অৱশ্যে এই বিষয়টো এতিয়াও শীৰ্ষ আদালতত বিচাৰাধীন হৈ আছে।
