মহাৰাষ্ট্ৰত (Maharashtra) সংঘটিত হৈছে এক বৃহৎ গাখীৰ কেলেংকাৰী (Milk adulterated Milk)। ৰাজ্যখনৰ ধৰাশিৱ জিলাৰ ভুম অঞ্চলত ডিটাৰজেণ্ট, পাম অইল আনকি অতি নিম্নমানৰ ৰাসায়নিক পদাৰ্থ মিহলাই ২.৩ কোটি লিটাৰ ভেজাল গাখীৰ তৈয়াৰ কৰাৰ অভিযোগ উত্থাপন হৈছে। তদন্তকাৰীয়ে এই বিপুল পৰিমাণৰ গাখীৰ বিভিন্ন স্থানলৈ বিক্ৰীৰ বাবে যোগান ধৰা বুলিও জানিব পাৰিছে। এই ঘটনাত ৭ জন লোকৰ বিৰুদ্ধে গোচৰ ৰুজু কৰা হৈছে। অৱশ্যে এতিয়ালৈকে কোনো অভিযুক্তক গ্ৰেপ্তাৰ কৰা হোৱা নাই। তেওঁলোকক গ্ৰেপ্তাৰ কৰিবলৈ আৰক্ষী পৰিদৰ্শকৰ নেতৃত্বত বিশেষ তদন্তকাৰী দল বা এছআইটি গঠন কৰা হৈছে।
শেহতীয়াকৈ আৰক্ষী আৰু ৰাজ্যখনৰ খাদ্য আৰু ঔষধ বিভাগে এক গোপন সূত্ৰৰ ভিত্তিত মহাৰাষ্ট্ৰৰ ধৰাশিৱ জিলাৰ ভুম অঞ্চলত অভিযান চলায়। ভেজাল গাখীৰৰ বিষয়টো যৌথ তদন্তত পোহৰলৈ আহে। তদন্তত ধৰা পৰা তথ্যই তদন্তকাৰীক স্তম্ভিত কৰি তুলিছে। দেখা গৈছে যে অভিযুক্তই ২ লাখ ৩০ হাজাৰ কেজি নিম্নমানৰ গুড়ি গাখীৰ ব্যৱহাৰ কৰি ২৩ লাখ লিটাৰতকৈ অধিক কৃত্ৰিম গাখীৰ তৈয়াৰ কৰিছিল। এই কৃত্ৰিম গাখীৰ প্ৰকৃত গাখীৰৰ লগত মিহলাই মিশ্ৰিত গাখীৰ তৈয়াৰ কৰা হৈছিল। ১০ লিটাৰ প্ৰকৃত গাখীৰৰ লগত ১০ লিটাৰ ভেজাল গাখীৰ মিহলাই দিয়া হৈছিল।
তদন্তত এই কৃত্ৰিম গাখীৰ ডিটাৰজেণ্ট পাউডাৰ, পাম অইল আৰু অতি নিম্নমানৰ ৰাসায়নিক পদাৰ্থ মিহলাই তৈয়াৰ কৰা বুলিও জানিব পৰা গৈছে। কৃত্ৰিম গাখীৰৰ লগত প্ৰকৃত গাখীৰ মিহলাই এনেদৰে তৈয়াৰ কৰা হৈছিল যাতে এই দুৰ্নীতি ক্ৰেতাৰ দৃষ্টিগোচৰ নহয়। সেইবাবেই গাখীৰৰ ৰং আৰু চৰ্বিৰ পৰিমাণ ‘আচল’ গাখীৰৰ দৰেই ৰখাৰ প্ৰচেষ্টা চলোৱা হৈছিল। জানিব পৰা মতে, প্ৰায় ৯.৫ কোটি টকাৰ গাখীৰ এনেদৰে তৈয়াৰ কৰা হৈছিল। চিকিৎসকৰ মতে, ডিটাৰজেণ্ট আৰু ৰাসায়নিক দ্ৰব্যৰ সৈতে মিহলি গাখীৰ খালে যিকোনো ব্যক্তিৰ বৃক্ক আৰু যকৃত সম্পূৰ্ণৰূপে ক্ষতিগ্ৰস্ত হ’ব পাৰে। আনকি বিপাকীয় তন্ত্ৰও সম্পূৰ্ণৰূপে ধ্বংস হ’ব পাৰে। এনে ভেজাল গাখীৰ সেৱন কৰিলে শিশু, বৃদ্ধ আৰু গৰ্ভৱতী মহিলাৰ মৃত্যুও হ’ব পাৰে বুলি চিকিৎসকে আশংকা কৰে।
দেশৰ খাদ্য সুৰক্ষা আইনত এনে ভেজাল গাখীৰ তৈয়াৰ কৰা অপৰাধৰ বাবে কঠোৰ শাস্তি নিৰ্ধাৰণ কৰা হৈছে। এনে ক্ষেত্ৰত দোষীক যাৱজ্জীৱন কাৰাদণ্ড আৰু ১০ লাখ টকা পৰ্যন্ত জৰিমনা বিহা হ’ব পাৰে। ঘটনাৰ তদন্তৰ অন্তত আৰক্ষীয়ে গাখীৰ প্ৰস্তুত কৰা কাৰখানাটোৰ পৰা ৬১ বেগ মিশ্ৰিত গুড়ি গাখীৰ উদ্ধাৰ কৰিছে। প্ৰাৰম্ভিক তদন্তত প্ৰকাশ পাইছে যে এই গাখীৰ দুৰ্নীতিৰ মূল মাষ্টাৰমাইণ্ড হৈছে বালাচাহেব গৰ্জ। তেওঁ বিভিন্ন দুগ্ধ গোটত ভেজাল গুড়ি গাখীৰ যোগান ধৰি ভেজাল তৰল গাখীৰ তৈয়াৰ কৰিছিল। আৰক্ষীৰ মতে, উক্ত অঞ্চলৰ বিভিন্ন গাখীৰ সংগ্ৰহ কেন্দ্ৰ এই চক্ৰৰ সৈতে জড়িত। প্ৰতিদিনে মহাৰাষ্ট্ৰৰ ভুম অঞ্চলৰ পৰা কেইবা লিটাৰ গাখীৰ ৰাজ্যৰ বিভিন্ন প্ৰান্তলৈ ৰপ্তানি কৰা হয়। এই গাখীৰ প্ৰধানকৈ খীৰ বনাবলৈ ব্যৱহাৰ কৰা হয়।
