ৰে’লৱেৰ ভূমি বেদখল সন্দৰ্ভত দেশৰ সামগ্ৰিক ছবিখন পোহৰলৈ আহিছে। তথ্যৰ অধিকাৰ আইনৰ অধীনত কৰা এক অনুৰোধৰ প্ৰতি সঁহাৰি জনাই বিগত পাঁচ বছৰত দেশত ৰে’লৱেৰ (Indian Railway) ভূমি কিমান হাৰত বেদখল হৈছে তাৰ পৰিসংখ্যা পোহৰলৈ আহিছে। ২০২৪-২৫ চনলৈকে দেশত ১০০০ হেক্টৰতকৈ অধিক ৰে’ল ভূমি (এক হেক্টৰ প্ৰায় ডেৰ-দুই একৰৰ সমান) বেদখল কৰা হৈছে।
শেহতীয়াকৈ তথ্য জনাৰ অধিকাৰ আইনৰ অধীনত ৰে’লৱে ব’ৰ্ডক এক অনুৰোধ দাখিল কৰা হৈছিল। ‘ইণ্ডিয়া টুডে’ৰ উক্ত আবেদনত বিগত ২৫ বছৰত ৰে’লৱেৰ ভূমি বেদখলৰ সামগ্ৰিক ছবিখন বিচৰা হৈছিল। কিন্তু ৰে’লৱে ব’ৰ্ডৰ উত্তৰত বিগত পাঁচ বছৰৰ এটা পৰিসংখ্যা পোহৰলৈ আহিছে। আৰ টি আইৰ তথ্য অনুসৰি, ২০২৫ চনৰ মাৰ্চ পৰ্যন্ত ১০৬৮.৫৪ হেক্টৰ ৰে’ল ভূমি বেদখল কৰা হৈছে। আনহাতে, কেন্দ্ৰই সংসদক অৱগত কৰিছে যে বিগত পাঁচ বছৰত প্ৰায় ৯৮.০২ হেক্টৰ ৰে’ল ভূমি অবৈধ দখলৰ পৰা মুক্ত হৈছে।
আৰ টি আইত প্ৰকাশ পোৱাৰ দৰে বিগত পাঁচ বছৰৰ ভূমি বেদখলৰ পৰিসংখ্যাই দেখুৱাইছে যে ভূমি বেদখল ৰে’লৱেৰ বাবে এক প্ৰত্যাহ্বান। বিগত পাঁচ বছৰত ৰে’লৱেৰ ভূমি বেদখল প্ৰায় ৩২ শতাংশ বৃদ্ধি পাইছে। ২০২০-২১ চনত ৰে’লৱেৰ ৮১০.৩১ হেক্টৰ মাটি বেদখল কৰা হৈছিল। ইয়াৰ পিছৰ বছৰ ২০২১-২২ চনত সামান্য হ্ৰাস পাই ৭৮২.৮১ হেক্টৰ হয়। পিছৰ বছৰবোৰত পুনৰ বৃদ্ধি পায়। ২০২২-২৩ চনত ৰে’লৱেৰ ৮০০ হেক্টৰৰো অধিক মাটি বেদখল কৰা হয়। পিছৰ বছৰত ই হাজাৰ হেক্টৰতকৈও অধিক বৃদ্ধি পালে।
২০২৩-২৪ চনত ১০৭৮.৫৫ হেক্টৰ মাটি অবৈধভাৱে দখল কৰা হয়। সেই এটা বছৰত প্ৰায় ২৬৮ হেক্টৰ মাটি বেদখল কৰা হৈছে। ইয়াৰ পিছৰ বছৰ ২০২৪-২৫ চনত বেদখল কৰা মাটিৰ পৰিমাণ সামান্য হ্ৰাস পাই ১০৬৮.৫৪ হেক্টৰ হয়। চৰকাৰী হিচাপ অনুসৰি, যোৱা বছৰৰ ১ এপ্ৰিল পৰ্যন্ত ৰে’লৱেৰ প্ৰায় ৪.৯৯ লাখ হেক্টৰ মাটি আছিল। ইয়াৰে ০.২১ শতাংশ (প্ৰায় ১,০৬৮ হেক্টৰ) আন লোকে দখল কৰিছে।
প্ৰথম দৃষ্টিত এই সংখ্যাটো সৰু যেন লাগিব পাৰে। কিন্তু এই পৰিমাণৰ মাটিত গুজৰাটৰ প্ৰায় ৪২ খন নৰেন্দ্ৰ মোদী ষ্টেডিয়াম (দৰ্শকৰ হিচাপত বিশ্বৰ সৰ্ববৃহৎ ক্ৰিকেট ষ্টেডিয়াম, যিখন ২৫.৫ হেক্টৰ এলেকাত বিস্তৃত) হ’ব পাৰে। কিন্তু এই বেদখল ভূমি মুক্ত কৰাৰ কামে বিশেষ গতি লাভ কৰা নাই। পাঁচ বছৰত মাত্ৰ ৯৮.০২ হেক্টৰ ৰে’লৰ ভূমিহে বেদখলমুক্ত কৰিবলৈ সক্ষম হৈছে।
