নীটৰ প্ৰশ্নকাকত ফাদিলক লৈ কেন্দ্ৰৰ মৌনতাৰ বাবে দিল্লীৰ যন্তৰ-মন্তৰত শিক্ষাবিদ তথা সমাজকৰ্মী সোণম ৱাংচুকে (Sonam Wangshuk) অনশন আৰম্ভ কৰে। মঙলবাৰে অনশনে সপ্তদশ দিনত প্ৰৱেশ কৰে। অবিৰত অনশনৰ বাবে তেওঁৰ শৰীৰ ভাঙি পৰিছে। তেওঁৰ ওজনো দিনক দিনে কমি আহিছে।
অনশন আৰম্ভ হোৱাৰ পৰাই সোণম ৱাংচুকৰ ওজন কমিছে ৮.২ কিলোগ্ৰাম। এই কথা সোমবাৰে ঘোষণা কৰে ‘ককৰোচ জনতা পাৰ্টী’য়ে। তেওঁলোকে কয় যে সোণমৰ তেজৰ গ্লুক’জৰ মাত্ৰা প্ৰতি ডেচিলিটাৰত ৬৭ মিলিগ্ৰামলৈ হ্ৰাস পাইছে। অৱশ্যে এতিয়াও তেওঁ অনশন অব্যাহত ৰাখিব বিচাৰিছে।
নীট বিতৰ্কক লৈ কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত যোৱা ২০ জুনৰ পৰা ককৰোচ দলে যন্তৰ-মন্তৰত প্ৰতিবাদ সাব্যস্ত কৰি আহিছে। এই আন্দোলনত সোণমে আৰম্ভণিৰে পৰাই তেওঁলোকক সমৰ্থন জনাই আহিছে। পিছত ২৭ জুনৰ ভিতৰত কেন্দ্রীয় চৰকাৰে কোনো প্রতিক্রিয়া নিদিলে অনশনত বহিব বুলি ঘোষণা কৰে৷
লাডাখৰ এইগৰাকী সমাজকৰ্মীয়ে কেন্দ্ৰৰ পৰা কোনো আশানুৰূপ সঁহাৰি নোপোৱাত ২৮ জুনত অনশন আৰম্ভ কৰিছিল। অনশন আৰম্ভ হোৱাৰ পিছৰে পৰা নিয়মীয়াকৈ সোণমৰ স্বাস্থ্য পৰীক্ষা কৰা হৈছে। তেওঁৰ স্বাস্থ্য সম্পৰ্কীয় তথ্যও প্ৰদান কৰা হৈছে। সোমবাৰে ককৰোচ দলে দিয়া তথ্য অনুসৰি, সোণমৰ ৰক্তচাপ ১০৭/৭০।
দলটোৰ প্ৰতিষ্ঠাপক অভিজিৎ দীপকেয়ে এক্স পোষ্টত লিখিছে, “সোণম ৱাংচুকৰ অনশনৰ ১৬ সংখ্যক দিন। চৰকাৰক অনুৰোধ কৰিছোঁ যে ইয়াক অহংকাৰৰ যুঁজলৈ ৰূপান্তৰিত নকৰিব। ইয়াত মানুহৰ জীৱনৰ কথা আছে।” তেওঁৰ মতে, “ভুল স্বীকাৰ কৰাটো দুৰ্বলতাৰ চিন নহয়। বৰঞ্চ ই ভুল শুধৰণি কৰাৰ ইচ্ছাৰ চিন। আমি কেৱল জবাবদিহিতা বিচাৰোঁ।”
আনহাতে, অনুগামীসকলক সোণমৰ বাৰ্তা, “মই গান্ধী নহয়। নায়কো নহয়। মই এজন সাধাৰণ মানুহ। নিজেই নিজৰ নায়ক হওক। নাগৰিক হিচাপে নিজৰ কৰ্তব্য পালন কৰিবলৈ চেষ্টা কৰক।” লগতে কয় যে তেওঁৰ যুঁজত সাধাৰণ মানুহক নিজৰ পক্ষত ৰাখিছে। উল্লেখযোগ্য যে ২০ জুলাইত সংসদলৈ অভিযানৰ সিদ্ধান্ত লৈছে ককৰোচ দলে ।
