প্ৰায় চাৰি দশকৰ ব্যৱধানৰ পিছত সংসদৰ উচ্চ সদনত শাসকীয় দলটোৱে পুনৰ একক সংখ্যাগৰিষ্ঠতা লাভ কৰিব পাৰে। আগন্তুক উপ-নিৰ্বাচনত যদি পশ্চিমবংগৰ ৰাজ্যসভাৰ (Rajya sabha) তিনিখন আসনত জয়ী হয় তেন্তে বিজেপিৰ সংখ্যা ১১৭ লৈ বৃদ্ধি পাব, যিটো একক সংখ্যাগৰিষ্ঠতাৰ বাবে মাত্ৰ ছয়খন আসন কম। ৰাজ্যসভাত এইটোৱেই হ’ব বিজেপিৰ সৰ্বাধিক হিচাপ। বিৰোধীয়ে প্ৰাৰ্থী প্ৰক্ষেপ নকৰাত বিজেপিৰ প্ৰাৰ্থী সুখেন্দুশেখৰ ৰায়, প্ৰকাশ চিক বৰাইক আৰু সুস্মিতা দেৱ ৰাজ্যসভালৈ পুনৰ নিৰ্বাচিত হোৱাটো কাৰ্যতঃ নিশ্চিত।
২৪৫ খন আসনৰ ৰাজ্যসভাত একক সংখ্যাগৰিষ্ঠতাৰ বাবে ১২৩ খন আসনৰ প্ৰয়োজন। যদিহে বিজেপি নেতৃত্বাধীন এন ডি এয়ে নতুনকৈ তিনিখন আসন লাভ কৰে তেন্তে দলটোৰ মুঠ আসনৰ সংখ্যা হ’ব ১৫২ খন। উল্লেখ্য যে সংবিধান সংশোধনী বিধেয়ক গৃহীত কৰিবলৈ লোকসভাৰ দৰেই ৰাজ্যসভাতো দুই তৃতীয়াংশ সংখ্যাগৰিষ্ঠতাৰ প্ৰয়োজন। অৰ্থাৎ ১৬৪ জন সাংসদৰ সমৰ্থনৰ প্ৰয়োজন। পশ্চিমবংগৰ তিনিখন আসন দখল কৰাৰ লগে লগে প্ৰধানমন্ত্ৰী নৰেন্দ্ৰ মোদীৰ চৰকাৰক সেই লক্ষ্যত উপনীত হ’বলৈ আৰু ১২ জন সাংসদৰ প্ৰয়োজন হ’ব।
উল্লেখ্য, সংসদৰ উচ্চ সদনত এটা ৰাজনৈতিক দলে অন্তিমবাৰৰ বাবে একক সংখ্যাগৰিষ্ঠতা লাভ কৰিছিল কংগ্ৰেছে ১৯৮৬ চনত তদানীন্তন প্ৰধানমন্ত্ৰী ৰাজীৱ গান্ধীৰ নেতৃত্বত। ৰাঘৱ চাদ্দাৰ নেতৃত্বত আপৰ ৭ গৰাকী সাংসদে বিজেপিত যোগদান কৰে। শেহতীয়াকৈ সমাপ্ত হোৱা ৰাজ্যসভা নিৰ্বাচনত মধ্যপ্ৰদেশত কংগ্ৰেছ প্ৰাৰ্থীৰ মনোনয়ন বাতিল আৰু ঝাৰখণ্ডত ক্ৰছ ভোটিঙৰ জৰিয়তে জয়লাভ আৰু পশ্চিমবংগৰ তিনিজন তৃণমূল সাংসদৰ পদত্যাগ আৰু দলত্যাগে এইবাৰ চাৰি দশকৰ ইতিহাসৰ পুনৰাবৃত্তি কৰাৰ সম্ভাৱনাৰ সৃষ্টি কৰিছে।
