ভাৰতীয় নৌসেনাৰ জাহাজত আক্ৰমণৰ পৰিপ্ৰেক্ষিতত এইবাৰ ভাৰত চৰকাৰে ইৰাণৰ এজন কূটনীতিবিদক তলব কৰিছে। দিল্লীত থকা ইৰাণৰ দূতাবাসৰ উপ-ৰাষ্ট্ৰদূতক বৈদেশিক পৰিক্ৰমা মন্ত্ৰালয়লৈ মাতি অনা হৈছে।
ইৰাণে মঙলবাৰে পুৱা হৰমুজ প্ৰণালীত দুখন তেল টেংকাৰলৈ ক্ষেপণাস্ত্ৰ নিক্ষেপ কৰে। এই আক্ৰমণত নিহত হয় এজন ভাৰতীয় নাৱিক। আহত হয় আৰু ৬ জন ভাৰতীয়। উক্ত আক্রমণৰ পাছতেই নৰেন্দ্র মোদী চৰকাৰে ইৰাণৰ উপ-ৰাষ্ট্রদূতক মাতি পঠিয়ায় ৷
ইৰাণে দেওবাৰেও ভাৰতীয় নৌসেনাৰ এখন জাহাজক আক্ৰমণ কৰে। জাহাজখনত আছিল ১১ জন ভাৰতীয় নাৱিক। ইয়াৰে ১০ জনক ক্ষেপণাস্ত্ৰ আক্ৰমণৰ পিছত উদ্ধাৰ কৰা হয়। উক্ত আক্ৰমণৰ লগে লগে নতুন দিল্লীয়ে এই আক্ৰমণক গৰিহণা দি এক বিবৃতি প্ৰকাশ কৰে। ভাৰত চৰকাৰে কয় যে বাণিজ্যিক জাহাজত অবিৰত আক্ৰমণ অতি উদ্বেগজনক।
অৱশ্যে আক্ৰমণৰ পিছত ইৰাণৰ কোনো দূতাবাসৰ বিষয়াক মাতি অনাৰ কোনো খবৰ প্ৰকাশ্যে অহা নাই। এই আক্ৰমণৰ দুদিন পিছত নতুন দিল্লীয়ে ভাৰতীয় নৌসেনাৰ জাহাজত পুনৰ আক্ৰমণৰ পিছত আৰু কঠোৰ কূটনৈতিক পদক্ষেপ গ্ৰহণ কৰে।
দিল্লীত থকা ইৰাণৰ দূতাবাসৰ ডেপুটী চিফ অব মিছন মহম্মদ জাভাদ হোছেইনীক মাতি পঠোৱা হয়। এই চমনৰ পৰা স্পষ্ট হৈ পৰিছে যে নতুন দিল্লী তেহৰানৰ প্ৰতি এই একেৰাহে কৰা আক্ৰমণৰ বাবে অসন্তুষ্ট। অৱশ্যে এই সন্দৰ্ভত বৈদেশিক পৰিক্ৰমা মন্ত্ৰালয়ে কোনো আনুষ্ঠানিক বিবৃতি প্ৰকাশ কৰা নাই।
মঙলবাৰে পুৱা তেহৰানে দুখন তেল টেংকাৰ মোম্বাছা আৰু আল বাহিয়াক লক্ষ্য কৰি ক্ষেপণাস্ত্ৰ নিক্ষেপ কৰে। ইউ এ ইয়ে জনোৱা মতে, আক্ৰমণৰ সময়ত জাহাজ দুখন ওমানৰ জলসীমাত আছিল। তাতেই আক্ৰমণ কৰা হয়। ইৰাণৰ আক্ৰমণত নিহত ভাৰতীয় নাৱিকজন মোম্বাছা জাহাজত আছিল। আহত ছয়জন কোনখন জাহাজত আছিল সেয়া প্ৰাথমিকভাৱে জানিব পৰা হোৱা নাই।
আক্ৰমণৰ পিছত ইৰাণৰ সেনাই এক বিবৃতিত দাবী কৰে যে জাহাজসমূহে সতৰ্কবাণীৰ পিছতো হৰমুজ প্ৰণালীৰ মাজেৰে আগবাঢ়ে। টেংকাৰ দুখনে নিজৰ নেভিগেচন ছিষ্টেম নিষ্ক্ৰিয় কৰি মাইনফিল্ডৰ মাজেৰে পাৰ হ’বলৈ চেষ্টা কৰিছিল। সেয়ে তাৰ ওপৰত আক্ৰমণ কৰি অচল কৰি তোলা হয়।
