উচ্চতম ন্যায়ালয়ে (Supreme Court) নাবালকৰ বাবে অনলাইন পৰ্ণ’গ্ৰাফিক বা অনুপযুক্ত বিষয়বস্তু নিয়ন্ত্ৰণৰ বাবে আধাৰ ভিত্তিক বয়স পৰীক্ষণ ব্যৱস্থা প্ৰৱৰ্তনৰ প্ৰস্তাৱ আগবঢ়াইছে।
বাৰ এণ্ড বেঞ্চৰ এক প্ৰতিবেদন অনুসৰি, বৃহস্পতিবাৰে মুখ্য ন্যায়াধীশ সূৰ্য কান্ত আৰু ন্যায়াধীশ জয়মাল্য বাগচিৰ বিচাৰপীঠে অনলাইন প্লেটফৰ্মত পৰ্ণ’গ্ৰাফিক কণ্টেণ্ট সহজে পোৱাৰ বাবে উদ্বেগ প্ৰকাশ কৰে। ন্যায়াধীশ বাগচিয়ে মন্তব্য কৰে যে কিতাপ, শিল্পকৰ্ম বা নিলামত পৰ্ণ’গ্ৰাফিক বিষয়বস্তুও থাকিব পাৰে আৰু ইয়াত নিয়ন্ত্ৰণ আছে।
কিন্তু যেতিয়া কোনো ব্যক্তিয়ে নিজৰ মোবাইল ফোনটো অন কৰে, তেতিয়া এনে বিষয়বস্তু নিবিচাৰাকৈয়ে ওলাই আহে— সেইটোৱেই বিপজ্জনক দিশ। মুখ্য ন্যায়াধীশগৰাকীয়ে মতামত দিয়ে যে ভিডিঅ’ আৰম্ভ হোৱাৰ আগতে কেইছেকেণ্ডমানৰ বাবে সতৰ্কবাণী বাৰ্তা দেখুৱাব পাৰি আৰু তাৰ পিছত আধাৰ নম্বৰৰ জৰিয়তে বয়স পৰীক্ষা কৰি প্ৰৱেশৰ অনুমতি দিব পাৰি।
তেওঁ কয় যে এয়া কেৱল এটা প্ৰস্তাৱহে, কিন্তু বিশেষজ্ঞৰ মতামত লৈ পৰীক্ষামূলকভাৱে ব্যৱস্থা এটা প্ৰৱৰ্তন কৰিব পৰা যাব। তেওঁৰ মতে, সমাজখনক দায়বদ্ধ কৰি তুলিলে এই সমস্যাৰ এক বৃহৎ অংশ হ্ৰাস পাব পাৰে। এছ এম এ কিউৰ ফাউণ্ডেচনে দাখিল কৰা গোচৰৰ পৰিপ্ৰেক্ষিতত আদালতৰ শুনানি অনুষ্ঠিত হয়।
এই সংস্থাটোৱে বিৰল জিনীয় ৰোগ স্পাইনেল মাস্কুলাৰ এট্ৰফিত (SMA) আক্ৰান্ত লোকৰ সৈতে কাম কৰে। সময় ৰাইনা, বিপুন গোৱাল, সোণালী ঠাক্কাৰ, নিশান্ত তনৱাৰ, বলৰাজ সিং ঘাইৰ দৰে একাংশ ষ্টেণ্ড আপ কমেডিয়ান আৰু প্ৰভাৱশালী ব্যক্তিয়ে অসুস্থ লোকসকলক লৈ ধেমালি কৰি ছ’চিয়েল মিডিয়াত প্ৰচাৰ কৰা বুলি অভিযোগ উত্থাপন কৰে।
শুনানিৰ সময়ত আদালতে কেন্দ্ৰীয় চৰকাৰক কয় যে শাৰীৰিক বা জিনীয় অক্ষম লোকক অপমান আৰু উপহাসক অপৰাধ হিচাপে গণ্য কৰাৰ বাবে কঠোৰ আইন প্ৰণয়নৰ কথা চিন্তা কৰিবলৈ। ন্যায়াধীশসকলৰ প্ৰশ্ন— যদি অনুসূচিত জাতি আৰু অনুসূচিত জনজাতিৰ বাবে অনুসূচিত জাতি–জনজাতিৰ আইন প্ৰণয়ন কৰিব পৰা যায়, য’ত বৰ্ণবাদী অপমান শাস্তিযোগ্য অপৰাধ, তেন্তে প্ৰতিবন্ধীসকলৰ বাবেও একেধৰণৰ আইন কিয় থাকিব নোৱাৰে?
চৰকাৰক প্ৰতিনিধিত্ব কৰা ছলিচিটৰ জেনেৰেলে আদালতত কয় যে ইণ্টাৰনেটৰ সমস্যা কেৱল অশ্লীলতাতে সীমাবদ্ধ নহয়, বৰঞ্চ অনিয়ন্ত্ৰিত ব্যৱহাৰকাৰীয়ে সৃষ্টি কৰা ‘বিকৃত’ বিষয়বস্তু অধিক ডাঙৰ চিন্তাৰ বিষয়। তেওঁ দাবী কৰে যে বাক স্বাধীনতা মূল্যৱান, কিন্তু ই বিকৃতিৰ ৰূপ ল’ব নোৱাৰে।
আদালতে লগতে মন্তব্য কৰে যে কেৱল আত্মনিয়ন্ত্ৰণকাৰী সংস্থাৰ ওপৰত নিৰ্ভৰ কৰাটোৱেই যথেষ্ট নহ’ব। নিৰপেক্ষ আৰু স্বায়ত্তশাসিত সংস্থা থাকিব লাগে, য’ত বিষয়বস্তু সৃষ্টিকৰ্তা বা চৰকাৰেও প্ৰভাৱ পেলাব নোৱাৰে। বিচাৰপীঠৰ প্ৰশ্ন— যদি আত্মনিয়ন্ত্ৰণ ব্যৱস্থাটো ফলপ্ৰসূ আছিল, তেন্তে ইমানবোৰ অভিযোগ আৰু বিতৰ্ক কিয় বাঢ়িছে?
ইয়াৰ পূৰ্বে আদালতে কৈছিল যে বিজ্ঞাপন বা ব্যৱসায়িক ভাষণ আৰু নিষিদ্ধ বাক্যক সংবিধানৰ অধীনত বাক স্বাধীনতাৰ অধিকাৰ হিচাপে গণ্য কৰা নহয়। ইতিমধ্যে আদালতে সংশ্লিষ্ট পাঁচজন কণ্টেণ্ট ক্ৰিয়েটৰক নিজৰ ভিডিঅ’ত ৰাজহুৱাভাৱে ক্ষমা খুজিবলৈ নিৰ্দেশ দিছে।
এই বিতৰ্কৰ মাজতে আদালতে আধাৰ ভিত্তিক বয়স পৰীক্ষণৰ প্ৰস্তাৱে অনলাইন প্লেটফৰ্ম, বাক স্বাধীনতা আৰু ব্যক্তিগত গোপনীয়তাৰ ক্ষেত্ৰত এক নতুন বিতৰ্কৰ সূচনা কৰিছে। এতিয়া গুৰুত্ব দিয়া হৈছে যে চৰকাৰে এনে আইন আনিব নেকি, নে ভৱিষ্যতে অধিক মতামতৰ ভিত্তিত কোনো সিদ্ধান্ত লোৱা হ’ব।
