জম্মু-কাশ্মীৰত (J&K) আৰক্ষী বাহিনী (Security forces)ৰ ওপৰত সন্ত্ৰাসবাদীৰ আক্ৰমণ (Terrorist attack)। সন্ত্ৰাসবাদীৰ গুলীচালনাত এজন আৰক্ষী জোৱান নিহত (Police man killed) হয়। অনন্তনাগৰ লাল চ’কত (Lal Chok, Anantnagar) সংঘটিত হৈছে এই ঘটনা।
স্থানীয় সূত্ৰৰ পৰা জানিব পৰা মতে, বুধবাৰে দুপৰীয়া ১২ বজাৰ ওচৰত অমৰনাথ যাত্ৰাৰ (Amarnath Yatra) নিৰাপত্তাৰ বাবে নিয়োজিত আৰক্ষীৰ এটা দলে লাল চ’কত টহল দি আছিল। হঠাতে দলটোৰ ওপৰত গুলীচালনা কৰা হয়। আৰক্ষী বিষয়াৰ মতে, জংঘলৰ আঁৰৰ পৰাই সন্দেহযুক্ত সন্ত্ৰাসবাদীয়ে গুলীচালনা কৰে। লগে লগে আৰক্ষীয়েও প্ৰত্যুত্তৰ দিয়ে। অৱশ্যে সন্ত্ৰাসবাদীৰ গুলীত এজন আৰক্ষী কনিষ্টবল আঘাতপ্ৰাপ্ত হয়। গুৰুতৰ অৱস্থাত তেওঁক উদ্ধাৰ কৰি অনন্তনাগ চিকিৎসা মহাবিদ্যালয়লৈ প্ৰেৰণ কৰা হয়। অৱশ্যে চিকিৎসকে পৰীক্ষাৰ পিছত মৃত ঘোষণা কৰে।
সন্ত্ৰাসবাদীৰ সন্ধানত আৰক্ষীয়ে অঞ্চলটোত তালাচী অভিযান আৰম্ভ কৰিছে। সেনাবাহিনীও তেওঁলোকৰ লগত আছে। সন্ত্ৰাসবাদীয়ে যাতে পলায়ন কৰিব নোৱাৰে তাৰ বাবে সমগ্ৰ অঞ্চলটো ঘেৰাও কৰি ৰখা হৈছে। ড্ৰ’ন ব্যৱহাৰ কৰিও চোৰাংচোৱাগিৰি কৰা হৈছে।
উল্লেখ্য যে বিগত কেইমাহমানৰ পৰা সীমান্তৰ সিপাৰৰ পৰা বাৰে বাৰে অনুপ্ৰৱেশৰ চেষ্টা কৰা হৈছে। সন্ত্ৰাসবাদী বা অনুপ্ৰৱেশকাৰীৰ উপস্থিতিৰ প্ৰত্যুত্তৰ দিছে ভাৰতীয় সেনাই। বেছিভাগ ক্ষেত্ৰতে চোৰাংচোৱাৰ তথ্যৰ ভিত্তিত সেনাই অভিযান চলাইছে। কঠোৰ চোৰাংচোৱাগিৰিৰ বাবে অনুপ্ৰৱেশৰ চেষ্টা বিফল হোৱা বুলি সেনাই দাবী কৰিছে। চাৰিদিন পূৰ্বে জম্মু-কাশ্মীৰৰ ৰাজৌৰী ছেক্টৰতো নিয়ন্ত্ৰণৰেখাৰে অনুপ্ৰৱেশৰ চেষ্টা সেনাই ব্যৰ্থ কৰিছে।
