দেশৰ ডিজিটেল জগতখনত এক বৃহৎ বিনিয়োগ আহিবলৈ ওলাইছে। বিশ্বৰ অন্যতম শ্ৰেষ্ঠ ডাটা চেণ্টাৰ কোম্পানী ‘এয়াৰট্ৰাংক’(Airtrunk) এ ২০৩০ চনৰ ভিতৰত ভাৰতত ৩ লাখ কোটিতকৈ অধিক টকা বিনিয়োগ কৰিবলৈ ওলাইছে। জ্ঞাত সূত্ৰৰ মতে, কোম্পানীটোৰ এই বৃহৎ পদক্ষেপে একেটা ঢাপতে বিশ্বৰ বজাৰত ভাৰতৰ গুৰুত্ব বৃদ্ধি কৰিব।
শুকুৰবাৰে প্ৰধানমন্ত্ৰী নৰেন্দ্ৰ মোদীয়ে এয়াৰট্ৰাংকৰ প্ৰতিষ্ঠাপক তথা মুখ্য কাৰ্যবাহী বিষয়া ৰবীন খুডাৰ সৈতে এক উচ্চ পৰ্যায়ৰ বৈঠকত মিলিত হয়। উক্ত বৈঠকৰ অন্তত প্ৰধানমন্ত্ৰীয়ে এই মেগা ইনভেষ্টমেণ্টৰ কথা ঘোষণা কৰে। এই বহুজাতিক কোম্পানীটোৱে ভাৰতত মুঠ ৫ গিগাৱাট ডাটা চেণ্টাৰ নিৰ্মাণৰ পৰিকল্পনা কৰিছে।
বৈঠকৰ অন্তত প্ৰধানমন্ত্ৰীয়ে ছ’চিয়েল মিডিয়া এক্সত লিখিছে, “ভাৰতৰ ডিজিটেল আন্তঃগাঁথনি এতিয়া বৃহৎ গতিৰে আগবাঢ়িছে। এয়াৰট্ৰাংকে ভাৰতত প্ৰায় ৩ লাখ কোটি টকা বিনিয়োগৰ কথা ঘোষণা কৰিছে। এয়া দেশৰ ডিজিটেল জগতৰ অন্যতম বৃহৎ বিনিয়োগ হ’বলৈ গৈ আছে।” মোদীয়ে লগতে কয় যে এই বিনিয়োগে ভাৰতক ‘ক্লাউড কম্পিউটিং’ আৰু এআইৰ বিশ্ব মঞ্চত এক বৃহৎ অগ্ৰণী হ’ব। কেৱল সেয়াই নহয়, ইয়াৰ দ্বাৰা দেশৰ বজাৰত চাকৰিৰ সুযোগ বৃদ্ধি হোৱাৰ লগতে নতুন প্ৰযুক্তিৰ সৃষ্টি হ’ব।
প্ৰধানমন্ত্ৰীয়ে কয়, “এয়া স্পষ্ট যে বিশ্বৰ ডিজিটেল অৰ্থনীতিৰ ভৱিষ্যত ভাৰতত সৃষ্টি হৈছে।” এয়াৰট্ৰাংকে মূলতঃ এছিয়া-পেচিফিক আৰু মধ্যপ্ৰাচ্যৰ বৃহৎ প্ৰযুক্তি আৰু ইণ্টাৰনেট কোম্পানীসমূহক ক্লাউড আৰু ডাটা আন্তঃগাঁথনি সেৱা প্ৰদান কৰে।
কোম্পানীটোৰ মুখ্য কাৰ্যবাহী বিষয়া ৰবীন খুডাৰ মতে, ডিজিটেল অৰ্থনীতিৰ ওপৰত প্ৰধানমন্ত্ৰী মোদীৰ দূৰদৰ্শী চিন্তাধাৰাৰ বাবেই ভাৰত আজি বিশ্ব বজাৰত প্ৰযুক্তিৰ ক্ষেত্ৰত বিনিয়োগৰ সৰ্বোত্তম স্থানত পৰিণত হৈছে। তেওঁ কয়, “এআইৰ জগতখনৰ অন্যতম আগশাৰীৰ শক্তি হ’বলৈ ভাৰতৰ সকলো প্ৰতিভা আৰু সামৰ্থ্য আছে। সেই সপোন পূৰণৰ ক্ষেত্ৰত আমি ভাৰতৰ কাষত থাকিবলৈ পাই অতিশয় সুখী।”
এয়াৰট্ৰাংকৰ আঁৰত আছে বিশ্ববিখ্যাত বিনিয়োগ সংস্থা ‘ব্লেকষ্টোন’ আৰু ‘কানাডা পেঞ্চন প্লেন’। ফলত তেওঁলোকৰ বৃহৎ বিনিয়োগে ভাৰতৰ প্ৰযুক্তি খণ্ডক নতুন উচ্চতালৈ লৈ যোৱাৰ সম্ভাৱনা আছে। এই ডাটা চেণ্টাৰসমূহ দেশৰ বিভিন্ন ৰাজ্য আৰু কেন্দ্ৰীয়শাসিত অঞ্চলত পৰ্যায়ক্ৰমে স্থাপন কৰা হ’ব।
উল্লেখ্য যে এয়াৰট্ৰাংকে চলিত বৰ্ষৰ এপ্ৰিল মাহত ‘লুমিনা ক্লাউডইনফ্ৰা’ নামৰ কোম্পানী এটা ক্ৰয় কৰি ভাৰতীয় বজাৰত প্ৰৱেশ কৰিছিল। ইতিমধ্যে মুম্বাই, চেন্নাই আৰু হায়দৰাবাদত তেওঁলোকৰ প্ৰায় ৬০০ মেগাৱাটৰ ডাটা চেণ্টাৰ নিৰ্মাণৰ কাম আৰম্ভ হৈছে।
২০১৫ চনত প্ৰতিষ্ঠা হোৱা এই কোম্পানীটোৱে ২০১৭ চনত অষ্ট্ৰেলিয়াত প্ৰথমটো বৃহৎ ডাটা চেণ্টাৰ নিৰ্মাণ কৰিছিল। তাৰ পিছত অতি কম সময়ৰ ভিতৰতে তেওঁলোকে নিজৰ ব্যৱসায় সম্প্ৰসাৰণ কৰিছে আৰু এতিয়া তেওঁলোকে সমগ্ৰ এছিয়া-পেচিফিক অঞ্চলত নিজৰ নেটৱৰ্ক বিয়পাইছে। এতিয়া তেওঁলোকৰ দৃষ্টি ভাৰতীয় বজাৰ।
