২০২০ চনত পাকিস্তানৰ পঞ্জাব প্ৰদেশ (Punjab province of Pakistan)ৰ ঘাইপথতে তিনিটা সন্তানৰ সন্মুখত বন্দুকৰ ভয় দেখুৱাই এগৰাকী ফৰাচী মহিলাক দলবদ্ধ ধৰ্ষণ (Group rape of a French woman) কৰাৰ গোচৰত দোষী সাব্যস্ত হোৱা দুজন লোকৰ মৃত্যুদণ্ড বাহাল (Death penalty for two people upheld) ৰাখিছে লাহোৰ উচ্চ ন্যায়ালয়ে (Lahore High Court)। বুধবাৰে উচ্চ ন্যায়ালয়ে নিম্ন আদালতে জাৰি কৰা মৃত্যুদণ্ডৰ নিৰ্দেশৰ বিৰুদ্ধে দোষীসকলৰ আবেদন খাৰিজ কৰি ৰায়দান কৰে।
২০২০ চনৰ ছেপ্টেম্বৰ মাহত লাহোৰ-শিয়ালকোট মটৰৱে’ত পাকিস্তানী মূলৰ এগৰাকী ফৰাচী নাগৰিকৰ ওপৰত হোৱা নৃশংস আক্ৰমণৰ ফলত সমগ্ৰ পাকিস্তানত ক্ষোভৰ সৃষ্টি হৈছিল আৰু গৰিহণাৰ সৃষ্টি হৈছিল। সেই সময়ত ৩২ বছৰীয়া মহিলাগৰাকীয়ে নিজৰ তিনিটা সন্তানৰ সৈতে গাড়ী চলাই গৈ থকা অৱস্থাত লাহোৰৰ সমীপত হঠাতে গাড়ীৰ ইন্ধন শেষ হৈ স্তব্ধ হৈ পৰে। তদন্তকাৰীয়ে জনোৱা মতে, আবিদ আলী আৰু ছফকাত আলী নামৰ দুজন অস্ত্ৰধাৰী লোকে গাড়ীখনত বলপূৰ্বকভাৱে প্ৰৱেশ কৰি প্ৰথমে পৰিয়ালটোৰ সামগ্ৰী লুট কৰি লৈ যায় আৰু তাৰ পিছত মহিলাগৰাকীক পথৰ কাষৰ এখন পথাৰলৈ লৈ গৈ সন্তানক বন্দুক দেখুৱাই দলবদ্ধ ধৰ্ষণ কৰে।
এই ঘটনাৰ পিছত সমগ্ৰ দেশত ব্যাপক প্ৰতিবাদৰ সৃষ্টি হয় আৰু দোষীক দৃষ্টান্তমূলক শাস্তি প্ৰদানৰ দাবী উত্থাপন হয়। সেই সময়ত পঞ্জাব আৰক্ষীৰ মুখ্য তদন্তকাৰী বিষয়া ওমৰ শ্বেখে ইয়াৰ পৰিৱৰ্তে ভুক্তভোগীক দোষাৰোপ কৰি মন্তব্য কৰিছিল যে “আমাৰ সমাজে ৰাতিৰ এনে সময়ত মহিলাসকলক অকলে বাহিৰত থাকিবলৈ নিদিয়ে”। আৰক্ষী বিষয়াগৰাকীৰ আপত্তিজনক মন্তব্যই সাধাৰণ জনতাক আৰু অধিক ক্ষুব্ধ কৰি তোলাৰ লগতে তেওঁক চাকৰিৰ পৰা বৰ্খাস্ত কৰাৰ দাবীত প্ৰতিবাদকাৰীসকল ৰাজপথলৈ ওলাই আহে।
পিছত ২০২১ চনৰ মাৰ্চ মাহত লাহোৰৰ সন্ত্ৰাসবাদ বিৰোধী আদালতে এই গোচৰৰ মূল দোষী আবিদ আলী ওৰফে মালহি আৰু শ্বাফকাত আলী ওৰফে বাজনাক যাৱজ্জীৱন কাৰাদণ্ড আৰু জৰিমনা বিহাৰ লগতে মৃত্যুদণ্ডৰ শাস্তি প্ৰদান কৰে। এই ৰায়দানৰ বিৰুদ্ধে দোষী দুজনে সেই বছৰতে উচ্চ ন্যায়ালয়ত আবেদন জনায়। অৱশেষত দীৰ্ঘদিনীয়া শুনানিৰ অন্তত ন্যায়াধীশ চৈয়দ শ্বাহবাজ আলী ৰিজভি আৰু ন্যায়াধীশ তাৰিক মেহমুদ বাজৱাৰে গঠিত লাহোৰ উচ্চ ন্যায়ালয়ৰ দুগৰাকী ন্যায়াধীশৰ বিচাৰপীঠে দোষীসকলৰ আবেদন নাকচ কৰি অৱশেষত নিম্ন ন্যায়ালয়ৰ মৃত্যুদণ্ডৰ শাস্তি বাহাল ৰাখে।
