দিল্লীৰ মালবিয়া নগৰত অগ্নিকাণ্ড সংঘটিত হোৱাৰ ২৪ ঘণ্টাৰ ভিতৰতে দেশৰ আন এক প্ৰান্তত পুনৰ ভয়ংকৰ অগ্নিকাণ্ড সংঘটিত হয়। বৃহস্পতিবাৰে পুৱা বিহাৰৰ মুজাফ্ফৰপুৰৰ এখন চিকিৎসালয়ৰ আই চি ইউত অগ্নিকাণ্ড (Bihar Fire) সংঘটিত হয়। পুৱা ৪ বজাত সংঘটিত অগ্নিকাণ্ডৰ জুই দ্ৰুতগতিত সমগ্ৰ চিকিৎসালয়খনতে বিয়পি পৰে।
প্ৰথম অৱস্থাত চিকিৎসালয়খনৰ ষষ্ঠ মহলাৰ আই চি ইউত অগ্নিকাণ্ড সংঘটিত হোৱাৰ খবৰ পোৱা গৈছিল। অগ্নিকাণ্ড সংঘটিত হোৱাৰ কিছু সময়ৰ পাছতে ৰোগীৰ আত্মীয়ই ততাতৈয়াকৈ উদ্ধাৰকাৰ্য চলায়।
অগ্নিনিৰ্বাপক বাহিনীকো মাতি অনা হয়। ছয়খন অগ্নিনিৰ্বাপক বাহিনীয়ে ঘটনাস্থলীত উপস্থিত হৈ জুই নিয়ন্ত্ৰণৰ চেষ্টা চলায়। কিন্তু ধোঁৱাৰে ভৰি পৰে সমগ্ৰ আই চি ইউ। ইয়াৰ বাহিৰেও মহলাটোৰ আন কোঠাবোৰলৈও জুই বিয়পি পৰে।
অগ্নিনিৰ্বাপক বাহিনী আৰু স্থানীয় লোকৰ সহায়ত ১৫-২০ জন ৰোগীক উদ্ধাৰ কৰা হয়। অৱশ্যে অগ্নিদগ্ধ হৈ তিনিজন লোকৰ মৃত্যু হোৱা বুলি আৰক্ষীয়ে জনায়। অৱশ্যে আৰু বহু ৰোগী অগ্নিদগ্ধ হৈ সংকটজনক অৱস্থাত চিকিৎসাধীন হৈ আছে। ফলত মৃতকৰ সংখ্যা আৰু বৃদ্ধি পাব পাৰে বুলি আশংকা কৰা হৈছে।
মুজাফ্ফৰপুৰৰ অগ্নিনিৰ্বাপক বাহিনীৰ মুৰব্বী নিভাছ পাণ্ডেয়ে কয়, “পুৱা ৩.৫৫ বজাত আমি চিকিৎসালয়খনত অগ্নিকাণ্ড সংঘটিত হোৱাৰ খবৰ পাইছিলোঁ। খবৰ পোৱাৰ পিছত আমি উক্ত স্থানলৈ যাওঁ। ইতিমধ্যে জুই বিয়পি পৰিছিল। চৌপাশ ক’লা ধোঁৱাই আৱৰি ধৰিছিল।
ক্ষিপ্ৰতাৰে উদ্ধাৰ অভিযান আৰম্ভ কৰা হয়। ১৫-২০ জন ৰোগীক উদ্ধাৰ কৰি ওচৰৰ চিকিৎসালয়লৈ স্থানান্তৰ কৰা হয়।” জিলা দণ্ডাধীশ সুব্ৰত কুমাৰ সেনে জনোৱা মতে, আই চি ইউত ১৩ জন ৰোগী আছিল। একাংশ ৰোগী চিচিইউত আছিল। তিনিজন লোকৰ মৃত্যু হৈছে। ঘটনাৰ তদন্ত কৰি দোষীৰ বিৰুদ্ধে বিহিত ব্যৱস্থা গ্ৰহণ কৰা হ’ব।
উল্লেখ্য যে বুধবাৰে পুৱা দিল্লীৰ মালবিয়া নগৰৰ এখন হোটেলত অগ্নিকাণ্ড সংঘটিত হৈ ২১ জন লোকৰ মৃত্যু হয়। ইয়াৰে ১২ জন বিদেশী বুলি জানিব পৰা গৈছে। আহত হয় ২৬ জন লোক।
