ইতিমধ্যে উচ্চতম ন্যায়ালয়ে (Supreme Court) ধৰ্ষণৰ গোচৰত ভুক্তভোগীৰ (Victim in a rape case) নাম আৰু পৰিচয় (Name and Identity) গোপনে ৰখাৰ বাবে ‘নিৰ্দেশনা’ (‘Instructions’ to keep secret) নিৰ্ধাৰণ কৰিছে। কিন্তু দেশৰ সৰ্বোচ্চ ন্যায়ালয়ে পৰ্যবেক্ষণ কৰিছে যে সকলো গোচৰতে এই নিৰ্দেশ ধাৰাবাহিকভাৱে পালন কৰা হোৱা নাই। উচ্চতম ন্যায়ালয়ে স্পষ্ট কৰি দিছে যে পূৰ্বৰ নিৰ্দেশ যাতে কঠোৰভাৱে পালন কৰা হয় সেয়া নিশ্চিত কৰিব লাগিব। উচ্চতম ন্যায়ালয়ে এতিয়া দেশৰ প্ৰতিখন উচ্চ ন্যায়ালয়ৰ মহাপঞ্জীয়কক অৱগত কৰিছে। উচ্চতম ন্যায়ালয়ৰ ন্যায়াধীশ সঞ্জয় কেৰল আৰু ন্যায়াধীশ এন কোটিশ্বৰ সিঙৰ বিচাৰপীঠত ধৰ্ষণৰ গোচৰৰ শুনানি চলি আছিল ।
যোৱা মঙলবাৰে আদালতে এই গোচৰৰ ৰায় দিয়ে। বৃহস্পতিবাৰে ৰাজহুৱা কৰা হয় এই ৰায়। নাবালিকাক ধৰ্ষণ কৰাৰ গোচৰত এজন অভিযুক্তক দোষমুক্ত কৰিলে উচ্চতম ন্যায়ালয়ে। একে সময়তে ন্যায়াধীশ দুগৰাকীয়ে ৰায়দানৰ একেবাৰে শেষত ধৰ্ষণৰ গোচৰত ভুক্তভোগীৰ নাম আৰু পৰিচয় গোপনে ৰখা সন্দৰ্ভত উচ্চতম ন্যায়ালয়ৰ পূৰ্বৰ নিৰ্দেশৰ বিষয়েও লিখে। তেওঁলোকে লিখিছে, “এইটো আইনত বহুদিনৰ পৰাই প্ৰতিষ্ঠিত। অৱশ্যে বাস্তৱত ইয়াক সঠিকভাৱে পালন কৰা হোৱা নাই।”
ৰায়দানৰ শেষৰ অনুচ্ছেদত দুজন ন্যায়াধীশৰ বিচাৰপীঠে লিখিছে, “আমি নিৰ্দেশ দিওঁ যে এই ৰায়ৰ প্ৰতিলিপি সকলো উচ্চ ন্যায়ালয়ৰ মহাপঞ্জীয়কলৈ প্ৰেৰণ কৰা হওক।” এই প্ৰসংগত তেওঁলোকে নিপুন ছাক্সেনা বনাম ভাৰত চৰকাৰৰ গোচৰৰ পূৰ্বৰ ৰায়ৰ কথাও উল্লেখ কৰে। সেই গোচৰৰ ৰায়দানত ভুক্তভোগীৰ পৰিচয় প্ৰকাশ নকৰাৰ সন্দৰ্ভত কিছুমান বাধ্যবাধকতাৰ কথা উল্লেখ কৰা হৈছে বুলি ন্যায়াধীশ দুগৰাকীয়ে কয়। সেই আদেশ কঠোৰভাৱে পালন কৰিব লাগিব। সেইটো নিশ্চিত কৰিবলৈ সকলো উচ্চ ন্যায়ালয়ৰ মহাপঞ্জীয়কক মঙলবাৰৰ ৰায়দানৰ প্ৰতিলিপি প্ৰেৰণ কৰিবলৈ কোৱা হৈছে।
উচ্চতম ন্যায়ালয়ে ৰায়দানত আৰু লিখিছে, “যদিও দীৰ্ঘদিন ধৰি ভুক্তভোগীৰ পৰিচয় বেনামী কৰি ৰখাৰ নীতি আইনত প্ৰতিষ্ঠিত হৈ আহিছে, তথাপিও কাৰ্যক্ষেত্ৰত ইয়াক সঠিকভাৱে পালন কৰা হোৱা নাই। ধৰি লোৱা হৈছে যে ইয়াৰ মূল কাৰণ হ’ল নিম্ন আদালতৰ উদাসীনতা আৰু এই অপৰাধৰ ফলত ভুক্তভোগীয়ে সহ্য কৰিবলগীয়া হোৱা সামাজিক কলংকৰ বোজা বহন কৰিব লগীয়া হয়, সেই বিষয়ে সজাগতাৰ অভাৱ।”
