খটখটী আৰক্ষী (Khatkhati Police)ৰ বৃহৎ সফলতা। এছ বি আই নাকা তালাচীত নিষিদ্ধ কানিসহ তিনিজন সৰবৰাহকাৰীক আটক (3 suppliers arrested)। নিৰ্বাচনৰ প্ৰাক-মুহূৰ্তত আৰক্ষী-প্ৰশাসন কঠোৰ হোৱাৰ পৰিপ্ৰেক্ষিতত তালাচী অভিযানৰ সময়ত দুখন গাড়ীৰ পৰা উদ্ধাৰ কৰা হয় এই কানিখিনি। জানিব পৰা মতে, জব্দ কৰা কানিখিনৰ (Narcotics seized) বজাৰ মূল্য প্ৰায় ১ কোটি ১০ লাখ টকা। বুধবাৰে দুপৰীয়া বোকাজান মহকুমাৰ অন্তৰ্গত খটখটী এছ বি আই নাকা তালাচীত দুখন বাহনৰ পৰা নিষিদ্ধ কানিখিনি উদ্ধাৰ কৰাৰ লগতে ইয়াৰ সৰবৰাহৰ সৈতকে জড়িত থকাৰ অভিযোগত তিনিজন লোকক আটক কৰা হৈছে ।
গোপন খবৰৰ ভিত্তিত খটখটী আৰক্ষী থানাৰ ভাৰপ্ৰাপ্ত আৰক্ষী বিষয়া সূৰ্য কুমাৰ বৰাৰ নেতৃত্বত উপ-পৰিদৰ্শক দেৱাশিস বৰা, গোবিন কাকতী, প্ৰিয়ংকা বৰদলৈ, অমৰজ্যোতি গগৈ আৰু আৰক্ষী দলৰ সহযোগত এক অভিযান চলায়। অভিযানৰ সময়ছোৱাত ডিমাপুৰ দিশৰ পৰা বোকাজান দিশে গৈ থকা AS-09-E-0647 আৰু AS-09-J-4804 পঞ্জীয়ন নম্বৰৰ দুখন চাৰিচকীয়া বাহনত তালাচী চলোৱাত ক’লা কাপোৰেৰে মেৰিওৱা ২২ পেকেটত নিষিদ্ধ কানি উদ্ধাৰ কৰা হয়। উদ্ধাৰ হোৱা কানিখিনক ওজন প্ৰায় ২২ কেজি ২৮৮ গ্ৰাম। ইতিমধ্যে আৰক্ষীয়ে এই নিষিদ্ধ কানি সৰবৰাহৰ অভিযোগত নগাঁও জিলাৰ নগাঁও সদৰ থানাৰ অন্তৰ্গত জাকিৰ হুছেইন (পিতা- নুৰ হুছেইন, ঠিকনা- ডিমাৰুগুৰি), আফতাৰ হুছেইন (পিতা- নুৰ হুছেইন, ঠিকনা- নতুন পানীগাঁও) আৰু বিহাৰৰ সঞ্জীৱ ৰৌচনক (পিতা- চান্দেশ্বৰ গিৰি, ঠিকনা- পদুমন চাপৰা, থানা- কেসাৰিয়া, জিলা- পূব চম্পাৰণ) খটখটী আৰক্ষীয়ে আটক কৰে।
