দিল্লী আৰক্ষীয়ে গ্ৰেপ্তাৰ কৰিছে ‘লেডী ডন’ পাৰ্বতীক (Lady Don’ Parvati)। বহুদিন ধৰি আৰক্ষীয়ে তেওঁক বিচাৰি আছিল। অৱশেষত শুকুৰবাৰে আৰক্ষীয়ে তেওঁক হাতে-লোতে ধৰে। পাৰ্বতী আৰু তেওঁৰ সংগীক গ্ৰেপ্তাৰ কৰা হৈছে। আৰক্ষীৰ সূত্ৰই জনোৱা মতে, তেওঁলোকৰ গাড়ীত নগদ ধন আৰু ড্ৰাগছ উদ্ধাৰ কৰা হৈছে।
আৰক্ষীয়ে জনোৱা মতে, অপৰাধ জগতত তেওঁ ‘বেড কেৰেক্টাৰ’ হিচাপেও পৰিচিত। ৰাজধানী আৰু ইয়াৰ আশে-পাশে তেওঁ আগতে এটা বিশাল ড্ৰাগছ সাম্ৰাজ্য চলাইছিল। ইয়াৰ বাহিৰেও তেওঁৰ বিৰুদ্ধে ধনদাবী, ভাবুকি, অপহৰণ আদি বহু গোচৰ আছে। ২১ ছেপ্টেম্বৰৰ পৰা আৰক্ষীয়ে এজন যুৱকৰ ছ’চিয়েল মিডিয়া একাউণ্টত নিৰীক্ষণ আৰম্ভ কৰে। সেই তথ্যৰ ভিত্তিত যুৱকজনৰ ঠিকনাত তালাচী চলোৱা হয়। আৰক্ষীয়ে তেওঁৰ পৰা ১০ গ্ৰাম ড্ৰাগছ উদ্ধাৰ কৰে।
তদন্তকাৰীয়ে জনোৱা মতে, যুৱকজনৰ তথ্যৰ ভিত্তিত পাৰ্বতীৰ গোপন ঠিকনা উদ্ধাৰ কৰা হৈছে। কেইবাটাও আৰক্ষীৰ দল তালাচী অভিযানৰ বাবে ঠিকনাটোলৈ গৈছিল। তাৰ পৰাই আৰক্ষীয়ে ড্ৰাগছ আৰু এখন গাড়ীসহ পাৰ্বতী আৰু তেওঁৰ এগৰাকী সহযোগীক গ্ৰেপ্তাৰ কৰে। ১৯৯০ চনৰ পৰাই পাৰ্বতীয়ে ড্ৰাগছৰ ব্যৱসায় কৰি আহিছে। প্ৰথমে কোতৱালি অঞ্চলত, তাৰ পিছত উত্তৰ দিল্লী, উত্তৰ-পশ্চিম দিল্লী আৰু যোৱা কেইবছৰমানৰ পৰা দিল্লীৰ বাহিৰতো ড্ৰাগছ সৰবৰাহৰ ব্যৱসায় চম্ভালিছিল। সূত্ৰ অনুসৰি, পাৰ্বতীয়ে বাহিৰৰ পৰা ড্ৰাগছ লৈ আহিছিল। তেওঁ আগতে গোপন ঠাইত সেইবোৰ জমা কৰি ৰাখিছিল। ইয়াৰ পিছত তেওঁ দিল্লী আৰু কাষৰীয়া অঞ্চলবোৰলৈ যোগান ধৰিছিল।
