একেদিনাই ৭৯৬ লেখিকাৰ ১,১১১ ই-গ্ৰন্থ উন্মোচনেৰে (E-book launch) ‘ৱৰ্ল্ড ৰেকৰ্ডছ ইণ্ডিয়া’ৰ (World Records India) অভিলেখ সৃষ্টি সদৌ অসম লেখিকা সমাৰোহ সমিতিৰ (All Assam Women Writers’ Association)। অসমীয়া লেখিকাক উৎসাহিত কৰা আৰু অসমীয়া সাহিত্যক আগবঢ়োৱা নিয়াৰ উদ্দেশ্যে সদৌ অসম লেখিকা সমাৰোহ সমিতিৰ দ্বাৰা এক ঐতিহাসিক ডিজিটেল প্ৰকাশনৰ উদ্যোগ গ্ৰহণ কৰি লেখিকা সকলক স্বৰচিত গ্ৰন্থ জমা দিবলৈ আহ্বান জনাইছিল তদানীন্তন সভানেত্ৰী সূৱৰ্ণ শইকীয়া বৰদলৈৰ নেতৃত্বত সদৌ অসম লেখিকা সমাৰোহ সমিতিয়ে। সংগঠনটোৰ এই আহ্বানৰ প্ৰতি সঁহাৰি জনাই ৰাজ্যখনৰ মুঠ ৭৯৬ গৰাকী লেখিকাই স্বৰচিত ই-গ্ৰন্থ জমা দিয়ে।
উল্লেখযোগ্য যে সকলোবোৰ ই-গ্ৰন্থ একে দিনতে ‘ত্ৰাত্ৰী’ৰ উদ্যোগত আনুষ্ঠানিকভাৱে প্ৰকাশ কৰি উন্মোচন কৰা হয়। যোৱা ২ জানুৱাৰীৰ পৰা ৫ জানুৱাৰীলৈ নগাঁও জিলাৰ কলিয়াবৰত অনুষ্ঠিত সদৌ অসম লেখিকা সমাৰোহ সমিতিৰ ত্ৰিংশতিতম দ্বিবাৰ্ষিক অধিৱেশন আৰু ৰূপালী জয়ন্তী অনুষ্ঠানৰ অন্তিম দিনা, অৰ্থাৎ ৫ জানুৱাৰীত সমগ্ৰ ৰাজ্যৰ যথেষ্ট সংখ্যক লেখিকাৰ স্বৰচিত গ্ৰন্থৰ লগতে ব্যতিক্ৰমী প্ৰচেষ্টাৰে সভানেত্ৰী সূৱৰ্ণ শইকীয়া বৰদলৈ, প্ৰধান সম্পাদিকা মনোমতী কুৰ্মী আৰু বিষয় ববীয়া সকলৰ সহযোগত একেলগে বিশেষ প্ৰযুক্তি ব্যৱস্থা যোগে ৭৯৬ গৰাকী লেখিকাৰ ১,১১১ খন ই-গ্ৰন্থৰ উন্মোচন হৈছিল। এই অসাধাৰণ কৃতিত্বৰ বাবে কলিয়াবৰ অধিৱেশনতে ‘ৱৰ্ল্ড ৰেকৰ্ডছ ইণ্ডিয়া’ত এক নতুন অভিলেখ স্থাপন হয় সংগঠনটোৰ।
উল্লেখযোগ্য যে সদৌ অসম লেখিকা সমাৰোহ সমিতিৰ বিদায়ী সভানেত্ৰী সূৱৰ্ণ শইকীয়া বৰদলৈৰ দ্বিতীয়টো কাৰ্যকালৰ সমাপ্তি হয় উক্ত অধিৱেশনতে। বৰদলৈৰ প্ৰথমটো কাৰ্যকালৰ আৰম্ভণিতে বোকাখাত নাট্য মন্দিৰত বোকাখাতৰ কেউটা সাংবাদিক সংগঠনৰ লগতে বোকাখাতৰ ৰাইজে আদৰণি সম্বৰ্ধনা জনোৱাৰ মুহূৰ্তত তদানীন্তন নৱ নিৰ্বাচিত সভানেত্ৰী সূৱৰ্ণ শইকীয়া বৰদলৈয়ে ব্যক্ত কৰিছিল এনে এক পৰিকল্পনা তথা হাবিয়াসৰ কথা।
সভানেত্ৰী বৰদলৈৰ নেতৃত্বত সংগঠনটোয়ে লোৱা এনে ব্যতিক্ৰমী পদক্ষেপৰ লগতে অভিলেখ স্থাপনৰ বাবে অসম ৰাজ্যিক সাংবাদিক সন্থাৰ সভাপতি জিতু শৰ্মা ৰাজখোৱাৰ লগতে বোকাখাতৰ কেউটা সাংবাদিক সংগঠন, বোকাখাতৰ বিভিন্ন দল সংগঠন, ব্যক্তিয়ে বিদায়ী সভানেত্ৰী সূৱৰ্ণ শইকীয়া বৰদলৈ আৰু সদৌ অসম লেখিকা সমাৰোহ সমিতিলৈ আন্তৰিক অভিনন্দন আৰু অফুৰন্ত শুভকামনা জ্ঞাপন কৰিছে। এয়া অসমীয়া সাহিত্যত মহিলা লেখকৰ ভূমিকাৰ এক অভূতপূৰ্ব মাইলৰ খুঁটি বুলি সচেতন মহলত চৰ্চিত হৈছে।
