টিকাকৰণ (Vaccination)ৰ ফলত অসুস্থ (Sick as a result) হৈছে নেকি? এইবাৰ এই ক্ষেত্ৰত উচ্চতম ন্যায়ালয়ে ডাঙৰ নিৰ্দেশ জাৰি কৰিছে। উচ্চতম ন্যায়ালয়ে (Supreme court of India) কোভিড ভেকচিন গ্ৰহণ কৰাৰ পিছত গুৰুতৰ পাৰ্শ্বক্ৰিয়া, আনকি মৃত্যুৰ দ্বাৰা আক্ৰান্তসকলৰ কাষত থিয় দিবলৈ কেন্দ্ৰক ডাঙৰ নিৰ্দেশ দিছে। মঙলবাৰে শীৰ্ষ আদালতে স্পষ্ট কৰি দিয়ে যে চৰকাৰে এনে ঘটনাৰ বাবে নিৰ্দিষ্ট ‘ন’-ফল্ট’ ক্ষতিপূৰণ নীতি (‘No-Fault’ Compensation Policy) বা গাঁথনি প্ৰণয়ন কৰিব লাগিব।
সহজ ভাষাত ক’বলৈ গ’লে ভেকচিন লোৱাৰ ফলত যদি কোনোবাই অসুস্থ হৈ পৰে বা মৃত্যুমুখত পৰে তেন্তে তেওঁলোকৰ পৰিয়ালক আৰ্থিকভাৱে সহায় (Financially support) কৰিব লাগিব। ইয়াৰ বাবে কাৰো গাফিলতি বা দোষ প্রমাণ কৰাৰ প্রয়োজন নাথাকিব৷ ২০২১ চনত কভিশ্বিল্ডৰ প্ৰথম ড’জ গ্ৰহণ কৰাৰ পিছত দুগৰাকী যুৱতীৰ মৃত্যুৰ সন্দৰ্ভত কেইবাটাও গোচৰ ৰুজু হৈছিল। আবেদনকাৰীয়ে দাবী কৰা মতে, ভেকচিন গ্ৰহণ কৰি শাৰীৰিক অসুস্থতাৰ বাবে দুয়োগৰাকী যুৱতীৰ মৃত্যু হয়।
আজি ন্যায়াধীশ বিক্ৰম নাথ আৰু ন্যায়াধীশ সন্দীপ মেহতাৰ বিচাৰপীঠে এটা কথা স্পষ্ট কৰি দিলে। আদালতে কয় যে ক্ষতিপূৰণ প্ৰদানৰ অৰ্থ এইটো নহয় যে কেন্দ্ৰীয় চৰকাৰ বা আন কোনো কৰ্তৃপক্ষই গাফিলতি স্বীকাৰ কৰিছে। ৰায়দানত কোৱা হৈছে, “এই গাঁথনি নিৰ্মাণক ভাৰত চৰকাৰ বা কোনো কৰ্তৃপক্ষৰ ফালৰ পৰা দায়বদ্ধতা বা দোষ স্বীকাৰ কৰা বুলি গণ্য কৰা নহ’ব।”
এই ঘটনাৰ তদন্তৰ বাবে এখন সুকীয়া বিশেষজ্ঞ সমিতি গঠনৰ বাবে আবেদন জনাইছিল। কিন্তু উচ্চতম ন্যায়ালয়ে সেই দাবী নাকচ কৰে। আদালতৰ মতে, ইয়াৰ পাৰ্শ্বক্ৰিয়াৰ তদন্তৰ বাবে বৰ্তমানৰ বৈজ্ঞানিক ব্যৱস্থাই যথেষ্ট। সুকীয়া কমিটীৰ প্ৰয়োজন নাই। অৱশ্যে ন্যায়াধীশসকলে নিৰীক্ষণৰ তথ্যসমূহ নিয়মীয়াকৈ সাধাৰণ জনতাৰ বাবে উপলব্ধ কৰাৰ নিৰ্দেশ দিছে।
আদালতে লগতে কয় যে এই আদেশে ভুক্তভোগীসকলক অন্য কোনো আইনী পথ বাছি লোৱাত বাধা নিদিয়ে। ১৮ আৰু ২০ বছৰীয়া দুগৰাকী কন্যাৰ মৃত্যুত ন্যায় বিচাৰি আদালতৰ দ্বাৰস্থ হোৱা ১৮ আৰু ২০ বছৰীয়া দুগৰাকী যুৱতীৰ পিতৃ-মাতৃৰ আবেদন আজি উচ্চতম ন্যায়ালয়ে মঞ্জুৰ কৰিছে।
