ৰাজ্যৰ বিধানসভা নিৰ্বাচন সমাগত। ইতিমধ্যে সকলো ৰাজনৈতিক দলে নিৰ্বাচনৰ বাবে কঁকালত টঙালি বান্ধিছে। কিন্তু এই নিৰ্বাচনৰ পূৰ্বে শাসনাধিষ্ঠিত বিজেপিয়ে ৰচিলে এক অভিলেখ। সেয়াও আকৌ হিতাধিকাৰীক ধন বিতৰণৰ ক্ষেত্ৰত। মঙলবাৰে একেটা দিনতে আৰু প্ৰায় একে সময়তে ৰাজ্যৰ ৪০ লাখ অৰুণোদয় হিতাধিকাৰীৰ একাউণ্টত সোমাল ৰাজকোষৰ ৩৬০০ কোটি টকা৷
কিয়নো ৪০ লাখ অৰুণোদয় হিতাধিকাৰী (Orunodoi Beneficiary)য়ে মঙলবাৰে নিজৰ নিজৰ বেংক একাউণ্টৰ জৰিয়তে লাভ কৰে ৯ হাজাৰ টকাকৈ (9 thouand)৷ এই উদ্দেশ্যে মঙলবাৰে পুৱা ১০.৩০ বজাত প্ৰতিখন পঞ্চায়ত, কাৰ্বি আংলং আৰু ডিমা হাচাওৰ এম এ চি, বিটিচিৰ ভিচিডিচি অঞ্চলত আৰু নগৰসমূহৰ ৱাৰ্ডত ৰাজ্যজুৰি ৩৮০০ খন সভা অনুষ্ঠিত কৰি এই ধন বিতৰণ কৰা হয়৷ এই ক্ষেত্ৰতো এক অভিলেখ সৃষ্টি হয়৷ অৰুণোদয় হিতাধিকাৰীক ৯ হাজাৰ টকাকৈ প্ৰদানৰ কেন্দ্ৰীয় অনুষ্ঠান অনুষ্ঠিত হয় গুৱাহাটীৰ জ্যোতি-বিষ্ণু আন্তৰ্জাতিক কলা মন্দিৰত। এই কাৰ্যসূচীত মুখ্যমন্ত্রী ডঃ হিমন্ত বিশ্ব শৰ্মাই অংশগ্ৰহণ কৰে৷
