বাংলাদেশত বৃহস্পতিবাৰে পুৱা ৭.৩০ বজাৰ পৰা (বাংলাদেশৰ স্থানীয় সময় অনুসৰি) আৰম্ভ হৈছে দেশখনৰ সাধাৰণ নিৰ্বাচনৰ ভোটগ্ৰহণ (Bangladesh Election) । সন্ধিয়া ৪.৩০ বজালৈকে চলিব ভোটগ্ৰহণ। বৰ্তমানলৈকে সাধাৰণ নিৰ্বাচনক লৈ কোনো বিশেষ অশান্তিকৰ পৰিস্থিতিৰ খবৰ পোৱা হোৱা নাই।
অৱশ্যে ছিৰাজগঞ্জৰ ৰায়গঞ্জ উপজিলাত নিৰ্বাচনী আচৰণ বিধি উলংঘা কৰাৰ বাবে চাৰিজন লোকক ৫০ হাজাৰ টকাকৈ জৰিমনা বিহা হৈছে বুলি বাংলাদেশৰ সংবাদপত্ৰ প্ৰথম আলোৱে প্ৰকাশ কৰিছে। তাত থকা এটা ভোটকেন্দ্ৰৰ প্ৰিজাইডিং অফিচাৰকো আঁতৰাই দিয়া হৈছে।
পুৱাৰে পৰা বাংলাদেশৰ বিভিন্ন ভোটকেন্দ্ৰৰ বাহিৰত ভোটাৰৰ দীঘলীয়া শাৰী দেখা গৈছে। ইতিমধ্যে বিভিন্ন ৰাজনৈতিক দলৰ শীৰ্ষ নেতাই ভোটদান কৰিছে। নেচনেল চিটিজেনছ পাৰ্টীৰ আহ্বায়ক নাহিদ ইছলামে ঢাকাৰ বেৰাইদ অঞ্চলৰ এটা ভোটগ্ৰহণ কেন্দ্ৰত ভোটদান কৰে। তেওঁ ঢাকা-১১ সমষ্টিৰ প্ৰাৰ্থী।
ঠাকুৰগাঁৱৰ এটা ভোটগ্ৰহণ কেন্দ্ৰত ভোটদান কৰে বিএনপিৰ সচিব প্ৰধান মিৰ্জা ফখৰুল ইছলাম আলমগীৰে। তেওঁ ঠাকুৰগাঁও-১ সমষ্টিৰ পৰা প্ৰতিদ্বন্দ্বিতা আগবঢ়াইছে। বাংলাদেশ জামাত-ই-ইছলামী (বাংলাদেশত ‘জামাত’ নামেৰে পৰিচিত)ৰ মুৰব্বী ছফিকুৰ ৰহমানেও ঢাকাৰ এটা ভোটগ্ৰহণ কেন্দ্ৰত ভোটদান কৰে।
বাংলাদেশৰ ৰাষ্ট্ৰীয় সংসদৰ ৩০০ খন আসনৰ ভিতৰত ২৯৯ খন আসনত ভোটগ্ৰহণ চলি আছে। এজন প্ৰাৰ্থীৰ মৃত্যুৰ বাবে শ্বেৰপুৰ-৩ত ভোটগ্ৰহণ স্থগিত ৰখা হৈছে। একে সময়তে বাংলাদেশত জুলাই চনদ সন্দৰ্ভত গণভোট অনুষ্ঠিত হৈছে।
যোৱা নৱেম্বৰ মাহত মহম্মদ ইউনুছৰ নেতৃত্বত অন্তৱৰ্তীকালীন চৰকাৰে জাৰি কৰা এক অধ্যাদেশ অনুসৰি চাৰিটা বিষয়ৰ ওপৰত এটা প্ৰশ্নৰ ভিত্তিত গণভোট অনুষ্ঠিত কৰা হৈছে। গণভোটৰ বেলট ৰাষ্ট্ৰীয় নিৰ্বাচনৰ বেলটৰ পৰা ৰং পৃথক কৰা হৈছে।
জুলাই চনদ কাৰ্যকৰী কৰাত ভোটাৰে সমৰ্থন কৰে নেকি সেই প্ৰশ্নত ভোটাৰে ‘হয়’ বা ‘নহয়’ ভোট দিব। উল্লেখ্য যে আৱামী লীগৰ নেত্ৰী শ্বেখ হাছিনাৰ বিদায় আৰু বি এন পি নেত্ৰী বেগম খালেদা জিয়াৰ মৃত্যুৰ পিছত বাংলাদেশত এয়া প্ৰথম নিৰ্বাচন।
বাংলাদেশৰ মুঠ ৫০টা পঞ্জীয়নভুক্ত আৰু স্বীকৃতিপ্ৰাপ্ত ৰাজনৈতিক দলে নিৰ্বাচনত প্ৰতিদ্বন্দ্বিতা আগবঢ়াইছে। প্ৰাৰ্থীৰ সংখ্যা হৈছে ২০২৮ গৰাকী। ইয়াৰে ৮৩ গৰাকী মহিলা। দলীয় টিকট অবিহনে নিৰ্দলীয়ভাৱে প্ৰতিদ্বন্দ্বিতা আগবঢ়াইছে ২০ গৰাকী মহিলাই।
হাছিনাৰ দল আৱামী লীগ ‘নিষিদ্ধ’ আৰু নিৰ্বাচনত প্ৰতিদ্বন্দ্বিতা কৰিবলৈ দিয়া হোৱা নাই। ৰাষ্ট্ৰীয় নিৰ্বাচনৰ দৰেই গণভোটে প্ৰবাসী আৰু জ্যেষ্ঠ নাগৰিককে ধৰি চাৰিটা শ্ৰেণীৰ নাগৰিকৰ বাবেও ডাক বেলটৰ জৰিয়তে ভোটদানৰ সুযোগ প্ৰদান কৰে।
