দিল্লীৰ নেহৰু প্লেচত চাহ খাবলৈ গৈ উত্তৰ-পূৰ্বাঞ্চলৰ দুগৰাকী যুৱতী (Delhi Student Harrashed) চৰম হাৰাশাস্তিৰ সন্মুখীন হ’বলগা হয়। হুইচেল বজোৱাৰ বিৰুদ্ধে প্ৰতিবাদ সাব্যস্ত কৰাত সুৰাপান কৰা যুৱকৰ দল এটাই আক্ৰমণ কৰে।
অভিযোগ অনুসৰি, ৰাজহুৱা পথত যুৱতী দুগৰাকীক বাঁহৰ লাঠিৰে প্ৰহাৰ কৰে। তেওঁলোকৰ কাপোৰবোৰ ফাটি যায়। আনকি তেওঁলোকৰ জাতিগত পৰিচয়ক লৈ অতি কুৎসিত আৰু বৰ্ণবাদী মন্তব্য কৰাৰ অভিযোগো উত্থাপন হৈছে। আৰক্ষীয়ে জনোৱা মতে, দেওবাৰে পুৱাৰ ভাগত এই ঘটনা সংঘটিত হয়।
যুৱতী দুগৰাকীয়ে এখন হোটেলৰ সন্মুখত চাহ খাই আছিল। সেই সময়ত দুজন যুৱকে যুৱতীদুগৰাকীক দেখি হুইচেল মাৰিবলৈ ধৰে। প্ৰতিবাদ কৰি থাকোঁতে আৰু কেইজনমান মানুহ গোট খাই তেওঁলোকক ঘেৰি ধৰে। লগে লগে কাজিয়া আৰম্ভ হয়।
অভিযোগকাৰীসকলে দাবী কৰিছে যে তেওঁলোকক নিৰ্যাতন চলোৱা হৈছিল। কেৱল সেয়াই নহয়, অঞ্চলটো এৰি যোৱাৰ সময়ত বাঁহেৰে কোবাইছিল। লগতে মুখ খুলিলে ফলাফল ভাল নহ’ব বুলিও হুংকাৰ দিয়ে অভিযুক্তই।
ঘটনাৰ পিছতে যুৱতী দুগৰাকীক ৰক্তাক্ত অৱস্থাত এইমছলৈ লৈ যোৱা হয়। জানিব পৰা মতে, বিএনএছৰ কেইবাটাও ধাৰাত ইতিমধ্যে কলকাজী থানাত এটা গোচৰ ৰুজু কৰা হৈছে।
চিচিটিভিৰ ফুটেজ চাই আৰু প্ৰত্যক্ষদৰ্শীৰ সৈতে কথা পতাৰ অন্তত আৰক্ষীয়ে চাৰিজন মূল দোষীক চিনাক্ত কৰিছে। তদন্ত আৰম্ভ হৈছে যদিও এতিয়ালৈকে কোনো লোক আৰক্ষীৰ জালত পৰা নাই। আৰক্ষী বাহিনীয়ে অভিযুক্তৰ সন্ধানত দিল্লীৰ বিভিন্ন প্ৰান্তত তালাচী অব্যাহত ৰাখিছে।
