উত্তৰ প্ৰদেশৰ অযোধ্যাৰ ৰাম মন্দিৰ (Ram Temple of Ayodhya)ত ভক্তসকলে দান কৰা কোটি কোটি টকাৰ নগদ ধন আৰু মূল্যৱান সামগ্ৰী (গহনা আৰু ৰত্ন) চুৰি (Theft of money and valuable items) কৰা আঠজন অভিযুক্তক গ্ৰেপ্তাৰ (Eight accused arrested) কৰাৰ পিছতে শ্ৰীৰাম জন্মভূমি তীৰ্থক্ষেত্ৰ ট্ৰাষ্টৰ (Shri Ram Janmabhoomi Pilgrimage Trust) সাধাৰণ সম্পাদকৰ পদৰ পৰা পদত্যাগ (Resignation from the position of General Secretary) কৰিছে চম্পত ৰায়ে (Champat Roy)। ইয়াৰ লগতে অনিল মিশ্ৰই তীৰ্থক্ষেত্ৰ ট্ৰাষ্টৰ সদস্য (ট্ৰাষ্টী) পদৰ পৰা পদত্যাগ কৰিছে।
চম্পতৰ ঘনিষ্ঠ এক সূত্ৰই শুকুৰবাৰে জনোৱা মতে, এনে অভিযোগ উত্থাপন হ’লে পদৰ পৰা আঁতৰি থকাটোৱেই উত্তম। লক্ষ্য হৈছে স্বতন্ত্ৰ আৰু নিৰপেক্ষ তদন্ত নিশ্চিত কৰা। আনহাতে, উত্তৰ প্ৰদেশৰ মুখ্যমন্ত্ৰী যোগী আদিত্যনাথে শুকুৰবাৰে আঠজন অভিযুক্তক গ্ৰেপ্তাৰ সন্দৰ্ভত কয়, “ভক্তৰ বিশ্বাসৰ সৈতে খেলা কৰাটো সহ্য কৰা নহ’ব। সনাতন ধৰ্মৰ মূল্যবোধৰ ওপৰত আক্ৰমণৰ বিৰুদ্ধে শূন্য সহনশীলতা নীতি মানি চলিবলৈ আমি প্ৰতিশ্ৰুতিবদ্ধ।”
উল্লেখ্য যে ‘শ্ৰীৰাম জন্মভূমি তীৰ্থক্ষেত্ৰ ট্ৰাষ্ট’ত জমা হোৱা প্ৰণামীক লৈ অনিয়মৰ অভিযোগৰ তদন্তৰ পৰ্যায় সম্পূৰ্ণ কৰাৰ পিছত মঙলবাৰে তিনিজনীয়া বিশেষ তদন্তকাৰী দলটোৱে প্ৰাৰম্ভিক প্ৰতিবেদন দাখিল কৰে। ইয়াৰ পিছত এছআইটিৰ পৰামৰ্শ অনুসৰি বৃহস্পতিবাৰে শ্ৰীৰাম জন্মভূমি তীৰ্থক্ষেত্ৰ ট্ৰাষ্টৰ হৈ ৮ জন লোকৰ বিৰুদ্ধে আনুষ্ঠানিকভাৱে আৰক্ষীৰ ওচৰত এজাহাৰ দাখিল কৰে অন্যতম ট্ৰাষ্টী কৃষ্ণ মোহনে। তাৰ আধাৰত আৰক্ষীয়ে এফআইআৰ ৰুজু কৰি সেই নিশাই আঠজন অভিযুক্তক গ্ৰেপ্তাৰ কৰে। ইয়াৰ ভিতৰত ৰামশংকৰ যাদৱ ওৰফে তিন্নু, লৱকুশ মিশ্ৰ আৰু অনুকল্প মিশ্ৰ আছে। মন্দিৰত চান্দা হিচাপে পোৱা নগদ ধন আৰু মূল্যৱান সামগ্ৰী গণনা আৰু লিপিবদ্ধ কৰাৰ কামত লৱকুশ আৰু অনুকল্প জড়িত আছিল। আনহাতে, ৰামশংকৰ পূৰ্বে ট্ৰাষ্টৰ সাধাৰণ সম্পাদক চম্পতৰ চালক আছিল আৰু ২০২২ চনৰ পৰা মন্দিৰ নিৰ্মাণ আৰু পৰৱৰ্তী পৰিচালনাৰ কামত জড়িত আছিল।
ইয়াৰ উপৰি গ্ৰেপ্তাৰ হোৱা লোকৰ তালিকাত অবিনাশ শুক্লা, মনীষ কুমাৰ যাদৱ, কৰুনেশ পাণ্ডে, ৰামশংকৰ মিশ্ৰ আৰু সুভাষ শ্ৰীবাস্তৱ নামৰ তিনিজন অভিযুক্তও আছে। আটক কৰা লোকসকলৰ বিৰুদ্ধে ভাৰতীয় দণ্ডবিধি আৰু দুৰ্নীতি প্ৰতিৰোধ আইনৰ একাধিক ধাৰাত চুৰি, অপৰাধমূলক আস্থা ভংগ, চুৰি সম্পত্তি লুকুৱাই ৰখা, অপৰাধমূলক ষড়যন্ত্ৰ আৰু উমৈহতীয়া উদ্দেশ্যত যৌথ অপৰাধমূলক ব্যৱস্থা আদি গোচৰ ৰুজু কৰা হৈছে। সূত্ৰ অনুসৰি, এছআইটিৰ প্ৰাৰম্ভিক প্ৰতিবেদনত ১৭ জন লোকক দোষী বুলি চিনাক্ত কৰা হৈছে। ইয়াৰ বাহিৰেও ৰাম মন্দিৰৰ সৈতে জড়িত প্ৰায় ১৫০ গৰাকী সেৱকৰ ভূমিকাক লৈ প্ৰশ্ন উত্থাপন হৈছে। প্ৰতিবেদনত কোৱা হৈছে যে ৰাম মন্দিৰ প্ৰতিষ্ঠা হোৱাৰ পিছত তেওঁলোকৰ বহুতৰে ধন-সম্পত্তি কেইবাগুণো বৃদ্ধি পাইছে। মন্দিৰৰ সৈতে জড়িত ফুলকান্ত মিশ্ৰ নামৰ এজন ব্যক্তিৰ নাম সম্পত্তি বৃদ্ধিৰ তালিকাত সন্নিৱিষ্ট হৈছে। ৰাম জন্মভূমি তীৰ্থ ক্ষেত্ৰৰ সাধাৰণ সম্পাদক তথা ভিএইচপিৰ উপ-সভাপতি চম্পতৰ ঘনিষ্ঠ ব্যক্তি হিচাপে পৰিচিত।
