সমগ্ৰ পশ্চিম এছিয়াত চলি থকা উত্তেজনাৰ মাজতে প্ৰধানমন্ত্ৰী নৰেন্দ্ৰ মোদীয়ে (PM Modi) পুনৰ দেশবাসীক শক্তিৰ ব্যয় হ্ৰাস কৰিবলৈ আহ্বান জনাইছে। সোমবাৰে তেওঁ নাগৰিকসকলৰ আগত কয় যে কোভিড মহামাৰীৰ সময়ত প্ৰৱৰ্তন কৰা অনলাইন ক্লাছ আৰু প্ৰয়োজন হ’লে ‘ৱৰ্ক ফ্ৰম হোম’ পুনৰ কৰিব পৰা যাব।
গুজৰাটৰ বদোদৰাত চৰ্দাৰ ধাম হোষ্টেল উদ্বোধন অনুষ্ঠানত ভাষণ দি প্ৰধানমন্ত্ৰীয়ে কয়, “কিছুমান বিদ্যালয়ে হয়তো অনলাইন ক্লাছৰ ব্যৱস্থাৰ কথা ভাবিব পাৰে।” তেওঁৰ মতে, প্ৰযুক্তিৰ ব্যৱহাৰ বৃদ্ধি কৰিলে শক্তি ৰাহি কৰা সম্ভৱ হ’ব আৰু দেশৰ ওপৰত অতিৰিক্ত চাপ হ্ৰাস কৰা হ’ব।
কোভিড মহামাৰীৰ সময়ত লকডাউনৰ বাবে সমগ্ৰ দেশতে অনলাইন ক্লাছ হৈছিল। সেই অভিজ্ঞতাৰ কথা উল্লেখ কৰি মোদীয়ে কয় যে বৰ্তমানৰ আন্তঃৰাষ্ট্ৰীয় পৰিস্থিতিতো ভাৰ্চুৱেল পদ্ধতিৰ ব্যৱহাৰ বৃদ্ধি কৰাটো গুৰুত্বপূৰ্ণ। ইয়াৰ পূৰ্বে প্ৰধানমন্ত্ৰীয়ে কৰ্মচাৰীসকলৰ বাবে ‘ঘৰৰ পৰা কাম কৰা’ৰ পৰামৰ্শ দিছিল। এইবাৰ চৰকাৰী আৰু ব্যক্তিগত খণ্ডত ভাৰ্চুৱেল মিটিং আৰু ঘৰৰ পৰাই কামত অধিক গুৰুত্ব দিবলৈ আহ্বান জনায়।
তেলেংগানাৰ পৰা দেশবাসীৰ ওচৰত প্ৰথমবাৰৰ বাবে আহ্বান জনাই প্ৰধানমন্ত্ৰীয়ে কয় যে দেশৰ সম্পদৰ ওপৰত থকা চাপ কমাবলৈ সকলো নাগৰিকে দায়িত্ব ল’ব লাগিব। পিছত বদোদৰাত তেওঁ একেটা বাৰ্তা পুনৰাবৃত্তি কৰি কয়, “কোভিড-১৯ মহামাৰী, বিশ্ব অৰ্থনৈতিক অনিশ্চয়তা আৰু পশ্চিম এছিয়াৰ সংকটকে ধৰি এই অস্থিৰতাৰ সময়ত ভাৰত বিচ্ছিন্ন হৈ থাকিব নোৱাৰে।”
তেওঁ লগতে কয়, “বিদেশৰ পৰা বহু সামগ্ৰী আমদানি কৰিবলৈ ভাৰতে বিপুল পৰিমাণৰ বৈদেশিক মুদ্ৰা ব্যয় কৰিবলগীয়া হয়। ইয়াৰ সমান্তৰালকৈ আমদানিকৃত সামগ্ৰীৰ মূল্যও বৃদ্ধি পোৱাৰ লগতে সমগ্ৰ বিশ্বতে যোগান শৃংখলতো ব্যাঘাত জন্মিছে। গতিকে সৰু ডাঙৰ প্ৰতিটো প্ৰচেষ্টাই গুৰুত্বপূৰ্ণ।”
পশ্চিম এছিয়াৰ সংকটক বিগত দশকৰ অন্যতম ডাঙৰ প্ৰত্যাহ্বান বুলি অভিহিত কৰি প্ৰধানমন্ত্ৰীয়ে আশ্বাস দিয়ে, “আমি যিদৰে কোভিড মহামাৰীক জয় কৰিলো, আমি এই পৰিস্থিতিৰ সৈতেও মোকাবিলা কৰিবলৈ সক্ষম হ’ম।”
