কংগ্ৰেছ, সমাজবাদী পাৰ্টী (এছ পি), ডি এম কেৰ দৰে কেইবাটাও বিৰোধী দলে লোকসভাৰ অধ্যক্ষ ওম বিৰলাৰ (Om Birla) বিৰুদ্ধে অনাস্থা প্ৰস্তাৱ উত্থাপন কৰিবলৈ জাননী দিছে। কিন্তু লোকসভাৰ দ্বিতীয় বৃহত্তম দল তৃণমূলে এই পদক্ষেপত বিশেষভাৱে যোগদান কৰা নাছিল।
লোকসভাত মমতা বেনাৰ্জীৰ দলৰ নেতা হিচাপে কাৰ্যভাৰ গ্ৰহণ কৰা অভিষেকে মঙলবাৰে কয় যে কংগ্ৰেছে আনিব বিচৰা অনাস্থা প্ৰস্তাৱত তৃণমূলৰ সাংসদসকলে স্বাক্ষৰ কৰাত তেওঁৰ কোনো আপত্তি নাই। কিন্তু তাৰ পূৰ্বে বিজেপিবিৰোধী মঞ্চ ‘ইণ্ডিয়া’ৰ অন্তৰ্গত দলসমূহে যৌথ বিবৃতি প্ৰকাশ কৰিব লাগিব। মঙলবাৰে বিয়লি লোকসভা সচিবালয়ত অধ্যক্ষৰ বিৰুদ্ধে সংসদীয় আইনৰ ৯৪(চি) ধাৰাত জাননী দাখিল কৰে কংগ্ৰেছৰ মুখ্য হুইপ কে সুৰেশে।
লোকসভাত কংগ্ৰেছৰ উপ-দলপতি গৌৰৱ গগৈ আৰু হুইপ মহম্মদ জাভেদ উপস্থিত থাকে। এছ পি আৰু ডি এম কেৰ প্ৰতিনিধিও উপস্থিত থাকে। জানিব পৰা মতে, অধ্যক্ষই লোকসভাৰ সচিব উৎপল কুমাৰ সিঙক এই জাননী পৰীক্ষা কৰিবলৈ নিৰ্দেশ দিছে। সংসদীয় নিয়ম অনুসৰি অনাস্থা প্রস্তাৱৰ সন্দর্ভত চূড়ান্ত সিদ্ধান্ত নোলোৱালৈকে ওম বিৰলাই অধিৱেশনৰ অধ্যক্ষতা নকৰে৷
ফলত বাজেট অধিৱেশনৰ প্ৰথম খণ্ডৰ বাকী তিনিদিন (বুধবাৰ, বৃহস্পতিবাৰ আৰু শুকুৰবাৰ) সংসদৰ নিম্ন সদনত ওম বিৰলাক দেখা নাযাব। সচিবালয়ৰ সূত্ৰ অনুসৰি, এই নীতিগত সিদ্ধান্তৰ বিষয়ে ইতিমধ্যে ওম বিৰলাক অৱগত কৰোৱা হৈছে। লোকসভা সচিবালয়ৰ সূত্ৰ অনুসৰি, মাৰ্চ মাহত অনুষ্ঠিত হ’বলগীয়া বাজেট অধিৱেশনৰ দ্বিতীয় খণ্ডত অনাস্থা প্ৰস্তাৱ সন্দৰ্ভত সিদ্ধান্ত লোৱা হ’ব।
উল্লেখ্য যে লোকসভাৰ বাজেট অধিৱেশনত ৰাষ্ট্ৰপতিৰ ভাষণত ধন্যবাদ জ্ঞাপনৰ সময়ত বিভিন্ন বিৰোধী সাংসদৰ সৈতে ৰাহুল গান্ধীক কথা ক’বলৈ নিদিয়া বুলি বিৰোধী শিবিৰে অভিযোগ উত্থাপন কৰে। তদুপৰি ৮ গৰাকী সাংসদক নিলম্বন কৰা হৈছে। এই দুটা ঘটনাৰ প্ৰতিবাদত অধ্যক্ষৰ বিৰুদ্ধে অনাস্থা প্ৰস্তাৱ দাখিল কৰা হৈছে।
প্ৰথম অৱস্থাত জানিব পৰা মতে, বিৰোধী শিবিৰৰ ১১৮ গৰাকী সাংসদে অনাস্থা প্ৰস্তাৱৰ জাননীত স্বাক্ষৰ কৰিছে। কংগ্ৰেছ, ডি এম কে আৰু সমাজবাদী পাৰ্টীৰ লগতে শিৱসেনা (উদ্ধৱ), এন চি পি (শাৰদ), আৰ জে ডি আৰু বাওঁপন্থী সাংসদসকলেও স্বাক্ষৰ কৰিছে। অৱশ্যে তৃণমূলৰ সাংসদসকলে অনাস্থা প্ৰস্তাৱত স্বাক্ষৰ কৰা নাই।
