অপাৰেচন সিন্দুৰত ভাৰতৰ সফলতাৰ ওপৰত আলোকপাত কৰা হ’ব বায়ুসেনাৰ অনুশীলনত। অহা ২৭ ফেব্ৰুৱাৰীত ৰাজস্থানৰ পোখৰাণ (Pokhran, Rajasthan)ত আয়োজন কৰা হ’ব ‘এক্সাৰচাইজ বায়ুশক্তি’।এই অনুশীলনত বায়ুসেনাৰ ৰাফেল, সুখয়-৩০, মিগ-২৯, তেজছৰ দৰে যুদ্ধ বিমান জড়িত থাকিব।
যোৱা বছৰ অপাৰেচন সিন্দুৰৰ সময়ত ভাৰতীয় বায়ুসেনা (Indian Air Force)ৰ ভূমিকা আছিল অনবদ্য। চাৰিদিনীয়া সংঘাতৰ অন্তত ভাৰতীয় বায়ুসেনাই আকাশৰ ওপৰত নিয়ন্ত্ৰণ লাভ কৰে। উক্ত হেঁচাতে পাকিস্তানে যুদ্ধবিৰতিৰ প্ৰস্তাৱ আগবঢ়াইছিল। শেহতীয়াকৈ ছুইজাৰলেণ্ডৰ এটা সামৰিক গৱেষণা প্ৰতিষ্ঠানে এই কথা দাবী কৰিছে। এইবাৰ ভাৰতীয় বায়ুসেনাই এই অনুশীলনত দেখুৱাব যে কেনেদৰে অপাৰেচন সিন্দুৰৰ সময়ত ভাৰতীয় যুদ্ধ বিমানে সফলতা অৰ্জন কৰিছিল।
এইবাৰৰ গণৰাজ্য দিৱসত দিল্লীৰ পেৰেডৰ সময়ত ‘সিন্দুৰ’ অভিযানৰ দৰে পৰ্যায়ৰ প্ৰভাৱ দেখা গৈছিল। সিন্দুৰ অভিযানত যিদৰে যুদ্ধ বিমান ব্যৱহাৰ কৰা হৈছিল, ঠিক সেইদৰে যুদ্ধৰ সামগ্ৰীৰে সজাই তোলা হৈছিল। গণৰাজ্য দিৱসত ৰাফেল আৰু মিগকে ধৰি মুঠ সাতখন যুদ্ধ বিমান সজাই তোলা হৈছিল। কৰ্তব্য পথত পেৰেডৰ সময়ত দুখন ৰাফেল, দুখন মিগ-২৯, দুখন চুখই-৩০ আৰু এখন জাগুৱাৰ যুঁজাৰু বিমানে আকাশেৰে উৰি যায়।
বিগত বৰ্ষৰ এপ্ৰিল মাহত জম্মু-কাশ্মীৰৰ পহেলগামত সন্ত্ৰাসবাদীয়ে হত্যাকাণ্ড সংঘটিত কৰিছিল। উক্ত সন্ত্ৰাসবাদী আক্ৰমণৰ পিছত ভাৰতে পাকিস্তান আৰু পাকিস্তান অধিকৃত কাশ্মীৰত নিৰ্দিষ্ট কিছুমান সন্ত্ৰাসবাদী শিবিৰৰ বিৰুদ্ধে প্ৰতিশোধ লয়। বিগত বৰ্ষৰ ৭ মে’ৰ পুৱা ভাৰতীয় বায়ুসেনাই পাকিস্তানী সন্ত্ৰাসবাদী দুটা সংগঠন জয়ছ-ই-মহম্মদ আৰু লস্কৰ-ই-তৈবাৰ কেইবাটাও ঘাটিত আক্ৰমণ চলাইছিল। ভাৰতে বাহাৱালপুৰ আৰু মুৰিদকেত দীৰ্ঘ দূৰত্বৰ ক্ষেপণাস্ত্ৰৰে অব্যৰ্থ আক্ৰমণ চলায়। চাৰিদিনীয়া সামৰিক সংঘৰ্ষৰ অন্তত পাকিস্তানে যুদ্ধবিৰতিৰ প্ৰস্তাৱ আগবঢ়ায়।
