মঙলবাৰে লোকসভাৰ অধ্যক্ষ (Speaker of the Lok Sabha) ওম বিৰলা (Om Birla)ৰ বিৰুদ্ধে অনাস্থা প্ৰস্তাৱ (Vote of no confidence against)ৰ জাননী দাখিল কৰা হয়। কিন্তু বিৰোধী দলসমূহে দাখিল কৰা জাননীখনত চাৰিটা ঠাইত ভুল (Mistakes in four places in the letter) তাৰিখ লিখা আছিল বুলি সংবাদ সংস্থা পি টি আয়ে সূত্ৰৰ উদ্ধৃতি দি প্ৰকাশ কৰিছে। সূত্ৰটোৱে দাবী কৰে যে অধ্যক্ষই নিজে লোকসভা সচিবালয়ক এই ‘ভুল’ জাননী সংশোধন কৰি যাৱতীয় ব্যৱস্থা গ্ৰহণ কৰিবলৈ নিৰ্দেশ দিছে। অৱশ্যে কোনো এটা পক্ষই এই সন্দৰ্ভত আনুষ্ঠানিকভাৱে কোনো মন্তব্য কৰা নাই।
মঙলবাৰে বিয়লি কংগ্ৰেছৰ মুখ্য হুইপ কে সুৰেশে লোকসভা সচিবালয়ত অধ্যক্ষৰ বিৰুদ্ধে সংসদ আইনৰ ধাৰা ৯৪(চি)ৰ অধীনত জাননী দাখিল কৰে। লোকসভাত কংগ্ৰেছৰ উপ-দলপতি গৌৰৱ গগৈ আৰু হুইপ মহম্মদ জাভেদ উপস্থিত থাকে। সমাজবাদী পাৰ্টী আৰু ডি এম কেৰ প্ৰতিনিধিও উপস্থিত থাকে।
পি টি আইৰ প্ৰতিবেদন অনুসৰি, মঙলবাৰে বিয়লি লোকসভাৰ মহাসচিব উৎপল কুমাৰ সিঙক দাখিল কৰা জাননীখনত চাৰিটা ঠাইত ভুল তাৰিখ লিখা আছিল। লোকসভাৰ এক সূত্ৰৰ উদ্ধৃতি দি প্ৰতিবেদনত উল্লেখ কৰা হৈছে যে নিয়ম অনুসৰি জাননী খাৰিজ কৰাৰ কথা আছিল।
সূত্ৰৰ উদ্ধৃতি দি পি টি আইৰ প্ৰতিবেদনত লগতে কোৱা হৈছে যে লোকসভাৰ অধ্যক্ষই লোকসভা সচিবালয়ক ভুল তাৰিখৰ জাননীখন শুধৰণি কৰি ইয়াৰ পিছত যাৱতীয় ব্যৱস্থা গ্ৰহণ কৰিবলৈ নিৰ্দেশ দিছে। কিন্তু প্ৰতিবেদনত উল্লেখ কৰা হৈছে যে মঙলবাৰে নিশা বিৰোধীয়ে পূৰ্বৰ জাননী প্ৰত্যাহাৰ কৰি নতুন জাননী দাখিল কৰে।
এক সূত্ৰই দাবী কৰিছে যে লোকসভা সচিবালয়ে নিয়ম অনুসৰি নতুন জাননীখনো পৰীক্ষা কৰিব। অহা ৯ মাৰ্চৰ পৰা লোকসভাত দ্বিতীয় পৰ্যায়ৰ বাজেট অধিবেশন আৰম্ভ হোৱাৰ পিছত অনাস্থা প্ৰস্তাৱৰ জাননী সন্দৰ্ভত সিদ্ধান্ত লোৱা হ’ব। সংসদীয় পদ্ধতি অনুসৰি অনাস্থা প্ৰস্তাৱৰ ওপৰত চূড়ান্ত সিদ্ধান্ত নোলোৱালৈকে অধ্যক্ষই অধিৱেশন পৰিচালনা নকৰে। ফলত বাজেট অধিৱেশনৰ প্ৰথম খণ্ডৰ বাকী তিনিদিন (বুধবাৰ, বৃহস্পতিবাৰ আৰু শুকুৰবাৰ) সংসদৰ নিম্ন সদনত দেখা নাযাব বিৰলাক। সচিবালয়ৰ সূত্ৰ অনুসৰি, এই নীতিগত সিদ্ধান্তৰ বিষয়ে ইতিমধ্যে বিৰলাক অৱগত কৰিছে।
