পাকিস্তান চৰকাৰে মাত্ৰ ৮ দিনৰ ভিতৰতে বিশ্বকাপত ভাৰতৰ বিৰুদ্ধে খেলাৰ সিদ্ধান্ত লৈছে। কিন্তু তেওঁলোক কেনেদৰে নৰম হ’ল আৰু ১৫ ফেব্ৰুৱাৰীত ভাৰত-পাকিস্তানৰ মেচ কেনেকৈ সম্ভৱ হ’ল তাৰ আঁৰৰ কাহিনী পোহৰলৈ আহিছে।
সংবাদ সংস্থা পি টি আইৰ মতে, পাকিস্তান ক্ৰিকেট ব’ৰ্ডৰ অধ্যক্ষ মহছিন নাকৱীয়ে নিজেই বাংলাদেশ ক্ৰিকেট ব’ৰ্ডক চিঠি লিখিব লাগে বুলি কয়। সেই চিঠিত যেন লিখা থাকে যে বি চি বিয়ে পাকিস্তান ব’ৰ্ডক ভাৰতৰ বিৰুদ্ধে মেচ খেলিবলৈ অনুৰোধ জনাইছে।
১ ফেব্ৰুৱাৰীত পাকিস্তান চৰকাৰে ঘোষণা কৰিছিল যে বিশ্বকাপত ভাৰতৰ বিৰুদ্ধে মেচখনত তেওঁলোকেল খেলিব নোৱাৰিব। তেতিয়াৰ পৰাই আৰম্ভ হৈছে নাটক আৰু বিতৰ্ক। বিভিন্ন দেশৰ ক্ৰিকেট ব’ৰ্ডে পাকিস্তানক এই মেচ খেলিবলৈ হেঁচা প্ৰয়োগ কৰিছে। কাৰণ, ভাৰত-পাকিস্তানৰ মেচ যদি নহয় তেতিয়া আই চি চিৰ বহুত টকাৰ ক্ষতি হ’ব।
আৰু তাৰ ফলত সকলো দেশেই ক্ষতিগ্ৰস্ত হ’ব। কাৰণ আই চি চিয়ে বিভিন্ন দেশৰ মাজত যি লাভ বিতৰণ কৰে সেয়াও কমি যাব।
ক্ৰমান্বয়ে পাকিস্তানৰ ওপৰত এই হেঁচা বৃদ্ধি পায়। বাংলাদেশৰ উপৰি শ্ৰীলংকা আৰু সংযুক্ত আৰব আমিৰশ্বাহীৰ ব’ৰ্ডেও পাকিস্তানলৈ পত্ৰ লিখে।
পাকিস্তান ব’ৰ্ডে বুজি পালে যে তেওঁলোকৰ সিদ্ধান্ত সলনি কৰাৰ বাহিৰে আন উপায় নাই। কিন্তু যদি তেওঁলোকে পোনপটীয়াকৈ পূৰ্বৰ স্থিতিৰ বিপৰীতে ১৫ ফেব্ৰুৱাৰীত ভাৰত-ভাৰতৰ মেচ খেলিবলৈ সন্মত হ’লহেঁতেন তেন্তে কোনো মান নাথাকিলহেঁতেন।
পি টি আইৰ মতে, সেইবাবেই নাকৱীয়ে বাংলাদেশৰ ব’ৰ্ডক পত্ৰযোগে তেওঁলোকক কয় যেন পাকিস্তানে ভাৰতৰ বিৰুদ্ধে মেচখন খেলে। সেই চিঠিখনৰ কথা মনত ৰাখি নাকৱীয়ে দাবী কৰিছিল যে বাংলাদেশে অনুৰোধ কৰাৰ বাবেহে তেওঁলোকে খেলিবলৈ সন্মত হৈছে।
সোমবাৰে নিশা নাকৱীয়ে পাকিস্তানৰ প্ৰধানমন্ত্ৰী শ্বাহবাজ শ্বৰীফৰ সৈতে সাক্ষাৎ কৰে। ইয়াৰ পূৰ্বে দেওবাৰে আই চি চি আৰু বাংলাদেশ ক্ৰিকেট ব’ৰ্ডৰ সৈতে বৈঠকত মিলিত হয় নাকৱী। উক্ত বৈঠকৰ বিষয়ে নাকৱীয়ে শ্বাহবাজ শ্বৰীফক অৱগত কৰিছিল।
তাতে তেওঁ কয় যে বাংলাদেশ ক্ৰিকেট ব’ৰ্ডে পাকিস্তানক ভাৰতৰ বিৰুদ্ধে মেচখন খেলিবলৈ অনুৰোধ জনাইছে। সংযুক্ত আৰব আমিৰশ্বাহী আৰু শ্ৰীলংকাৰ পৰাও একেই অনুৰোধ আহিছিল। কোৱা হৈছে যে এই অনুৰোধৰ পিছত পাকিস্তানৰ শীৰ্ষ নেতৃত্বই মেচখন খেলাৰ সিদ্ধান্ত লয়।
পাকিস্তান চৰকাৰে এক বিবৃতিত কয়, “বন্ধুত্বপূৰ্ণ দেশৰ বিভিন্ন আলোচনা আৰু অনুৰোধৰ অন্তত পাকিস্তান চৰকাৰে নিজৰ ক্ৰিকেট দলটোক ভাৰতৰ বিৰুদ্ধে খেলিবলৈ নিৰ্দেশ দিছে। ক্ৰিকেটৰ সংস্কৃতি ৰক্ষা আৰু সদস্য দেশৰ মাজত ক্ৰিকেটক অধিক জনপ্ৰিয় কৰাৰ লক্ষ্যৰে এই সিদ্ধান্ত গ্ৰহণ কৰা হৈছে।” পাকিস্তানৰ প্ৰধানমন্ত্ৰীয়ে দেশৰ ক্ৰিকেট দলক অভিনন্দন জ্ঞাপন কৰে। তেওঁ আশা কৰিছে যে ক্ৰিকেটাৰসকলে খেলপথাৰত ক্ৰীড়াসুলভ আচৰণ বজাই ৰাখিব।
উল্লেখ্য যে সোমবাৰে নিশা বি চি বিয়েও এক বিবৃতি প্ৰকাশ কৰি পাকিস্তানক আনুষ্ঠানিকভাৱে ভাৰতৰ বিৰুদ্ধে মেচখন খেলিবলৈ অনুৰোধ জনায়। বাংলাদেশ ব’ৰ্ডে বিবৃতিটোত লিখিছে, “বি চি বিয়ে পাকিস্তান ক্ৰিকেট ব’ৰ্ড, আই চি চি আৰু আন সকলো পক্ষকে শেহতীয়াকৈ বিভিন্ন বিষয়ত উদ্ভৱ হোৱা সমস্যাসমূহৰ ইতিবাচক ভূমিকা লোৱাৰ বাবে কৃতজ্ঞতা জ্ঞাপন কৰিছে।
পি চি বিৰ অধ্যক্ষ মহছিন ৰাজা নাকৱী, তেওঁৰ ব’ৰ্ড আৰু পাকিস্তানী অনুৰাগীসকললৈ বিশেষ কৃতজ্ঞতা জ্ঞাপন কৰিছোঁ।” বি চি বিৰ বিবৃতিত আমিনুলে কয়, “পাকিস্তানে এই কঠিন সময়ত বাংলাদেশক সমৰ্থন কৰিবলৈ যিদৰে সামৰ্থ্যৰ বাহিৰলৈ গৈছে, তাক দেখি আমি গভীৰভাৱে উৎসাহিত হৈছো। আমাৰ ভাতৃত্ববোধ জীয়াই থাকক।”
লগতে তেওঁ কয়, “কালি আমাৰ পাকিস্তানৰ চুটি ভ্ৰমণৰ ফলাফল আৰু যি আলোচনা হৈছিল তাৰ ভিত্তিত আমি পাকিস্তানক অনুৰোধ জনাইছোঁ যে ১৫ ফেব্ৰুৱাৰীত ভাৰতৰ বিৰুদ্ধে মেচখন খেলিব লাগে। ইয়াৰ দ্বাৰা সমগ্ৰ ক্ৰিকেট পৰিৱেশতন্ত্ৰই লাভৱান হ’ব।” উল্লেখ্য যে পাকিস্তানৰ বিদ্ৰোহৰ কাৰণ আছিল বাংলাদেশক বিশ্বকাপৰ পৰা বহিষ্কাৰ কৰা। সোমবাৰে নিশা আই চি চিয়েও এক বিবৃতি প্ৰকাশ কৰে।
তেওঁলোকে কয়, “শেহতীয়া পৰিস্থিতিৰ বাবে বাংলাদেশক কোনো ধৰণৰ আৰ্থিক, ক্ৰীড়া বা প্ৰশাসনিক শাস্তি দিয়া নহ’ব। প্ৰয়োজন হ’লে বাংলাদেশে সমস্যা সমাধান সমিতিৰ ওচৰত আবেদন কৰিব পাৰে। সদস্য দেশসমূহৰ প্ৰতি থকা নিৰপেক্ষতা আৰু ন্যায়ৰ কথা মনত ৰাখি আই চি চিয়ে এই সিদ্ধান্ত গ্ৰহণ কৰিছে। শাস্তি দিয়াৰ পৰিৱৰ্তে সমৰ্থন কৰাৰ সিদ্ধান্ত লৈছে।”
বৈঠকত হোৱা আলোচনা অনুসৰি, আগন্তুক পাঁচ বছৰৰ ভিতৰত অৰ্থাৎ ২০৩১ চনৰ ভিতৰত বাংলাদেশত আই চি চি প্ৰতিযোগিতা আয়োজন কৰাৰ সিদ্ধান্ত লোৱা হৈছে। এই প্ৰতিযোগিতা ২০৩১ চনৰ এদিনীয়া বিশ্বকাপৰ পূৰ্বে অনুষ্ঠিত হ’ব। বাংলাদেশ এখন বৃহৎ প্ৰতিযোগিতা আয়োজন কৰিবলৈ দক্ষ আৰু সক্ষম বুলি বিশ্বাসেৰে এই সিদ্ধান্ত গ্ৰহণ কৰিছে আই চি চিয়ে।
আইচিচিৰ মুখ্য কাৰ্যবাহী সঞ্জয় গুপ্তাই কয়, “টি-২০ বিশ্বকাপত বাংলাদেশ নথকাৰ বাবে আক্ষেপ থাকিব। অৱশ্যে বাংলাদেশক ক্ৰিকেট ৰাষ্ট্ৰ হিচাপে গঢ়ি তোলাৰ দায়িত্বৰ পৰা আই চি চিয়ে আঁতৰি নাযায়। আই চি চিয়ে বাংলাদেশৰ সৈতে ঘনিষ্ঠভাৱে কাম কৰিব বিচাৰে, যাতে ভৱিষ্যতে দেশখনত ক্ৰিকেটৰ বিকাশ ঘটিব পাৰে।”
