কোকৰাঝাৰ (Kokrajhar) জিলাত ক্ৰমে স্বাভাৱিক অৱস্থা পুনৰ ঘূৰি আহিবলৈ ধৰিছে। সাম্প্ৰতিক হিংসাত্মক ঘটনাৰ পিছত নিৰাপত্তা বাহিনীয়ে কঠোৰ সতৰ্কতা অৱলম্বন কৰিছে৷ সেনা বাহিনীয়ে টহল তীব্ৰ কৰাত সামগ্ৰিক পৰিস্থিতি নিয়ন্ত্ৰণলৈ অহা পৰিলক্ষিত হৈছে। যোৱা ২০ জানুৱাৰীৰ সন্ধ্যাৰ পিছত কোনো নতুন ঘটনা সংঘটিত হোৱা নাই বুলি আৰক্ষী-বাহিনীয়ে প্ৰকাশ কৰিছে৷ উল্লেখ্য যে কোকোৰাঝাৰত বড়ো আৰু আদিবাসী সম্প্ৰদায়ৰ মাজত হোৱা সংঘৰ্ষত দুজনৰ মৃত্যু হয় আৰু অশান্তিৰ সময়ছোৱাত পৃথক দুৰ্ঘটনাত আন এজন নিহত হয়। প্ৰতিবাদৰ পৰা আৰম্ভ হোৱা এই হিংসাত্মক ঘটনা অনিয়ন্ত্রিত হৈ পৰাৰ সময়ত ৰাজহুৱা সম্পত্তি জ্বলাই দিয়া আৰু সংঘৰ্ষলৈ পৰিণত হোৱা পিছত প্ৰশাসনে অতিৰিক্ত নিৰাপত্তা বাহিনী মোতায়েন কৰে।
চৰকাৰী সূত্ৰই জনোৱা অনুসৰি, সংবেদনশীল অঞ্চলসমূহত চাৰিটা সেনাৰ বাহিনীৰ গোট মোতায়েন কৰে। লগতে চিআৰপিএফ আৰু অসম আৰক্ষীয়ে উক্ত অঞ্চলসমূহত অবিৰত টহল চলাই আছে। পুনৰ সংঘবদ্ধ হোৱা বা হিংসা বাঢ়ি অহাৰ সকলো সম্ভাৱনা দমন কৰিবলৈ ফ্লেগ মার্চ আৰু চেক-পইণ্ট বৃদ্ধি কৰা হৈছে। জিলাখনৰ পাঁচখন বিদ্যালয়ত স্থাপন কৰা শিবিৰত বৰ্তমান এক হাজাৰতকৈ অধিক লোকে আশ্ৰয় লৈ আছে। প্ৰশাসনে স্থানচ্যুত পৰিয়ালসমূহক খাদ্য, চিকিৎসা সহায় আৰু দৈনন্দিন প্ৰয়োজনীয় সামগ্ৰী যোগান ধৰি আছে আৰু পৰিস্থিতি সম্পূৰ্ণৰূপে নিয়ন্ত্ৰণ হোৱাৰ পাছত তেওঁলোকক ঘৰৰ ব্যৱস্থা কৰি দিবলৈ কাৰ্য হাতত লৈছে।
ভাৰতীয় ন্যায় সংহিতাৰ ধাৰা ১৬৩ অনুসাৰী জাৰি কৰা নিষেধাজ্ঞা বলবৎ হৈ আছে আৰু উত্তেজনামূলক বিষয়বস্তু প্ৰসাৰিত হোৱাটো ৰোধ কৰিবলৈ ইণ্টাৰনেট সেৱাও স্থগিত ৰখা হৈছে৷ সোমবাৰৰ পুৱা কাৰিগাঁৱৰ মানসিং ৰোডৰ ওচৰত এখন বাহন দলীয়ে আক্রমণ কৰা ঘটনাও ঘটিছিল। আদিবাসী সম্প্ৰদায়ৰ দুজন লোক আহত হয় আৰু পিছত সেই বাহনখন অগ্নিসংযোগ কৰা হয়। আহত দুজনৰ ভিতৰত এজনক চিকিৎসালয়ৰ পৰা যাবলৈ দিয়া হৈছে যদিও আনজন চিকিৎসাৰ সময়তে মৃত্যু হয়। মঙলবাৰৰ পূৰ্বাহ্নত দুটা সম্প্ৰদায়ৰ লোকেই ৰাষ্ট্ৰীয় ঘাইপথ অৱৰোধ, এটা চৰকাৰী কাৰ্যালয় জ্বলাই দিয়া আৰু এখন থানা আক্রমণ কৰাৰ ঘটনা ঘটিছিল।
ইপিনে অশান্তিজৰ্জৰ পৰিস্থিতি উদয় হোৱাৰ সময়ত আৰক্ষীয়ে লাঠি চালনা আৰু কন্দোৱা গেছ প্ৰয়োগ কৰে, যাৰ ফলত কেইবাজনো লোক, লগতে কেইজনমান আৰক্ষী কৰ্মীও আহত হয়। উচ্চপদস্থ কৰ্মচাৰীয়ে সমগ্ৰ পৰিস্থিতিক তীব্ৰ নজৰ দি আছে আৰু প্ৰয়োজনত অতিৰিক্ত বাহিনী মোতায়েনৰ বাবে সকলো ব্যৱস্থা ৰাখিছে। প্ৰশাসনে জনসাধাৰণক শান্তি-শৃংখলা বজাই ৰাখিবলৈ আহ্বান জনাইছে আৰু হিংসাত জড়িতসকলৰ বিৰুদ্ধে কঠোৰ ব্যবস্থা লোৱা হ’ব বুলি স্পষ্ট ভাষাৰে জনাইছে।
