
হিয়াৰ আমঠু তথা প্ৰাণৰ শিল্পী জুবিন গাৰ্গৰ (Zubeen Garg) অনুপস্থিতিত আজি ৰাজ্যবাসীয়ে দ্বিতীয়বাৰৰ বাবে উদযাপন কৰিছে তেওঁৰ জন্মদিন। এই উপলক্ষে সোণাপুৰৰ জুবিন ক্ষেত্ৰত দিনজোৰাকৈ বিভিন্ন কাৰ্যসূচী অনুষ্ঠিত কৰা হয়। ইয়াৰ উপৰি ৰাজ্যৰ বিভিন্ন প্ৰান্ততো বিভিন্ন অনুষ্ঠান-প্ৰতিষ্ঠানে জুবিন গাৰ্গৰ ৫৫ সংখ্যক জন্মদিন উদযাপন কৰি বিভিন্ন কাৰ্যসূচী অনুষ্ঠিত কৰে। আনহাতে, জুবিন গাৰ্গৰ অনুৰাগীসকলে নিশা ১২ বজাত জুবিন গাৰ্গৰ জন্মদিনৰ কেক কাটি পুৰণি স্মৃতি ৰোমন্থন কৰে।

ইয়াৰ মাজতে অসম চৰকাৰৰ তৰফৰ পৰা জুবিন গাৰ্গৰ জন্মদিন উদযাপনৰ বিশেষ কাৰ্যসূচী গ্ৰহণ নকৰিলেও এই পবিত্ৰ দিনটোত এক বিশেষ ঘোষণাৰে বিশিষ্ট শিল্পীগৰাকীলৈ শ্ৰদ্ধা নিবেদন কৰিছে। সামাজিক মাধ্যমৰ এটা পোষ্টত মুখ্যমন্ত্ৰীয়ে জুবিন গাৰ্গৰ জন্মদিনত শ্ৰদ্ধা নিবেদন কৰি জুবিন ক্ষেত্ৰ নিৰ্মাণৰ প্ৰথম পৰ্যায়ৰ কামৰ বাবে ১৫ কোটি টকা অনুমোদন জনায়।
এই কথা উল্লেখ কৰি মুখ্যমন্ত্ৰীয়ে অনুমোদন পত্ৰত চহী কৰাৰ এটা ভিডিঅ’ আপলোড কৰি পোষ্টটোত মুখ্যমন্ত্ৰীয়ে লিখিছে, “আজি আমাৰ সকলোৰে প্ৰাণৰ আপোন জুবিনৰ ওপজা দিনত জুবিন ক্ষেত্ৰৰ প্ৰথম পৰ্যায়ৰ কামৰ অনুমোদন জনালোঁ।”
তেওঁ লগতে লিখিছে, “প্ৰজন্মৰ পিছত প্ৰজন্মই জুবিন ক্ষেত্ৰৰ মাজেৰে জুবিনক অনুভৱ কৰিব, তেওঁ সৃষ্টিৰাজিৰ সৈতে চিনাকি হ’ব আৰু সেই সৃষ্টিৰ সুবাস বুকুত সামৰি আগুৱাই যাব।”

উল্লেখ্য যে জুবিন ক্ষেত্ৰ নিৰ্মাণৰ বাবে ৰূপৰেখা প্ৰস্তুত কৰিবলৈ গঠন কৰা বিশেষজ্ঞ সমিতিয়ে ইতিমধ্যে প্ৰকল্পৰ খচৰা প্ৰস্তুত কৰি চৰকাৰক অৰ্পণ কৰিছে। আনহাতে, প্ৰকল্পটোৰ বাবে ভূমি সম্পৰ্কীয় বিষয়ো নিষ্পত্তি হৈছে। এতিয়া প্ৰকল্প নিৰ্মাণৰ কাম কেতিয়াৰ পৰা আৰম্ভ হয় তাৰ বাবে জুবিন অনুৰাগীয়ে অধীৰ আগ্ৰহেৰে অপেক্ষা কৰিছে।













