
ভিৰ নিয়ন্ত্ৰণৰ সময়ত মহিলা আৰক্ষীয়েহে যে মহিলাক চম্ভালিব লাগে তেনে কোনো বাধ্যবাধকতা নাই। এই কথা দিল্লী আৰক্ষীয়ে উচ্চতম ন্যায়ালয়ত দাখিল কৰা শপতনামাত উল্লেখ কৰিছে। ‘দ্য হিন্দু’ৰ এক প্ৰতিবেদন অনুসৰি, দিল্লী আৰক্ষীয়ে (Delhi Police) আদালতত কয় যে আইন অনুসৰি গ্ৰেপ্তাৰ বা তালাচীৰ সময়ত মহিলা আৰক্ষীয়েহে মহিলাক চম্ভালিব লাগে। কিন্তু কোনো ভিৰ নিয়ন্ত্ৰণ পৰিস্থিতিত তেনে কোনো আইনী বাধ্যবাধকতা নাথাকে।

শেহতীয়াকৈ দিল্লীত মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত আৰক্ষীৰ ভূমিকাক লৈ বিভিন্ন মহলত প্ৰশ্ন উত্থাপন হৈছে। প্ৰতিবাদী কাৰ্যসূচীৰ সময়ত মহিলা প্ৰতিবাদকাৰী আৰু সাংবাদিকৰ সৈতে পুৰুষ আৰক্ষী জোৱানে অসৎ আচৰণ কৰাৰ অভিযোগো উত্থাপন হৈছিল। এই সন্দৰ্ভত কেইবাটাও সংগঠনে উচ্চতম ন্যায়ালয়ত গোচৰ তৰিছে। সেই গোচৰৰ পৰিপ্ৰেক্ষিতত শেহতীয়াকৈ দিল্লী আৰক্ষীয়ে শপতনামাৰ জৰিয়তে আদালতত নিজৰ বক্তব্য দাখিল কৰে।
শপতনামাত আৰক্ষীয়ে কয়, “মহিলা সাংবাদিকৰ লগত অসৎ আচৰণৰ অভিযোগৰ পৰিপ্ৰেক্ষিতত এই কথা দাখিল কৰা হৈছে যে ভিৰ নিয়ন্ত্ৰণৰ সময়ত মহিলা (আৰক্ষী) কৰ্মী উপস্থিত থকাৰ কোনো আইনী বাধ্যবাধকতা নাই।”
আৰক্ষীৰ মতে, ভিৰ নিয়ন্ত্ৰণৰ বাবে মহিলা আৰক্ষী কৰ্মী নিয়োগ কৰাটো এটা ‘কাৰ্যকৰী বিবেচনা’। অৰ্থাৎ কামটো দক্ষতাৰে পালন কৰিবলৈ কৰা হয়। মহিলাসকলে অংশগ্ৰহণ কৰা প্ৰতিবাদত শালীনতা বজাই ৰখা, অপ্ৰয়োজনীয় সংঘৰ্ষৰ পৰা আঁতৰি থকা, প্ৰতিবাদস্থলীত উত্তেজনা নিয়ন্ত্ৰণ কৰাকে ধৰি বিভিন্ন কাৰকৰ ওপৰত এইবোৰ নিৰ্ভৰ কৰে। একে সময়তে আৰক্ষীয়ে লগতে কয় যে ভিৰ নিয়ন্ত্ৰণৰ সময়ত প্ৰতিবাদস্থলীত পুৰুষ আৰক্ষী জোৱানৰ উপস্থিতি কোনো ধৰণৰ অসৎ আচৰণ বুলি গণ্য কৰিব নোৱাৰি।
দিল্লী আৰক্ষীয়ে আদালতত কয় যে এজন পুৰুষ আৰক্ষীয়ে যিকোনো জৰুৰীকালীন পৰিস্থিতিত ‘ফাৰ্ষ্ট ৰেচপণ্ডাৰ’ হিচাপে কাম কৰিব পাৰে। ইয়াৰ ওপৰত কোনো আইনী বাধা নাই। এগৰাকী মহিলা আৰক্ষীক কৰ্তব্যৰত অৱস্থাত সহায় কৰাত কোনো বাধা নাই। দিল্লী আৰক্ষীয়ে কয় যে এনে সিদ্ধান্ত ক্ষন্তেক সময়ৰ ভিতৰতে ল’ব লাগিব।
উল্লেখ্য যে ১১ ছেপ্টেম্বৰত উচ্চতম ন্যায়ালয়ে আৰক্ষীক জনাইছিল যে কোনো সাংবাদিক, অধিবক্তা বা পেছাদাৰী কৰ্তব্যত নিয়োজিত কোনো ব্যক্তিয়ে কৰ্তব্য পালন কৰাৰ সময়ত বাধা দিব নালাগে। শপতনামাত আদালতৰ এই নিৰ্দেশৰ কথাও উল্লেখ কৰিছে আৰক্ষীয়ে। ইয়াৰ উপৰি কোৱা হৈছে যে ৰিল বনোৱা, নেট ইনফ্লুৱেন্সাৰ বা বিশৃংখলতা বিয়পোৱাসকলৰ ক্ষেত্ৰত এই আদেশ প্ৰয়োগ কৰিব নোৱাৰি, যদিহে তেওঁলোকে আৰক্ষীৰ কথা নুশুনে।
দিল্লী আৰক্ষীয়ে সংবাদ মাধ্যমৰ ভূমিকাক সন্মান জনায় বুলি জানিবলৈ দিয়ে। কিন্তু প্ৰতিবাদৰ সময়ত কেমেৰা আৰু মাইক্ৰ’ফোন লৈ সাংবাদিকৰ ৰূপ লোৱা বহুতেই আছিল। ৰিল বনোৱাসকলক সাংবাদিকৰ মৰ্যাদা দিব পাৰিব নে নোৱাৰি সেয়া এতিয়াও সিদ্ধান্ত লোৱা হোৱা নাই বুলিও আৰক্ষীয়ে জানিবলৈ দিয়ে।
কিন্তু প্ৰতিবাদস্থলীত সাংবাদিক আৰু ৰিল নিৰ্মাতাসকলৰ মাজত পাৰ্থক্য কৰাটো তেওঁলোকৰ বাবে কঠিন হৈ পৰে। কিন্তু যেতিয়ালৈকে কোনোবাই আইন-শৃংখলা বিঘ্নিত কৰিবলৈ চেষ্টা কৰা বুলি অনুভৱ কৰা হৈছিল, তেতিয়ালৈকে তেওঁলোকৰ কামত কোনো বাধা আৰোপ কৰা হোৱা নাছিল।










