সোমবাৰে কোকৰাঝাৰত সংঘটিত হিংসাত্মক (Kokrajhar violence) ঘটনাত গভীৰ উদ্বেগ প্ৰকাশ কৰি বিপিএফ প্ৰধান হাগ্ৰামা মহিলাৰী (Hagrama Mahilari)য়ে ইয়াক এক দুৰ্ভাগ্যজনক ঘটনা বুলি উল্লেখ কৰে। লগতে বৰ্তমান পৰিস্থিতিত সমাজৰ সকলো স্তৰৰ লোককে শান্তি-শৃংখলা অটুট ৰাখি সংযম ৰক্ষা কৰিবলৈ আহ্বান জনায়।
সোমবাৰৰ ঘটনাৰ পিছত মঙলবাৰে সৃষ্টি হোৱা হিংসাত্মক ঘটনা সন্দৰ্ভত প্ৰতিক্ৰিয়া প্ৰকাশ কৰি হাগ্ৰামা মহিলাৰীয়ে কয় যে এই অশান্তি মূলতঃ এক ভুল-বুজাবুজিৰ পৰা সৃষ্টি হৈছে। লগতে কোনো বহিৰাগত শক্তিয়ে পৰিস্থিতি অধিক উত্তপ্ত কৰাৰ সুযোগ গ্ৰহণৰ চেষ্টা কৰি আছে বুলি স্পষ্টকৈ উল্লেখ কৰি কয় যে এনে বিভ্রান্তিমূলক প্ৰয়াস কোনো কাৰণতেই সহ্য কৰা নহ’ব। আনহাতে, পৰিস্থিতি যাতে অধিক জটিল নহয় তাৰবাবে সমাজৰ সকলো শ্ৰেণীৰ লোককে সমন্বিতভাৱে দায়িত্ব লোৱাটো অতি প্ৰয়োজনীয় বুলি মন্তব্য কৰে।
লগতে আইন-শৃংখলা ৰক্ষাৰ ক্ষেত্ৰত গুৰুত্ব আৰোপ কৰি তেওঁ কয় যে শান্তি ভংগকাৰী যিকোনো ব্যক্তিৰ বিৰুদ্ধে কঠোৰ আৰু দমনীয় পদক্ষেপ গ্ৰহণ কৰিবলৈ প্রশাসনক জনোৱা হৈছে। লগতে তেওঁ হিংসাত্মক আচৰণ আৰু উৰাবাতৰিৰ পৰা আঁতৰি থাকিবলৈও জনসাধাৰণৰ প্ৰতি আহ্বান জনায়। আনহাতে, অঞ্চলটোত স্বাভাৱিক অৱস্থা ঘূৰাই আনিবলৈ জনসাধাৰণক আৰক্ষী-প্ৰশাসনৰ সৈতে সম্পূৰ্ণ সহযোগিতা আগবঢ়াবলৈ অনুৰোধ জনায়। উল্লেখ্য যে বৰ্তমানলৈকে কাৰিগাঁৱত সংঘটিত এখন গণপ্ৰহাৰৰ ঘটনাৰ সৈতে জড়িত থকাৰ অভিযোগত কোকৰাঝাৰ আৰক্ষীয়ে এতিয়ালৈকে ১৮ জন লোকক আটক কৰিছে।
আটক কৰা ব্যক্তিকেইজন হৈছে সাত্যানাথ টুডু (৪৭), গুদ্ৰৈ কিস্কু (৩০), গুনি মৰ্দি (২৮), পৱন হেমব্ৰোম (২২), মঙ্গল মূৰ্মু (২০), ৰাজু বাস্কী (২৬), সোনিৰাম মূৰ্মু (৩০), ৰবিন হেমব্ৰোম (৪৫), সোবান মৰ্দি (৩৫), ৰবিন চোৰেন (২৫), ৰবি হাছদা (৩৮), বাছিলে’ছ চোৰেন (২৩),্চিমুৰ মূৰ্মু (৬০), নিক’লাছ চোৰেন (৩৫), সোমে হেমব্ৰোম (১৮), ছেবাছ হেমব্ৰোম (৪৪), সুনিল টুডু (৩৫), আৰু মুন্টু মূৰ্মু (২৫)।
