এগৰাকী কিশোৰীক অপহৰণ কৰি দলবদ্ধ ধৰ্ষণ (Gang Rape)ৰ অভিযোগ উত্থাপন (Raise a complaint) হৈছে এজন আৰক্ষী (Police) আৰু এজন সাংবাদিক (Jurnalist)ৰ বিৰুদ্ধে (Against)। চলিত সপ্তাহৰ আৰম্ভণিতে উত্তৰ প্ৰদেশৰ কানপুৰ (Kanpur)ৰ সচেন্দিত সংঘটিত হয় এই ঘটনা। ইতিমধ্যে ১৪ বছৰীয়া কিশোৰীগৰাকীক অপহৰণ কৰি অত্যাচাৰ কৰাৰ অভিযোগত গ্ৰেপ্তাৰ হৈছে সাংবাদিকগৰাকী। অৱশ্যে অভিযুক্ত আৰক্ষী জোৱানজন এতিয়াও পলাতক।
বুধবাৰে আৰক্ষীয়ে জনোৱা মতে, এই সপ্তাহৰ আৰম্ভণিতে ঘটনাটো সংঘটিত হৈছে। সপ্তম শ্ৰেণীত অধ্যয়নৰত ছাত্ৰীগৰাকী। অভিযোগ অনুসৰি, দুই অভিযুক্তই নিশা ১০ মান বজাত গাড়ীৰে ৰে’লপথৰ সমীপৰ এক নিৰ্জন স্থানলৈ তেওঁক লৈ যায়। তাত প্ৰায় দুঘণ্টা ধৰি বন্দী কৰি ৰখাৰ লগতে যৌন নিৰ্যাতন চলোৱাৰ অভিযোগ উত্থাপন হৈছে। অৱশেষত অভিযুক্তই কিশোৰীগৰাকীক অচেতন অৱস্থাত ঘৰৰ সন্মুখত পেলাই থৈ পলায়ন কৰে।
আৰক্ষীৰ উপ-পৰিদৰ্শক আৰু এজন স্থানীয় ইউটিউবাৰ তথা সাংবাদিকে একেলগে এই ঘটনা সংঘটিত কৰা বুলি পৰিয়ালৰ অভিযোগ। ইতিমধ্যে সাংবাদিকগৰাকীক গ্ৰেপ্তাৰ কৰা হৈছে। অৱশ্যে আৰক্ষী জোৱানজন এতিয়াও পলাতক। পলাতক উপ-পৰিদৰ্শকজনক বিচাৰি আৰক্ষীয়ে চাৰিটা পৃথক দল গঠন কৰিছে। এই অপৰাধত ব্যৱহৃত গাড়ীখনো জব্দ কৰা হৈছে। গাড়ীখন আৰক্ষী জোৱানজনৰ।
ইফালে তদন্তত স্থানীয় আৰক্ষীয়ে গাফিলতিৰ অভিযোগ উত্থাপন কৰিছে নাবালিকাৰ পৰিয়ালে। তেওঁলোকে দাবী কৰে যে আৰক্ষীয়ে আৰক্ষী জোৱানজন জড়িত থকাৰ কথা শুনি প্ৰথমে বিষয়টো ঢাকি ৰাখিবলৈ চেষ্টা কৰিছিল। লগতে কিশোৰীগৰাকীৰ মোবাইল ফোনটোও কাঢ়ি লৈছিল। এই খবৰ পোহৰলৈ অহাৰ লগে লগে আৰক্ষী তৎপৰ হয়। আৰক্ষী আয়ুক্ত ৰঘুবীৰ লালৰ নিৰ্দেশত উপ আয়ুক্ত (পশ্চিম) দীনেশ চন্দ্ৰ ত্ৰিপাঠীক অপসাৰণ কৰা হয়। সচেন্দীৰ ভাৰপ্ৰাপ্ত আৰক্ষী বিষয়া বিক্ৰম সিঙকো বৰ্খাস্ত কৰা হয়।
চি পি ৰঘুবীৰে কয়, “ভুক্তভোগীৰ বক্তব্যৰ ভিত্তিত উপ-পৰিদৰ্শক আৰু ইউটিউবাৰৰ বিৰুদ্ধে এফ আই আৰ ৰুজু কৰা হৈছে। এজন ব্যক্তিক গ্ৰেপ্তাৰ কৰা হৈছে। পলাতক এছ আইজনক গ্ৰেপ্তাৰ কৰিবলৈ চাৰিটা দল গঠন কৰা হৈছে।” আৰক্ষী সূত্ৰই জনোৱা মতে, অভিযুক্ত আৰক্ষী জোৱানজনে বিথুৰ থানাত কৰ্মৰত। ইয়াৰ পিছতো ঘটনাৰ সময়ত তেওঁ কিয় সচেন্দীত উপস্থিত আছিল সেই বিষয়ে তদন্ত চলি আছে। আনহাতে, সংশ্লিষ্ট বিষয়াসকলক অপসাৰণ কৰাৰ পিছতে দীননাথ মিশ্ৰক সচেন্দী থানাৰ দায়িত্ব দিয়া হৈছে। বৰ্তমান অতিৰিক্ত ডি চি পি (পশ্চিম) কপিলদেৱ সিঙে তদন্তৰ নেতৃত্ব দিছে। সম্পূৰ্ণ স্বচ্ছতাৰে সমগ্ৰ ঘটনাৰ তদন্ত কৰা হ’ব বুলি তেওঁ জানিবলৈ দিয়ে।
