চাওঁতে চাওঁতে সময়ৰ বুকুৰ পৰা বাগৰি পৰিল আৰু এটা বছৰ। ২০২৫ বৰ্ষই মেলানি মাগিলে। উদিত হ’ল ২০২৬ বৰ্ষৰ নতুন সূৰুয (New Year 2026)। ২০২৫ বৰ্ষটো আছিল ৰাজ্যখনৰ বাবে বহুকেইটা দিশত গুৰুত্বপূৰ্ণ। সমাজ, সাহিত্য, সংস্কৃতি, অৰ্থনীতি, ৰাজনীতি সকলো ক্ষেত্ৰতে বিগত বৰ্ষটো আছিল প্ৰাপ্তি আৰু হেৰুওৱাৰ এক মিশ্ৰিত বৰ্ষ। সকলো প্ৰাপ্তিক একাষৰীয়া কৰিও ২০২৫ বৰ্ষটো অসম তথা অসমীয়াৰ বাবে আছিল এক অতি দুখৰ বছৰ।
কিয়নো এই বছৰটোতে আমি হেৰুৱাবলগা হয় অসমৰ হিয়াৰ আমঠু, প্ৰাণৰ শিল্পী জুবিন গাৰ্গক। সেয়ে বিগত বৰ্ষটোৰ লেখ-জোখ কৰিবলৈ গ’লে এই কথাটোৱে প্ৰথমতে আহিব। সেয়ে সামগ্ৰিকভাৱে ক’বলৈ গ’লে ২০২৫ বৰ্ষটো অসমবাসীৰ বাবে এক অতি মৰ্মান্তিক বছৰ।
যিয়েই নহওক, নতুন বছৰ এটাই সময়ৰ বুকুত থিতাপি লোৱাৰ পিছত আমি এই বছৰটোক লৈ বিভিন্ন পৰিকল্পনা কৰিব লাগিব। আশা-প্ৰত্যাশা নতুন বছৰটোক লৈ নিশ্চিতভাৱে থাকিব।
ব্যক্তিগত স্বাৰ্থতকৈ সামাজিক স্বাৰ্থই গুৰুত্ব পাওক। অসহিষ্ণু ৰাজনীতিৰ পৰা বিকাশৰ ৰাজনীতিৰ পৰিৱেশ গঢ়ি উঠক। জাতি-জনগোষ্ঠীৰ মাজত সম্প্ৰীতি অটুট থাকক। ধৰ্ম-বৰ্ণ-ভাষা নিৰ্বেশেষে সকলোৱে সুখে-সন্তোষে হাতে হাত ধৰি আগবাঢ়ক- সেয়াই হওক এই বছৰটোৰ অংগীকাৰ। আহক আমি সকলোৱে এই বছৰটোত সংকল্পবদ্ধ হওঁ যে আই অসমীৰ মান আৰু নাম বিশ্বত জিলিকাবলৈ একত্ৰিতভাৱে আগবাঢ়ো, পদক্ষেপ গ্ৰহণ কৰোঁ।
ধনী-দুখীয়া, জাতি-জনজাতি, ধৰ্ম-সম্প্ৰদায় নিৰ্বিশেষে সকলোৰে বাবে যাতে আগন্তুক বছৰটোত অসমখন এখন সৰগৰ ধৰণী হয় তাৰ কামনা কৰিলোঁ। লগতে সকলো সমস্যাৰ সমাধান আনক এই বৰ্ষটোৱে, তাৰো কামনা কৰিলোঁ। পুনৰবাৰ ২০২৬ বৰ্ষৰ আন্তৰিক শুভেচ্ছা জনালোঁ।
