অসম আন্দোলন শ্বহীদৰ স্মৃতি যুগমীয়া কৰাৰ বাবে গুৱাহাটীৰ পশ্চিম বৰাগাঁৱত নিৰ্মিত শ্বহীদ স্মাৰক ক্ষেত্র বুধবাৰে উদ্বোধন কৰে মুখ্যমন্ত্ৰী ডঃ হিমন্ত বিশ্ব শৰ্মাই। শ্বহীদ দিৱসৰ লগত সংগতি ৰাখি ১০ ডিচেম্বৰত কেন্দ্ৰীয় শ্বহীদ দিৱসৰ দিনা এই শ্বহীদ স্মাৰক ক্ষেত্ৰ মুকলি কৰা হয়।
১১৭ বিঘা মাটিৰ বিশাল পৰিসৰত আটকধুনীয়াকৈ নিৰ্মাণ কৰা হৈছে এই শ্বহীদ স্মাৰক ক্ষেত্ৰ। ইয়াত ওখ স্তম্ভ আৰু বীৰ শ্বহীদসকলৰ আৱক্ষমূৰ্তি ৰখা হৈছে।
অৱশ্যে অসম আন্দোলনৰ ৮৬০ গৰাকী শ্বহীদৰ আটাইৰে ছবি নোপোৱাৰ বাবে চাৰি শতাধিক শ্বহীদৰ আৱক্ষ মূৰ্তি শ্বহীদ স্মাৰক ক্ষেত্রত প্ৰতিষ্ঠা কৰা হৈছ আৰু বাকীসকলৰ নামফলক লগোৱা হৈছে। ইয়াত নিৰ্মাণ কৰা হৈছে ১৩ মহলীয়া এক সুউচ্চ স্মাৰক। এই স্মাৰকৰ তলত থকা গেলাৰীত অসম আন্দোলনত প্ৰাণ আহুতি দিয়া শ্বহীদসকলৰ আৱক্ষ মূৰ্তিৰ লগতে এটা অংশত অসম আন্দোলনৰ বিভিন্ন স্মৃতি বিজড়িত ফটো-সামগ্ৰী আছে।
সেই সময়ত বিভিন্ন কাকতত প্ৰকাশি বিভিন্ন বাতৰি আৰু আলোকচিত্রও আছে। স্মাৰক ক্ষেত্রৰ মূল প্ৰৱেশদ্বাৰৰ দুয়োকাষে দুটা বিশাল পুখুৰীত পোহৰ আৰু শব্দৰ দ্বাৰা বিভিন্ন বিষয় প্ৰদৰ্শনৰ ব্যৱস্থা কৰা হৈছে। আনহাতে, শ্বহীদ স্মাৰক ক্ষেত্রৰ চাৰিওকাষে আছে চাইক্লিং ট্ৰেক।
ইয়াৰ উপৰি প্ৰেক্ষাগৃহ আৰু মেডিটেচনৰ ব্যৱস্থাও আছে। ইয়াৰ লগতে গেলাৰী, উদ্যানশস্য বাগিচা, ফুড ক’ৰ্ট, মুকলি মঞ্চ, পুথিভঁৰাল, প্ৰেক্ষাগৃহ, যোগ কেন্দ্ৰ আদিও আছে। শ্বহীদ স্মাৰক ক্ষেত্রৰ মাজত থকা শ্বহীদ প্ৰণাম জ্যোতি অক্ষয় বন্তি হিচাপে ২৪ ঘণ্টাই জ্বলি থাকিব। এই জ্যোতি মঙলবাৰে গধূলি মুখ্যমন্ত্রীয়ে প্ৰজ্বলন কৰে।
১৮০ কোটি টকা ব্যয়েৰে নিৰ্মাণ কৰা শ্বহীদ স্মাৰক ক্ষেত্ৰৰ আধাৰশিলা ২০২০ চনৰ ১০ ডিচেম্বৰত তদানীন্তন মুখ্যমন্ত্রী সৰ্বানন্দ সোণোৱালে স্থাপন কৰিছিল। শ্বহীদ স্মাৰক ক্ষেত্রৰ মূল স্তম্ভৰ উচ্চতা হৈছে ৬৭.২০ মিটাৰ। ভূমি মহলাত আদৰণি কক্ষ আৰু শ্বহীদৰ আৱক্ষ মূৰ্তি, প্ৰথম মহলাত যোগ কেন্দ্ৰ আছে।
ভিউ পইণ্টৰ উচ্চতা হৈছে ৫১.৬০ মিটাৰ। প্ৰেক্ষাগৃহটোত ৫০০ দৰ্শকে একেলগে বহি অনুষ্ঠান উপভোগ কৰিব পাৰিব। ইয়াৰ উপৰি পাৰ্কিঙৰ ব্যৱস্থা, খোজকঢ়াৰ বাবে নিৰ্দিষ্ট এলেকা, ছুইমিং পুল আদিৰো সুবিধা আছে।
