কাৰ্বি আংলং জিলা তথা সমগ্ৰ কাৰ্বি জনগোষ্ঠীৰ বাবে এক গৌৰৱপূৰ্ণ মুহূৰ্ত। জনজাতীয় কাৰুকাৰ্যৰ এগৰাকী প্ৰচাৰক তথা বিখ্যাত শিপিনী ছাবিনা টেৰনপিক (SabinaTeronpi) ২০২৩-২০২৪ বৰ্ষৰ ৰাষ্ট্ৰীয় হস্তশিল্প বঁটা প্ৰদান । ভাৰতৰ ৰাষ্ট্ৰপতি দ্ৰৌপদী মুৰ্মুৱে তেওঁক এই সন্মান প্ৰদান কৰে । নতুন দিল্লীত অনুষ্ঠিত এক আড়ম্বৰপূৰ্ণ অনুষ্ঠানত তেওঁক এই বঁটা প্ৰদান কৰা হয়। এই বঁটাৰ জৰিয়তে টেৰনপিৰ পৰম্পৰাগত জনজাতীয় শিল্পকলাৰ সংৰক্ষণ, প্ৰচাৰ আৰু উদ্ভাৱনৰ প্ৰতি অটল নিষ্ঠাক স্বীকৃতি প্ৰদান কৰা হৈছে।
আনহাতে, কাৰ্বি সাংস্কৃতিক ঐতিহ্যত গভীৰভাৱে শিপাই থকা তেওঁৰ নিখুঁত কাৰুকাৰ্যই সমগ্ৰ ভাৰত তথা বিদেশতো প্ৰশংসা বুটলিবলৈ সক্ষম হৈছে ।উল্লেখ্য যে সুদীৰ্ঘ সময় ধৰি টেৰনপিয়ে থলুৱা শিপিনীসকলক আগবঢ়াই নিয়াৰ লগতে ক্ৰমাৎ পাহৰণিৰ গৰ্ভলৈ যাব ধৰা শিল্প পৰম্পৰাক পুনৰুজ্জীৱিত কৰা আৰু দক্ষতা বিকাশৰ জৰিয়তে গ্ৰাম্য মহিলাসকলক সবলীকৰণৰ বাবে নিবিড়ভাৱে কাম কৰি আহিছে। তেওঁৰ সৃষ্টিসমূহত প্ৰকাশ পাইছে থলুৱা পৰম্পৰাৰ শৈলী, প্ৰাকৃতিক ৰং আৰু জটিল কাৰুকাৰ্য। ইয়াৰ উপৰি সাংস্কৃতিক গৌৰৱ আৰু বহনক্ষম কাৰুকাৰ্যৰো প্ৰতীক হৈ পৰিছে তেওঁৰ শিল্পকৰ্ম।
তেওঁৰ এই সাফল্যত স্থানীয় নেতা, সাংস্কৃতিক সংগঠন তথা কাৰ্বি জনসাধাৰণে এক ঐতিহাসিক মাইলৰ খুঁটি হিচাপে প্ৰশংসা কৰিছে। কাৰ্বি সাংস্কৃতিক সমাজে এই স্বীকৃতি সন্দৰ্ভত কয়, “এয়া আমাৰ চহকী কলাত্মক উত্তৰাধিকাৰলৈ জাতীয় গৌৰৱ কঢ়িয়াই অনা এক গৌৰৱময় মুহূৰ্ত ।”
উল্লেখ্য যে টেৰনপিৰ এই সন্মান কেৱল তেওঁৰ ব্যক্তিগত কৃতিত্বয়ে নহয়, বৰঞ্চ পৰম্পৰাগত জনজাতীয় শিল্পই কেনেকৈ নিষ্ঠা, আবেগ আৰু সম্প্ৰদায়ৰ মনোভাবৰ জৰিয়তে লাভৱান হ’ব পাৰে তাৰ এক উজ্জ্বল নিদৰ্শন। আনহাতে, থলুৱা কাৰুকাৰ্যক ভৱিষ্যত প্ৰজন্মৰ বাবে আগবঢ়াই নিয়াৰ বাবে উৎসাহী যুৱ শিল্পীসকলৰ বাবেও তেওঁৰ এই যাত্ৰা এক প্ৰেৰণাৰ প্ৰতীক।
