সিন্দুৰ অভিযানৰ সময়ত শত্ৰুৰ ঘাটিসমূহক নিৰ্ভুলভাৱে লক্ষ্য কৰি লোৱা ব্ৰহ্মছ ক্ষেপনাস্ত্ৰৰ (BrahMos) শক্তি সমগ্ৰ বিশ্বই প্ৰত্যক্ষ কৰিছে। ভাৰতে ছুপাৰছনিক (শব্দতকৈ দ্ৰুত) ক্ৰুজ মিছাইল ব্ৰহ্মছক অধিক শক্তিশালী কৰাৰ উদ্যোগ লৈছে। ইয়াৰ মাজতে ভাৰতীয় সেনাই সোমবাৰে বংগোপসাগৰত ব্ৰহ্মছৰ পৰীক্ষামূলক উৎক্ষেপণ কৰে।
সেনাই পুনৰবাৰ এই দীৰ্ঘ দূৰত্বৰ ক্ষেপণাস্ত্ৰৰ শক্তি পৰীক্ষা কৰে। উক্ত পৰীক্ষাত সকলো পৰিমাপতে ব্ৰহ্মছ সফল হৈছে। ভাৰতীয় সেনাৰ ব্ৰহ্মছ ইউনিটৰ দক্ষিণ কমাণ্ড আৰু তিনিওটা সেৱাৰ আন্দামান আৰু নিকোবৰ কমাণ্ডে যৌথভাৱে এই পৰীক্ষা চলায়। এইটো আছিল এটা নিৰ্দিষ্ট পৰীক্ষামূলক উৎক্ষেপণ।
ইয়াৰ জৰিয়তে ব্ৰহ্মছৰ ৰেঞ্জকে ধৰি বিভিন্ন পেৰামিটাৰত এই ক্ষেপণাস্ত্ৰ পৰীক্ষা কৰা হয়। এই পৰীক্ষাৰ জৰিয়তে ক্ৰুজ মিছাইলটোৱে পুনৰবাৰ ব্ৰহ্মছৰ উন্নত দিকনিৰ্দেশনা ব্যৱস্থা, নিয়ন্ত্ৰণ ব্যৱস্থা, তীব্ৰ বেগত স্থিৰতা, সঠিকতা আৰু নিখুঁত লক্ষ্যত আঘাত কৰাত সফল হৈছে।
যুদ্ধক্ষেত্ৰৰ দৰে পৰিস্থিতিত ব্ৰহ্মছৰ পৰীক্ষা কৰা হৈছে। সকলো চৰ্ততে ই সফল হোৱা দেখা যায়। অৰ্থাৎ কাৰ্যকৰী লক্ষ্য পূৰণ হৈছে। ভাৰতীয় সেনাৰ ব্ৰহ্মছ ইউনিটৰ বাস্তৱ সময়ৰ প্ৰস্তুতি আৰু দীৰ্ঘ দূৰত্বৰ ক্ষেপণাস্ত্ৰ আক্ৰমণৰ সঠিকতা পৰীক্ষাৰ ক্ষেত্ৰতো এই পৰীক্ষাটো যথেষ্ট গুৰুত্বপূৰ্ণ বুলি বিবেচিত হৈছে।
সিন্দুৰ অভিযানৰ পিছৰে পৰা এই ক্ষেপণাস্ত্ৰক লৈ বহু চৰ্চা হৈছে।
আনকি পাকিস্তানৰ প্ৰধানমন্ত্ৰী শ্বাহবাজ শ্বৰীফৰ ভাষণতো ৰাছিয়াৰ সহায়ত ভাৰতত নিৰ্মাণ কৰা ব্ৰহ্মছ ক্ৰুজ ছুপাৰছনিক মিছাইলৰ কথা আহিছে। ভাৰতৰ প্ৰতিৰক্ষা মন্ত্ৰী ৰাজনাথ সিঙেও ইছলামাবাদক সকীয়াই দিয়ে যে সিন্দুৰ অভিযান মাথোঁ এক আভাসহে। তেওঁ কয় যে পাকিস্তানৰ প্ৰতিটো কোণ ব্ৰহ্মছৰ হাতৰ মুঠিত।
ইফালে শেহতীয়াকৈ ফিলিপাইনছে ভাৰতৰ পৰা ক্ৰয় কৰা ক্ষেপণাস্ত্ৰৰ ওপৰত নিৰ্ভৰ কৰি দক্ষিণ চীন সাগৰত ইছলামাবাদৰ মিত্ৰ ৰাষ্ট্ৰ বেইজিঙৰ আগ্ৰাসন ৰোধ কৰিছে। তাত ব্ৰহ্মছ মিছাইল নিয়োগ কৰিছে।
অপাৰেচন সিন্দুৰৰ পিছৰে পৰা ভাৰতে ব্ৰহ্মছৰ ৰেঞ্জো আৰু অধিক বৃদ্ধি কৰাৰ উদ্যোগ লৈছে। স্থল বা যুদ্ধ জাহাজৰ পৰা উৎক্ষেপণ কৰিব পৰা ব্ৰহ্মছৰ ৰেঞ্জ ২৯০ৰ পৰা ৪০০ কিলোমিটাৰ।
বিমান বা ছাবমেৰিনত ব্যৱহাৰ কৰা সংস্কৰণতকৈ এই পৰিমাণ অলপ কম। নতুন পঞ্চমাত্ৰিক পৰিকল্পনাত ব্ৰহ্মছৰ ৰেঞ্জ আৰু গতি দুয়োটা বৃদ্ধি কৰা হৈছে। স্থল বা যুদ্ধ জাহাজৰ পৰা উৎক্ষেপণ কৰিব পৰা ব্ৰহ্মছৰ ৰেঞ্জ নতুন সংস্কৰণত ৮০০ কিলোমিটাৰ হ’ব বুলি দাবী কৰা হৈছে।
ইয়াৰ উপৰি ব্ৰহ্মছক ছুপাৰছনিকৰ পৰা হাইপাৰছনিক (শব্দৰ গতিতকৈ পাঁচগুণ বা তাতকৈ অধিক) মিছাইললৈ উন্নীত কৰা হ’ব। এনে পৰিস্থিতিত বংগোপসাগৰত ব্ৰহ্মছ পৰীক্ষা যথেষ্ট তাৎপৰ্যপূৰ্ণ বুলি বিবেচিত হৈছে।
