নিউজীলেণ্ডৰ পিছত এইবাৰ দক্ষিণ আফ্ৰিকা। এবছৰতে ঘৰৰ মাটিত দুখনকৈ টেষ্ট শৃংখলাত পৰাস্ত হৈছে ভাৰত (Test Match)। কেৱল পৰাজয়ে নহয় হোৱাইট ৱাশ্ব হৈছে। বুধবাৰে গুৱাহাটীত পৰাজয়ৰ পিছত গৌতম গম্ভীৰক প্ৰশিক্ষকৰ পদৰ পৰা অপসাৰণৰ বাবে তীব্ৰ দাবী জনোৱা হৈছে।
অৱশ্যে এই সন্দৰ্ভত বি চি চি আয়ে সিদ্ধান্ত ল’ব বুলি স্পষ্ট কৰি দিছে ভাৰতীয় প্ৰশিক্ষকগৰাকীয়ে। তেওঁ নিজাববীয়াকৈ পদত্যাগ কৰিব। লগতে তেওঁৰ অতীতৰ কৃতিত্বৰ কথাও সোঁৱৰাই দিয়ে।
এইবাৰ তেওঁক ড্ৰপ কৰা হ’ব নেকি? বুধবাৰে মেচখনৰ পিছত সোধাত গম্ভীৰে কয়, “এয়া ব’ৰ্ডৰ সিদ্ধান্ত হ’ব। মই আগতেও কৈছো আৰু পুনৰ কওঁ, ভাৰতীয় ক্ৰিকেট আটাইতকৈ গুৰুত্বপূৰ্ণ, মই নহয়। মনত ৰাখিব, মই সেইজন মানুহ, যিয়ে ইংলেণ্ডত ভাল প্ৰদৰ্শন কৰিছিল, চেম্পিয়নছ ট্ৰফী আৰু এছিয়া কাপ জয় কৰিছিল।”
তেওঁ লগতে কয়, “এই পৰাজয়ৰ বাবে সকলোৱেই দায়ী। কিন্তু দায়িত্ব মোৰ পৰাই আৰম্ভ হয়। আমি বহুত ভাল খেলিব লাগিব। ৯৫/১ৰ পৰা ১২২/৭লৈ যোৱাটো একেবাৰেই গ্ৰহণযোগ্য নহয়। কোনো বিশেষ ক্ৰিকেটাৰ বা কোনো বিশেষ শ্বটক দোষ দিব নোৱাৰি। সকলোৱে সমানে দায়ী। মই কেতিয়াও কাকো দোষ দিয়া নাই। ভৱিষ্যতেও মই তেনেকুৱা নকৰো।”
অৱশ্যে প্ৰশ্ন উত্থাপন কৰাত বিৰক্ত হৈ পৰে ভাৰতীয় প্ৰশিক্ষকগৰাকী। তেওঁ নিউজীলেণ্ডক দক্ষিণ আফ্ৰিকাৰ সৈতে তুলনা কৰিব বিচৰা নাই। তেওঁ কয়, “নিউজীলেণ্ডৰ বিৰুদ্ধে আমাৰ এটা বেলেগ দল আছিল। এতিয়া আমাৰ এটা বেলেগ দল আছে। মই নিশ্চিত যে আপোনালোকে (সংবাদ মাধ্যমে) বহু ক্ৰিকেট মেচৰ বাতৰি পৰিৱেশন কৰে। তেতিয়া আপোনালোকে এইটোও জানিব যে দুয়োটা দলৰ বেটিং বিভাগৰ মাজত কোনো তুলনা নাই। দুয়োটা দলৰ অভিজ্ঞতাৰ মাজত এক বৃহৎ পাৰ্থক্য আছে।”
গম্ভীৰে লগতে কয়, “আপোনালোকে সদায় নিউজীলেণ্ডৰ শৃংখলাক সকলোৰে সৈতে তুলনা কৰা উচিত নহয়। সেই শৃংখলাৰ পৰা এতিয়া চাৰি-পাঁচজন ক্ৰিকেটাৰ আছে। মই অজুহাত দেখুৱাব নোৱাৰো। মই ভৱিষ্যতেও সেইবোৰ বনাব নোৱাৰো। কিন্তু যদি আপোনালোকে চায় তেন্তে বুজিব যে প্ৰথম আঠজনৰ ভিতৰত চাৰি-পাঁচজন বেটছমেনে ১৫ খন বা তাতকৈ কম টেষ্ট খেলিছে।”
এই পৰাজয়ৰ পৰা ক্ৰিকেটাৰসকলে বহুখিনি শিকিব বুলি আশা কৰিছে গম্ভীৰে।
ভাৰতৰ প্ৰশিক্ষকগৰাকীয়ে কয়, “তেওঁলোকে ক্ৰমান্বয়ে নিজৰ উন্নতি সাধন কৰিব। এতিয়া তেওঁলোকে নিজৰ কাম ভালদৰে শিকিছে। টেষ্ট ক্ৰিকেট খেলাটো একেবাৰেই সহজ নহয়। বিশেষকৈ যেতিয়া আপুনি শীৰ্ষমানৰ দলৰ বিৰুদ্ধে খেলে। সেইবাবেই মই তেওঁলোকক সময় দিবলৈ কৈছো। চাপৰ মুখামুখি হ’বলৈ তেওঁলোকক সময় দিব লাগিব। লাহে লাহে তেওঁলোকে ভাল দলৰ বিৰুদ্ধে ভাল খেলিবলৈ শিকিব।”
