অহা ১৯ নৱেম্বৰত জুবিন গাৰ্গক (Zubeen Garg) স্মৰণৰ উদ্দেশ্যে ৰাজ্যৰ কণ্ঠশিল্পীসকলে আয়োজন কৰিছে এক বিশাল সাংস্কৃতিক অনুষ্ঠানৰ। এই অনুষ্ঠানৰ নাম দিয়া হৈছে ‘জুবিন-জোনাক কণ্ঠলৈ সুৰৰ অৰ্ঘ্য’।
এই অনুষ্ঠানটি আয়োজন কৰিছে কণ্ঠশিল্পী অসমৰ উদ্যোগত। চানমাৰি অভিযান্ত্ৰিক প্ৰতিষ্ঠানৰ খেলপথাৰত অনুষ্ঠিত হ’বলগীয়া এই বিশেষ অনুষ্ঠানত ৰাজ্যৰ দুই শতাধিক কণ্ঠশিল্পীয়ে জুবিন গাৰ্গৰ কণ্ঠৰ ভক্তিমূলক, আধুনিক, লোকসংগীত, জনজাতীয় গীতকে ধৰি প্ৰায় ২১ টা গীত পৰিবেশন কৰিব।
বৰ্তমান গুৱাহাটীৰ জ্যোতি চিত্ৰবনত ইয়াৰ বাবে আখৰা চলি আছে।
জানিব পৰা মতে, প্ৰায়বোৰ গীতেই সমবেত কণ্ঠত পৰিবেশন কৰা হ’ব আৰু ইয়াত প্ৰায় ৮০ গৰাকী বাদ্যযন্ত্রীয়ে বাদ্যযন্ত্ৰ সংগত কৰিব। এই অনুষ্ঠানটোৰ বাবে গীতসমূহ সজোৱাৰ দায়িত্ব দিয়া হৈছে দিগন্ত ভাৰতী, পলাশ সূৰ্য গগৈ, পাপু গগৈসহ প্ৰায় ১০ গৰাকী সংগীত পৰিচালকক।
ইয়াৰ উপৰি এই অনুষ্ঠানতে ২০২৫ বর্ষত আমাৰ মাজৰ পৰা হেৰাই যোৱা প্ৰতিগৰাকী শিল্পীৰ প্ৰতি শ্ৰদ্ধাঞ্জলি জনোৱাৰ ব্যৱস্থা কৰা হৈছে।
