শনিবাৰে চি আৰ পি এফৰ সঞ্চালক প্ৰধান জি পি সিঙৰ লগতে কেন্দ্ৰীয় মন্ত্ৰী জ্যোতিৰাদিত্য সিন্ধিয়া জুবিন গাৰ্গৰ (Zubeen Garg) বাসগৃহত উপস্থিত হৈ তেওঁলৈ শ্ৰদ্ধাঞ্জলি জ্ঞাপন কৰে।
আনহাতে, পত্নী গৰিমা গাৰ্গ আৰু পিতৃ কপিল ঠাকুৰৰ লগতে জুবিনৰ পৰিয়ালৰ সদস্যসকলক সাক্ষাৎ কৰি জি পি সিঙে কয় যে জুবিন গাৰ্গৰ সৈতে তেওঁৰ সম্বন্ধ প্ৰায় ৩০ বছৰ পূৰ্বৰ। যোৰহাটত থকাৰ সময়ৰ পৰা আছিল জুবিনৰ সৈতে সম্পৰ্ক। কিন্তু তেওঁৰ এনেকুৱা আকস্মিক মৃত্যু দুখজনক। লগতে পৰিয়াললৈ সমবেদনা জ্ঞাপন কৰাৰ উপৰি অসমৰ ৰাইজৰ সৈতে দুখৰ সমভাগী হোৱা বুলি উল্লেখ কৰে।
আনহাতে, শনিবাৰে জুবিন গাৰ্গৰ কাহিলিপাৰাস্থিত বাসগৃহত উপস্থিত হৈ কেন্দ্ৰীয় চৰকাৰৰ ড’নাৰ মন্ত্ৰী জ্যোতিৰাদিত্য সিন্ধিয়াই তেওঁৰ পৰিয়ালক সমবেদনা জ্ঞাপন কৰে। কেন্দ্ৰীয় মন্ত্ৰীগৰাকীয়ে কয় যে জুবিন গাৰ্গ কেৱল অসমৰে নহয় সমগ্ৰ ভাৰতৰে নৱৰত্ন আছিল।
জুবিনে সমগ্ৰ জীৱনকালত গীতৰ যোগেদি মানুহৰ মন জয় কৰাৰ উপৰি দেশৰ অসীম ক্ষমতাক প্ৰত্যেকগৰাকী ব্যক্তিলৈ প্ৰেৰণ কৰা ক্ষমতা আছিল বুলিও উল্লেখ কৰে। জুবিন গাৰ্গ অসম আৰু পৃথিৱীৰ অন্য দেশৰ মাজত এক সেতু আছিল বুলি উল্লেখ কৰি কেন্দ্ৰীয় মন্ত্ৰীগৰাকীয়ে কয় যে তেওঁৰ নাম জুবিন আছিল আৰু জুবিন মানে হ’ল যি ব্যক্তিয়ে আকাশ চুব পাৰে।
সেয়ে কেৱল গুৱাহাটী বা অসমৰ জনতায়ে নহয় দেশৰ ১৪০ কোটি জনতাই তেওঁলৈ শ্ৰদ্ধা নিবেদন কৰা বুলি মন্তব্য কৰে। লগতে জুবিনৰ পত্নী গৰিমা, ভগ্নী আৰু পিতৃক ঈশ্বৰে যেন শক্তি দিয়ে তাৰো কামনা কৰি ভগৱানে আশীৰ্বাদ প্ৰদান কৰাৰ বাবে প্ৰাৰ্থনা কৰে।
