বৃহস্পতিবাৰে বিয়লি আহমেদাবাদত সংঘটিত হয় এক ভয়ংকৰ দুৰ্ঘটনা (Ahmedabad Flight Accident)। চৰ্দাৰ বল্লভভাই পেটেল আন্তঃৰাষ্ট্ৰীয় বিমানবন্দৰৰ পৰা উৰণৰ কিছু সময়ৰ পিছতে দুৰ্ঘটনাগ্ৰস্ত হয় এয়াৰ ইণ্ডিয়াৰ এ আই ১৭১ বিমানখন।
আৰক্ষী সূত্ৰই জনোৱা মতে, লণ্ডনৰ গেটৱিক বিমানবন্দৰ অভিমুখী বয়িং ৭৮৭-৮ ড্ৰিমলাইনাৰ বিমানখনত মুঠ ২৪২ জন যাত্ৰী আৰু ক্ৰু আছিল আৰু ইয়াৰে কমেও ২৪১ জনৰ মৃত্যু হৈছে।
আনহাতে, অভিনেতা বিক্ৰান্ত মেছিৰ ভাতৃ ফাৰ্ষ্ট অফিচাৰ ক্লাইভ কুণ্ডাৰে এই মৰ্মান্তিক দুৰ্ঘটনাত প্ৰাণ হেৰুৱায়।
ইনষ্টাগ্ৰামত এক আৱেগিক ষ্ট’ৰীত বিক্ৰান্তে লিখিছে, “এই মৰ্মান্তিক দুৰ্ঘটনাত আপোনজনক হেৰুওৱাসকলৰ বাবে মোৰ হৃদয় ভাঙি গৈছে। মোৰ খুড়া ক্লিফৰ্ড কুণ্ডাৰে নিজৰ পুত্ৰ ক্লাইভ কুণ্ডাৰক হেৰুৱাইছে বুলি জানি আৰু বেছি কষ্ট হৈছে। বিমানখনৰ প্ৰথম বিষয়া আছিল তেওঁ। ভগৱানে মোৰ খুড়াৰ পৰিয়ালক শক্তি দিয়ক আৰু যিসকল গভীৰভাৱে প্ৰভাৱিত হৈছে তেওঁলোককো শক্তি প্ৰদান কৰক।”
ক্লাইভ কুণ্ডাৰ ইয়াৰ পূৰ্বে এজন দক্ষ সহ-পাইলট আছিল আৰু তেওঁৰ ১১০০ ঘণ্টাৰো অধিক উৰণৰ অভিজ্ঞতা আছিল।
বিমানখনৰ অধিনায়ক আছিল সুমিত চভাৰৱাল। ৮২০০ ঘণ্টাৰো অধিক উৰণৰ অভিজ্ঞতাৰে তেওঁ আছিল লাইন ট্ৰেইনিং কেপ্টেইন। বৃহস্পতিবাৰে দিনৰ প্ৰায় ১.৩০ বজাত সংঘটিত হয় এই দুৰ্ঘটনা। গুজৰাটৰ মেঘনী নগৰৰ এখন চৰকাৰী চিকিৎসা মহাবিদ্যালয়ৰ হোষ্টেলত খুন্দা মৰাৰ ফলত বিমানখন ক্ষন্তেকতে জুইত জাহ যায়।
দুৰ্ঘটনাগ্ৰস্ত বিমানখনৰ ধ্বংসাৱশেষে অঞ্চলটো আৱৰি ধৰে। ইণ্ডিয়ান মেডিকেল এছ’চিয়েশ্যনৰ গুজৰাট শাখাৰ প্ৰতিনিধি ডাঃ মেহুল শ্বাহে জনোৱা মতে, নিহতসকলৰ ভিতৰত তিনিজন চিকিৎসা বিজ্ঞানৰ ছাত্ৰও আছে। বহুকেইজন সংকটজনক অৱস্থাত চিকিৎসালয়ত ভৰ্তি হৈছে।
জানিব পৰা মতে, বিমানখন উৰণৰ কিছু সময়ৰ পাছতেই পাইলটে মে’ ডে’ কল কৰিছিল। কিন্তু বিমান পৰিবহণ নিয়ন্ত্ৰণৰ সৈতে যোগাযোগ হেৰাই যায়। জানিব পৰা মতে, এই দুৰ্ঘটনা সন্দৰ্ভত ডি জি চি এয়ে তদন্ত আৰম্ভ কৰিছে।
