ভাৰতীয় ছবিৰ বাবে এক ঐতিহাসিক মুহূৰ্ত। শ্বাহৰুখ খান আৰু কাজল (Shah Rukh Khan and Kajol) অভিনীত ‘দিলৱালে দুলহনিয়া লে জায়েংগে (ডি ডি এল জে)’ৰ লণ্ডনৰ বিখ্যাত লেষ্টাৰ স্কোৱাৰত (London’s famous Lester Square) প্ৰতিমূৰ্তি স্থাপন (Installing statue) কৰা প্ৰথমখন ভাৰতীয় ছবি হিচাপে পৰিগণিত হ’ব। ছবিখনৰ এটা আইকনিক মুহূৰ্তত প’জ দিয়া ৰাজ-চিমৰানৰ ব্ৰঞ্জৰ মূৰ্তি এটা এই বছৰতে ‘ছিনছ ইন দ্য স্কোৱাৰ মুভি ট্ৰেইল’ৰ অংশ হিচাপে উন্মোচন কৰা হ’ব।
বলীউডৰ এই চিৰসেউজ প্ৰেম কাহিনী এতিয়া সংযোজিত হৈছে মেৰী পপিন্সৰ সৈতে হেৰী পটাৰ, মিষ্টাৰ বিনৰ দৰে ছবি জগতৰ আন্তঃৰাষ্ট্ৰীয় মানচিত্ৰত। আয়োজক সংস্থা ‘হাৰ্ট অৱ লণ্ডন বিজনেছ এলায়েন্স’-এ এই সন্দৰ্ভত কয়, ‘ডি ডি এল জে’ৰ এই সন্মান ৩০ বছৰৰ পূৰ্ণ হোৱাৰ উপহাৰ।
ছবিখনৰ বহু দৃশ্য লণ্ডনৰ টাৱাৰ ব্ৰীজ, কিংছ ক্ৰছ ষ্টেচন, হাইড পাৰ্ক আৰু লেষ্টাৰ স্কোৱাৰত লোৱা হৈছিল। এইবাৰ প্ৰেমৰ ইতিহাস ৰচিত হ’ল প্ৰেমৰ নগৰত।” সংস্থাটোৰ উপ-মুখ্য মাৰ্ক উইলিয়ামছে কয়, “শ্বাহৰুখ-কাজল আন্তঃৰাষ্ট্ৰীয় চিনেমাৰ কিংবদন্তি। ডি ডি এল জে কেৱল বলীউডৰে নহয়, বিশ্বৰ অন্যতম সফল চিনেমা। এই ছবিখনত প্ৰথমবাৰৰ বাবে লেষ্টাৰ স্কোৱাৰ দেখা গৈছিল। এই মূৰ্তিটোৱে কেৱল বলীউডৰ নহয়, লণ্ডনৰ বৈচিত্ৰ্যকো উদযাপন কৰে। গতিকে এই প্ৰতিমূৰ্তিটোৱে বৈচিত্ৰ্য আৰু চিনেমাক একত্ৰিত কৰিব।”
যশ ৰাজ ফিল্মছৰ অন্যতম নেতা অক্ষয় উইধানীয়ে কয়, “ডি ডি এল জে মুক্তি পোৱাৰ সময়ত ছবিখনে বলীউডক বিশ্বৰ মানচিত্ৰত স্থান দিবলৈ সক্ষম হৈছিল। গতিকে এই ব্ৰঞ্জৰ মূৰ্তিটো কেৱল সন্মান নহয়, ই এক সাংস্কৃতিক সেতু বন্ধন যে মানুহে এতিয়াও সেই প্ৰেম কাহিনীত বিশ্বাস কৰে।”
উল্লেখ্য যে এই ছবিখনৰ দৃশ্যগ্ৰহণ লণ্ডনৰ কিংছ ক্ৰছ ষ্টেচন, টাৱাৰ ব্ৰীজ, হাইড পাৰ্ক আৰু হৰ্চগাৰ্ডছ এভিনিউ আদি কেইবাটাও স্থানত কৰা হৈছিল। এতিয়া লণ্ডনৰ চিনেমা ষ্ট্ৰীটে সেই সকলোবোৰ মুহূৰ্তৰ সাক্ষী হ’বলৈ গৈ আছে।
