গুৱাহাটী মহানগৰী (City of Guwahati)ৰ সুৰাপায়ীসকলৰ বাবে এক সুখবৰ আনিছে আবকাৰী বিভাগে। এতিয়াৰে পৰা নিশা ১০ বজাত বন্ধ নহয় সুৰা বিপণি। ইয়াৰ পৰিৱৰ্তে নিশা ১১ বজালৈকে (By 11 p.m.) ৰাজ্যত খোলা থাকিব সকলো সুৰা বিপণি (Liquor shop)। ইয়াৰ উপৰি নিশা ১২.৩০ বজালৈকে সকলো বাৰ তথা ৰেষ্টুৰেণ্টসমূহ খোলা থাকিব৷ এই সন্দৰ্ভত আবকাৰী বিভাগে এক অধিসূচনা জাৰি কৰিছে।
অধিসূচনাখনত লগতে উল্লেখ কৰা হৈছে যে প্ৰিমিয়াম ব্ৰেণ্ডৰ সুৰাৰ মূল্যও হ্ৰাস পাব। ইয়াৰ উপৰি এতিয়াৰে পৰা থলুৱা সুৰাৰ বিপণিতো বিলাতী সুৰা উপলব্ধ হ’ব। সোমবাৰে অসম চৰকাৰৰ আবকাৰী বিভাগৰ আয়ুক্ত সচিব ৰাকেশ কুমাৰে এই অধিসূচনা জাৰি কৰে।
অধিসূচনাখনত অৱশ্যে গুৱাহাটী পৌৰ নিগম এলেকা (Guwahati Municipal Corporation Area)ৰ ভিতৰৰ সুৰা বিপণি আৰু বাৰ-ৰেষ্টুৰেণ্টসমূহৰ বাবেহে এই নতুন সময়সীমাৰ কথা উল্লেখ কৰা হৈছে। আনহাতে, এই ক্ষেত্ৰত অসম আবকাৰী আইন, ২০০০-ত সংশোধনী অনা হৈছে।
আবকাৰী বিভাগে ৰাজপত্ৰযোগে অনা সংশোধনীত ৰাজ্যপালে অনুমোদন জনোৱাৰ কথা আবকাৰী বিভাগে প্ৰকাশ কৰিছে৷ উল্লেখ্য যে আবকাৰী আইনৰ ১১ নম্বৰ সংশোধনীত আইনখনৰ ১২৭ নম্বৰ বিধি সলনি কৰি নিশা ১২.৩০ বজালৈ মহানগৰীৰ বাৰ-ৰেষ্টুৰেণ্ট আদি খোলাৰ ব্যৱস্থা কৰাৰ বিপৰীতে ১৭ নম্বৰ সংশোধনীত আইনখনৰ বিধি ৬১৪ সংশোধনী কৰি মহানগৰীত নিশা ১১ বজালৈকে সুৰাৰ বিপণি খোলাৰ সুবিধা প্ৰদান কৰা হৈছে।
